丹陽一日遊行程推介
想要睇靚景、食美食，仲想玩連極限運動？！嚟丹陽就滿足晒你三個願望！
Hello，大家好，我哋係由韓國人每日提供最新韓國旅行資訊嘅Creatrip。
今次為大家介紹一個出名景靚嘅城市 ─ 丹陽！丹陽係喺忠清北道嘅一個小城市，男女老少都鍾意嘅旅遊勝地！爲咗同大家介紹呢個咁靚嘅城市，Creatrip親身去到丹陽取材！大家一齊跟小編出發啦！
丹陽一日遊行程推介
丹陽站（단양역）
首先喺首爾清涼里坐KTX去到丹陽站，全程只需要1個鐘18分鐘 ，係咪超快呢？雖然都可以搭高速巴士去丹陽，但係要坐好耐，而且巴士冇KTX坐得咁舒服，所以小編推薦大家坐KTX！
由丹陽站入口度行出嚟，左邊就見到用南漢江做背景，展示住廢棄嘅鐵路同而家唔再運行嘅舊列車。五顏六色嘅火車、藍色的河水同天空，真係好似一幅畫咁靚！大家一定要喺度影多啲靚相留為紀念啊！而家就正式出發啦！
行程一：嶋潭三峰＋石門 （도담삼봉+석문）
地址：충북 단양군 매포읍 삼봉로 644
開放時間：09:00 - 18:00
第一個目的地，要喺丹陽站度搭去丹陽邑嘅巴士。丹陽站入口有個巴士站，好多都係去丹陽邑嘅，所以隨便搭一架就可以！
喺 （도전 2리 구경시장 입구) 站落車之後，轉搭106、204、 802、 803、 804、 806、 807、 811、 812、 813、 814、 815、 816其中一架巴士就得啦！雖然丹陽嘅巴士班次好疏，但好在有好多架車可以揀，所以睇啱號碼上車，好快就可以去到嶋潭三峰嘅巴士站！
丹陽最出名睇自然景觀同最靚嘅地方就係嶋潭三峯同石門！ 想一大朝早感受大自然嘅氣息，就要揀呢度為第一個目的地啦！
座立喺又清又綠嘅水面上嘅三座山峯，就係丹陽嘅嶋潭三峰。 同彩繽紛嘅花花一齊欣賞嶋潭三峰，心情都舒暢啲！
沿住南漢江旁邊嘅山路向上行，就會睇到經過大自然嘅力量，打造出嚟嘅神祕橋型石門！ 由石門中間望過去，南漢江同倒影嘅天空，係咪好有置身於仙景嘅感覺呢？
欣賞完嶋潭三峰同石門之後，推薦大家去坐黃布帆船！ 係一種用木頭製成，好有傳統風格嘅船。坐住船，可以喺南漢江上享受自然嘅風光。
遊完嶋潭三峰之後，應該肚餓要食飯啦掛？小編推薦去九景市場嗰邊搵食。可以搭的士或巴士，但係巴士班次太疏，小編等咗好耐都唔見有巴士嚟，所以就搭咗的士。搭的士嘅話，6000won（約HKD42），好快就到，所以小編推薦大家搭的士落去~
行程二：忠清道血腸（충청도순대）
地址：충청북도 단양군 단양읍 도전리 614
營業時間：每日 9:00 - 21:00
擁抱完大自然之後，可以嚟到白鍾元老師喺節目上大讚嘅忠清道血腸，位於丹陽嘅九景市場入口處。
大蒜血腸大腸鍋（中) 23,000 won（約HKD160）
呢個就係白老師推薦嘅大蒜血腸大腸鍋啦！因為丹陽出名食大蒜，所以呢度嘅血腸都加左大蒜去整！大腸加埋大蒜一齊，真係好食到唔知點形容！
軟腍腍嘅血腸，加埋有咬口嘅大腸，仲有清淡得嚟又有帶啲辣嘅湯，真係食到舔晒脷！
行程三：九景市場（구경시장）
地址： 충청북도 단양군 단양읍 도전리
營業時間： 每日08:00 - 20:00（不過每一間開鋪時間都唔一樣）
想喺丹陽掃街，梗係要嚟九景市場啦！呢度係丹陽嘅中央傳統市場，有超多小食，環境又乾淨，深受好多人歡迎。
唔單止遊客，本身住丹陽嘅市民都會嚟呢度食嘢㗎！
嘢食多到眼花撩亂，諗咗好耐終於買咗呢三樣！ 黑蒜鍋巴雞塊、大麥黑蒜麵包、同埋野莓馬卡龍雪糕~ 雖然啱啱先食完大蒜血腸肥大腸鍋好飽，但係呢三樣嘢太吸引，飽住都停唔到口。😋😋食太飽，覺得有啲攰添🤣
喺九景市場掃完街之後，就出發去玩滑翔傘啦！因為係喺山頂，無交通工具上去，只可以搭的士。由丹陽吧搭上去嘅話，費用固定咗係15,000won，大家要留意返啊！
行程四：Para 1st滑翔傘（패러 일번지）
地址：충북 단양군 가곡면 사평리 246-30
營業時間：8:00-19:00
電話：043-422-8190 （建議去之前先打電話預約）
其實韓國人去丹陽旅行都係為咗玩滑翔傘，朴寶劍拍韓國綜藝節目《兩天一夜》嘅時候都嚟過呢度玩滑翔傘！小編當日去嘅時候天氣好好， 所以決定去挑戰吓！
望住丹陽美麗嘅江山咁飛，真係一次好新鮮又驚心動魄嘅經歷！ 全程有專業教練旁住，所以唔使擔心，一場嚟到梗係要去挑戰啦，小編有畏高都成功！你哋都得㗎！😆
飛完之後，仲可以影返張認證相，唔好錯過啊！
行程五：CAFE SANN（카페 산）
地址： 충북 단양군 가곡면 두산길 196-86
營業時間：平日9:30 - 19:30（last order 19:00)；星期六、日或公眾假期 08:30 - 19:30 （last order 19:00)
喺滑翔傘場隔離嘅 CAFE SANN係丹陽最受歡迎嘅旅遊勝地之一。 喺呢度可以一邊嘆住咖啡同甜品，一邊欣賞靚景！ 藍色嘅天上，展開唔同顏色嘅滑翔傘，真係好壯觀。
大家玩過滑翔傘之後，都可以嚟呢度休息吓，欣賞吓風景！
喺滑翔傘村落返去丹陽邑好簡單，如果喺呢度玩滑翔傘嘅話，仲可以用佢哋接送服務。 只要同嗰度嘅工作人員講，佢哋就會車返大家落去，所以唔使擔心！
行程六：玫瑰隧道（장미 터널）
地址： 충북 단양군 단양읍 도전리
단양군
呢度係丹陽出名嘅江邊散步徑。 玫瑰6月開得最靚，嗰時嚟嘅話可以同盛開嘅玫瑰一齊漫步南漢江！ 好可惜小編5月初嚟， 所以睇唔到玫瑰😥
不過就算無玫瑰，玫瑰隧道嘅散步徑都好靚！ 呢度嘅人唔係好多，所以啱晒嚟散下心，享受吓大自然。推薦大家傍晚嚟呢度散步！
而且沿住玫瑰隧道咁行，就會見到油菜花！如果說大家係春天嘅時候嚟丹陽嘅話，可以嚟呢度欣賞油菜花田！真係超靚！
行程六：大蒜牛肉餅（다원）
地址：충북 단양군 단양읍 삼봉로 172
營業時間：平日 11:30 - 21:00 （15:30 - 17:30 Break Time ）、星期六 11:30 - 21:00 、星期日 11:30 - 20:00 (Break Time 15:30 - 17:30 不過週末有可能會變動）
呢間餐廳係玫瑰隧道正對面，係丹陽出名好食嘅餐廳之一。喺呢度可以一邊品嚐超好食嘅大蒜牛肉餅，一邊欣賞美景！ 望出窗外面，南漢江係咪好靚呢？
大蒜牛肉餅 + 冷麵套餐（마늘 떡갈비 + 냉면 세트 ）
20,000won (1人份，至少order2人份)
喺韓國好多時都會烤肉連冷麵一齊食！ 熱辣辣又juicy嘅肉，同涼浸浸嘅冷麵，真係好夾！ 雖然價錢有啲貴，但係食到咁好味嘅嘢，同睇到咁正嘅景，抵返~
最後以韓國傳統嘅米酒，為今次嘅旅程畫上句號。👏
食飽飽之後，小編就搭KTX返首爾啦！今次旅行，包埋玩滑翔傘嘅80,000won，每人大約洗咗160,000won(約HKD1109），真係幾抵玩！
小編喺呢度真係留低咗好多好美好嘅回憶！亦都好開心可以同大家分享！😊😊
大家又滿唔滿意今次丹陽嘅行程呢？不妨留言同小編討論吓～😍
如果有更多想知嘅內容，都可以隨時留言或者dm話俾我哋知：）
Instagram：creatrip.hk