Hello，大家好，我哋係由韓國人每日提供最新韓國旅行資訊嘅Creatrip。
如果大家本身係一個電視劇或電影迷，今日要同大家介紹嘅呢個木浦「詩畫村」就一定唔可以錯過，因為呢度唔少劇都係喺度取景！想知有邊套就要繼續睇落去啦！
木浦「詩畫村」介紹
地址：전남 목포시 서산동12-89
小Tips：由木浦站搭1號巴士，喺木浦水協站（목포수협）落車。
如果講到大家去首爾一定會去嘅村，大家可能最先會諗到梨大壁畫村，或者係北村韓屋村，但如果要提到木浦，咁就一定唔可以唔提呢個「詩畫村」，因為除咗會多遊客去之外，唔少韓國人都會去呢度打卡㗎！
第一步小編去到嘅就係呢個小型超市（연희네슈퍼），唔少人嚟度都會坐喺度打卡，就連電影《1987:逆權公民》都喺度取過景！
呢度仲有鋪頭係賣一啲90年代嘅小玩意，如果大家都鍾意嘅話，可以之後嚟等佢開鋪嘅時候買嚟玩。
呢度每一個角落都好似瞬間返番去以前90年代嘅氣氛咁，好適合打卡。
除咗《1987:逆權公民》喺度取景之外，喺上年先播出嘅《Do Do Sol Sol La La Sol》原來都嚟過呢度，如果大家有興趣都可以跟住指示牌去打卡。
由最底開始一直上樓梯直行會見到一間小型cafe，如果大家行到攰都可以坐喺度嘆返杯咖啡再慢慢行。
沿路行會一直見到呢啲好復古嘅公告欄，相當之有趣！
經過cafe之後，就會行到一個十字路口，總共有3條路俾大家揀，第一條（첫째）相對比較輕鬆啲，嗰度有一間好出名嘅cafe，第二條（둘째）係一條直路，行到最高可以望到詩畫村嘅每一個角落，第三條（셋째）係去電視劇嘅《Do Do Sol Sol La La Sol》拍攝地。
首先小編最先去嘅就係《Do Do Sol Sol La La Sol》拍攝地，因為而家仲有唔少居民住喺嗰度，所以大家行嘅時候一定要靜啲，唔好騷擾到佢哋。
呢條路相對比其他兩條會更攰，因為有超多樓梯，不過沿途可以見到牆上有唔少圖畫，慢慢行慢慢欣賞。
所有圖畫相對都比較兒童藝術風，所以有時望住都會令人心情放鬆啲。
不過因為真係太多樓梯，好易令人行到好攰，小編即刻同朋友改變計劃，轉第二條路線哈哈哈，如果有人挑戰成功記住要話俾小編聽！
之後小編行返去一開始嘅十字路山去第二條路線。
雖然一樣都係有好多樓梯，不過相對就比較輕鬆啲。
上到最頂，大家可以望到詩畫村嘅風景，同時仲可以睇到呢度係《Long Live the King》嘅拍攝地。
最後小編就行埋最後一條路，呢條係最輕鬆，而且唔少韓國夫妻都會揀嘅一條路，因為呢度係一條cafe街，而當中叫做눈의꽃嘅cafe係最受歡迎。
大家記唔記以前細個會玩嘅跳飛機呢？同時地下同牆上畫咗好多心型符號，大家記住喺度打返張卡！
呢間就係好多人嚟度都會去嘅cafe（카페눈의꽃），只睇外牆已經可以見到佢裝飾得好有feel，門口仲有兩隻泰迪熊，難怪咁多人嚟度都會想去打卡！
去完cafe之後，大家一定要行埋其他小角落，話唔定會搵到好多小驚喜！
嚟度詩畫村除咗可以感受到返番去90年代之外，同時仲可以搵度唔少藝術作品，小編覺得係非常值得去打卡！如果大家之後會去木浦，咁就要mark底去埋呢度啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
