丹陽「九景市場」介紹
丹陽「九景市場」介紹，呢度大把美食等住你嚟試，特別係鍾意食大蒜嘅你一定唔可以錯過！
Hello，大家好，我哋係由韓國人每日提供最新韓國旅行資訊嘅Creatrip。
唔知大家每次去韓國旅行，都鍾意去邊度搵好嘢食嘅呢？小編未喺韓國正式生活之前，每次嚟韓國都一定會去傳統市場，食佢哋最地道嘅美食！今次小編同朋友去到丹陽嘅「九景市場」，唔知呢度嘅美食同首爾嘅又會有咩唔同呢？
丹陽「九景市場」介紹
營業時間： 每日8:00 - 20:00 （不過每一間開鋪時間都唔一樣）
地址：충북 단양군 단양읍 도전5길31 도전리시장
小Tips：由丹陽站搭巴士（방곡-단양버스），喺도전2리 구경시장입구 （九景市場）落車，行2分鐘就會到。
唔知大家有冇聽過「丹陽八景」呢個字呢？佢係代表丹陽有8個著名景點，而第九個就係九景市場！好多人嚟度都一定唔會錯過行呢個傳統市場！
一入到嚟已經可以見到有唔少食鋪，每一間睇落都好吸引。
除咗食之外，呢度好多日常用品大家都可以嚟買得到。
生果、蔬菜擺放得嚟整齊，望落去都好新鮮～
呢度有賣各式各樣嘅美食，真係睇到令人流哂口水....
而家就等小編同大家介紹呢度有咩係必食啦！
1. 黑蒜麵包
地址： 충청북도 단양군 단양읍 도전5길 30
平時食蒜蓉麵包食就食得多，但黑蒜麵包大家又食過未呢？喺丹陽超出名蒜頭，而當中黑蒜係其中之一！
麵包外型做到好似一粒蒜頭咁，只睇外表已經相當可愛，一粒細細粒，食嘅時候都好方便。
細包裝（袋裝）：12粒 5,000won、大包裝（盒裝）：24粒 10,000won
當日小編同朋友先買咗細包裝嚟食，如果大家食完覺得好味，可以買大包裝（盒裝）返去做手信。
因為呢度係即叫即整，大家食到嘅時候仲會係熱辣辣，未食之前已經聞到好香蒜味，麵包超軟熟，而且入面嘅餡料除咗有黑蒜之外，仲有紅豆蓉，聽講係呢間鋪頭獨有嘅秘方！一開始大家食覺得可能會有少少苦味？不過慢慢食就會覺得好甜！
2. 黑蒜飯焦炒雞丁
地址： 충청북도 단양군 단양읍 도전4길 31-1
嚟度呢到除咗要食黑蒜麵包之外，飯焦炒雞丁亦係必食美食之一，好多人嚟度麵會買幾盒返去食！
佢出名程度係有唔少電視節目都有介紹過，就好似《兩天一夜》、《驚人的星期六》等。
tvN D ENT
小編本身就好鍾意睇《驚人的星期六》，所以當時節目一介紹，小編已經cap定圖，希望之後去丹陽可以食（而家終於俾小編等到啦 ）
老闆好貼心擺咗兩款口味出嚟俾大家試食，大家可以試啱再買。
左邊呢個係最原始嘅黑蒜味，將黑蒜同其他醬料攪勻一齊炒，所以食嘅時候會覺得甜啲。
右邊呢個相對會再黑蒜味多啲（雙重黑蒜口味），老闆將黑蒜壓碎，直接加入其他醬汁，所以顏色相對亦會較深色。
最後小編決定買雙重黑蒜口味（一盒18,000won），落完單之後大約要等20分鐘，大家可以喺等嘅期間周圍行下。
終於俾小編等到啦！一打開真係好香黑蒜味，不過可惜嘅係份量唔算好多，好快就會食哂。
炸雞丁同飯焦呢個配搭真係第一次見，飯焦好脆，雞粒夠滑，加上超香黑蒜味，如果同飯一齊食應該都會好夾！
3. 馬卡龍雪糕
地址：충청북도 단양군 단양읍 도전리 539
行到盡頭會見到每人都拎住一杯雪糕，身為吃貨小編又點可以錯過呢？
一支雪糕係3,000won，有好多款口味俾大家揀，而最後小編就揀咗野櫻莓口味（係丹陽特產）。
雪糕上面有2粒馬卡龍，同一個小熊公仔，係唔係好可愛呢？
野櫻莓好香，甜甜地好好食，好適合用嚟做飯後甜品，唔少小朋友都會買返杯嚟食
行完市場食完咁多好嘢食之後，出嚟會見到好多人玩緊跳傘。
之後再行前少少會見到有一個河流，望住一帶綠色嘅山景，真係令人好放鬆同舒服，食飽嚟散步就啱啦！
如果大家本身都鍾意行傳統市場，又鍾意食大蒜嘅朋友，呢個九景市場一定超適合你！
如果有更多想知嘅內容，都可以隨時留言或者dm話俾我哋知：）
Instagram：creatrip.hk