丹陽「Para 1st滑翔傘」介紹
丹陽「Para 1st滑翔傘」介紹，喺丹陽體驗一吓飛天嘅感覺！包你玩過一世難忘啊！
Hello，大家好，我哋係由韓國人每日提供最新韓國旅行資訊嘅Creatrip。
喺韓國有好多嘢玩，令到你旅程畢生難忘，今次小編就去到忠清北道嘅丹陽，嗰度係韓國玩滑翔傘嘅熱點地區，如果大家都有興趣玩，就要繼續睇落去啦！
丹陽「Para 1st滑翔傘」介紹
地址：충북 단양군 가곡면 사평리 246-30
營業時間：8:00-19:00
電話：043-422-8190 （建議去之前先打電話預約）
網址：para1.co.kr
小Tips： 喺首爾清涼里坐 KTX去到丹陽站，再搭的士，或者利用pick-up服務。
套餐 | 價錢 (KRW) |
普通 (노멀아트비행) | 平日： 80,000 星期六、日及假期： 85,000 |
刺激 (익스트림비행) | 120,000 |
雙人 (커플비행) | 130,000 |
特別 (스페셜비행) | 150,000 |
小編嚟到丹陽嘅時候，天氣超好，超適合玩滑翔傘嚟俯覽丹陽嘅景色。嚟玩滑翔傘之前，先打電話去Pareoilbeonji（패러일번지）預約，同埋一定要先check好天氣。如果太大風或者落雨，佢哋會取消活動，以確保安全。
有好多明星都嚟過玩滑翔傘，好似之前作為韓國綜藝節目《兩天一夜》嘉賓嘅朴寶劍，都話好多謝節目俾機會佢玩滑翔傘。
小編揀咗一間叫Para 1st （패러일번지）玩滑翔傘嘅舖頭。雖然小編去嘅時候係星期一，但都好多人等緊玩。附近仲有一間丹陽好出名嘅coffee shop，叫CAFE SANN。等緊玩嘅時候，可以去CAFE SANN嘆返杯咖啡，同欣賞下周圍嘅景色。
雖然可以喺佢地嘅網頁度預約，但係外國人通常都冇naver帳號，同唔熟識點用個系統，所以小編就幫大家親身試吓可唔可以直接去買飛啦～
小編大概中午嘅時候出發去CAFE SANN嗰邊體驗滑翔傘！搭的士上去啲話，只要同司機講Para 1st 嘅韓文名패러일번지 （發音：Pareoilbeonji），或者講話去CAFE SANN就可以啦！如果大家有預約到嘅話，佢哋會揸架車嚟接你上去。
因為冇巴士上去山頂，所以建議搭的士，收費固定係 15,000won（約HKD103）一程 ，最多可以坐4個人。上到去山頂，就會見到超迷人嘅丹陽景色，真係好興奮啊！
落車之後，就直接行去間舖頭，間舖頭正正喺CAFE SANN嘅後面。老闆俾咗張form小編填，填好晒之後就可以放啲個人物品去locker度，唯一可以跟身嘅就係手機。小編揀咗普通嘅plan（80,000won，約HKD556），呢度係小編搵咗咁多間最平嘅一間。
然後就換飛行服！件飛行服好大件，所以唔使除本身嘅衫都好易著上身，就算著住裙都唔驚。如果本身著涼鞋或者高踭鞋嘅話，就可以換嗰度嘅運動鞋，不過建議大家都係著自己嘅運動鞋去會好啲！
喺間舖嘅角落頭，會見到好多佢哋喺玩滑翔傘嘅證書同獎牌，望住即時覺得好安心，相信佢哋係專業嘅！
換好晒衫之後就可以行出嚟，show返張飛俾工作人員睇，佢就會安排你排隊等候！呢度真係受韓國人歡迎，好多人嚟前都有預約，小編都等咗成個鐘先有得玩。工作人員仲話果如果星期六、日嚟嘅話會更加多人！
小編望吓周圍，見到好多都係家長帶埋小朋友嚟玩，呢度只要過咗4歲就玩得！
等緊嘅同時，小編好忙咁影相同拍片，大家睇唔睇到背後嘅滑翔傘呢？就咁睇相都覺得好正！ 個plan包埋工作人員幫你用手機影相，所以唔使好唔好意思咁周圍問唔識嘅人得唔得閒幫你影大合照。
等咗差唔多一個鐘，終於輪到小編啦！孭住好輕嘅背囊，戴上頭盔同護膝，教練就會跟喺你後面，只要跟足教練嘅指示就可以啦！
最難嘅係由山跳落嚟！當個傘展開嘅時候，會拉你向後，嗰陣要保持冷靜同聽教練嘅指示 ，然後等自己預備好心情，鼓起勇氣就跳！小編當時又興奮又驚，係咁大叫。
但過咗一陣之後，望到周圍咁靚嘅風景，就完全都唔驚啦！望住個天、條河同座山，身處喺咁壯觀嘅景之下，即刻覺得自己好渺小。小編飛緊嘅時候，心情相當激動，因為終於克服到畏高症啦！
當你飛緊嘅時候，教練會俾部相機你揸住！因為COVID-19，成個飛行過程都要戴口罩。
網上嘅資料話飛行時間大約係5-10分鐘，但教練俾小編飛足15分鐘！喺天空中飛緊嘅時候，教練仲會同你傾計，等你放鬆啲。
之後就會慢慢咁降落到就近嘅河邊，記住要留心聽教練講嘅嘢，同提高對腳，先唔會喺降落嘅時候整傷。教練有20年滑翔傘嘅飛行經驗，所以降落得好好！
呢次真係一個好正、好特別嘅經驗，極力推薦俾所有嘅朋友仔！就算有畏高，一樣可以好enjoy！降落之後，會車你返去頭先等玩嘅山頂。途中就會幫你將相機入面嘅相傳過去你嘅手機度，啲相容量好大，所以要肯定自己部電話有足夠嘅memory（大概2GB）啊！如果真係唔夠位，都可以用email send俾自己。
當小編返到原先嘅地方之後，工作人員就幫小編影相，佢哋好細心咁影多好多張，影到滿意為止。影完之後就去俾錢啦！提提大家，呢度淨係收cash或者即時轉賬，唔用得卡。
又玩到滑翔傘，人生中好難得嘅體驗，仲影到咁多靚相同影片，80,000 won 真係好抵啊！
玩完仲可以去附近嘅CAFE SANN休息！只要玩完滑翔傘就可以獲得20% OFF coupon 添！
如果大家嚟丹陽玩，一定要將滑翔傘列入你嘅行程度啊！保證你畢生難忘啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk