丹陽「嶋潭三峰」、「石門」介紹
想暫時遠離煩囂，去一轉洗滌心靈之旅？去「嶋潭三峰」同「石門」就啱晒啦！
Hello，大家好，我哋係由韓國人每日提供最新韓國旅行資訊嘅Creatrip。
韓國唔係淨係得shopping㗎，仲有超靚嘅自然景色可以遊覽吓！今日小編就介紹「丹陽」呢個地方俾大家啦！丹陽係喺韓國忠清道東北部嘅一個小郡，同小白山相連，中間仲連住南漢江添！
出名景靚嘅丹陽，有八個好出名嘅自然景點，稱為「丹陽八景」，每年都吸引咗無數咁多遊客嚟睇大自然所創造出嚟嘅景觀。小編特別為大家揀咗其中兩個地方去，今日就同小編一齊去「嶋潭三峰」同「石門」睇下啦！
丹陽「嶋潭三峰」、「石門」介紹
嶋潭三峰
地址：충북 단양군 매포읍 삼봉로 644
開放時間：09:00 - 18:00
入場費：免費
小Tips：喺丹陽邑坐巴士（죽령-평동）搭5分鐘左右，喺도담삼봉（嶋潭三峰）落車就到啦。
落車嘅巴士站前面有個牌寫住，直行400m就係公眾停車場，再轉右就會見到通去嶋潭三峰嘅隧道！
穿過呢條隧道，眼前就係超廣闊嘅南漢江，行到最尾就見到嶋潭三峰啦！
韓國人氣綜藝節目《兩天一夜》同《Battle Trip》都嚟過呢度拍攝！睇返資料，原來朴寶劍同埋《兩天一夜》成員一齊嚟過嶋潭三峰旅行～
座立喺又清又藍嘅水上面嗰三個山峰就係嶋潭三峰啦！中間最大嘅山峰上仲有一座細細哋嘅六角亭，真係超靚。如果一大早就去嘅話，會有好多霧，令嶋潭三峰睇落更加有神秘感。
欣賞嶋潭三峰最靚嘅景就係呢個顏色超繽紛嘅花園，由岩石形成嘅山峰，配合埋細細朵嘅花，真係靚到唔知點形容啊！
花園嘅正中央就有個好啱影相嘅photo zone！呢度有一個相框，令後面嘅嶋潭三峰顯得更加壯觀！
大家仲可以坐喺photo zone，用後面嘅靚景做背景，自己獨照又好，同朋友、另一半一齊影都一樣咁靚！
石門
慢慢咁行完嶋潭三峰之後，小編同朋友就一齊出發去石門啦。石門同嶋潭三峰距離好近，遊客好多時都會一次過去晒呢兩個地方！
向住嶋潭三峰嘅左邊咁行，就會見到咁樣嘅梯級，旁邊個牌寫住由呢度去到石門來回需要20分鐘左右。
要去石門，就一定要跟住咁行上山！好似上面兩張圖咁，有泥路，又有木路。雖然唔係好斜，但係對於平時唔鍾意行山嘅人嚟講，可能會有啲難，小編仲要無著到運動鞋，所以行上去嘅時候有啲啲辛苦！
不過來回淨係需要20分鐘，條山路又好靚，空氣好清新，心情特別舒暢，所以大家都唔使咁擔心！
山路嘅盡頭就見到石門啦！聽講喺好耐之前，呢到係一個石灰洞，倒塌咗之後，剩低嘅洞頂就形成咗好似天橋咁嘅形狀！
由石門個窿度睇到嘅南漢江，倒影住天空嘅景色，係咪超靚呢？陽光照落嚟嘅時候都好靚，感覺就好似奇幻片入面嘅場景咁～
大家之後嚟欣賞完石門嘅祕景之後，記住影返張相留念啊！
黃布帆船
費用：青少年、小童 2000won (約HKD14) / 成人 3000won (約HKD21)
由石門落嚟之後，小編同朋友諗住搭船離開，嶋潭三峯同石門有三種船： 遊艇、快艇、同埋黃布帆船。
충청일보
黃布帆船係用木頭製成嘅細船，係朝鮮時代作為主要嘅運輸工具。喺其他地方好難搭到，所以小編就決定搭黃布帆船啦！
搭船當然要買飛啦，賣飛嘅地方就喺三峰故事館，而三峰故事館就係喺嶋潭三峰前面嘅花園正對面。
講多少少俾大家聽啦！故事館入面有關於嶋潭三峰嘅歷史同傳說，大家想知嘅話可以行埋故事館睇吓。買完飛之後，趁住出發之前仲有少少時間，就周圍行吓，影吓相啦！
黃布帆船嘅碼頭就係喺嶋潭三峰嘅左邊底下。
上船之後，第一時間梗係要著好救生衣啦！安全第一嘛！
由嶋潭三峰去到嶋潭里嘅碼頭，大約有400m，所以隻船會慢慢咁行，可以一路好優哉悠哉咁坐船，一路欣賞沿途嘅風景，見住慢慢接近嶋潭三峰，真係令人好興奮！
到咗江另一邊嘅嶋潭里碼頭，行到去可以觀賞到石門嘅位置，有300m左右！小編同朋友就落船慢慢行去欣賞吓石門。
左邊係一條好靚嘅散步小徑，右邊就係一條令人好有親切感嘅鄉村，行到最後就見到石門！同頭先近距離睇嘅石門唔一樣，喺另一面睇過去，真係覺得好神奇啊！
同頭先喺嶋潭三峰嘅photo zone一樣，呢邊都有個差唔多樣嘅柜柜，俾大家用石門做背景嚟影靚相～
享受完15分鐘嘅自由遊覽時間之後，今次嘅嶋潭三峰同石門嘅旅程就告一段落啦！雖然有啲唔捨得，但真係玩得好開心！經過今次嘅旅程，親身感受到點解「嶋潭三峰」同「石門」會咁受歡迎！喺其他地方睇唔到嘅景，體驗唔到嘅嘢，喺呢度親眼睇到，親身體驗到，真係超幸福啊！
如果大家想嚟一個暫時遠離煩囂，洗滌心靈之旅，嚟「嶋潭三峰」同「石門」就啱晒啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk