弘大「Randy's Donuts」介紹
冬甩控絕對唔可以錯過呢間「Randy's Donuts」店！而家唔使再飛濟州都可以食到啦！
Hello，大家好，我哋係由韓國人每日提供最新韓國旅行資訊嘅Creatrip。
唔知大家鍾唔鍾意食冬甩呢？如果鍾意，咁今日介紹嘅呢一間人氣冬甩店大家就真係唔可以錯過，原本只有去濟州先食到，喺今年年頭弘大延南洞終於開咗分店！雖然已經開咗一段時間，但到而家都仲係每日大排長龍，到底佢有咩咁吸引呢？
延南洞「Randy's Donuts」介紹
랜디스도넛 연남점
- 地址：서울 마포구 동교로 247
- 營業時間：11:00 - 21:00
弘大Randy's Donuts雖然已經開咗幕一段時間，但佢嘅人氣從來都冇減少到，每日都係有好多人喺度排隊，記得一開始喺未開鋪前，已經有唔少人去等，真係唔講得笑，而喺門口隔離，大家仲可以見到有個超大粒冬甩等住大家去打卡。
呢度有好多款冬甩俾大家揀，不過主要係分為Classic到Rremium，價錢由₩2,200至₩3,300（個）不等。雖然唔算好平，但都仲有咁多人買一定有佢嘅秘密！當然小編都要試吓到底佢有幾咁巴閉！
Randy's Donuts係美國加利福尼亞成立嘅冬甩品牌，由1952年到而家，相信如果之前有飛過美國玩嘅朋友應該都唔會陌生，70年以嚟一直係YELF上排名最高嘅冬甩店之一。
一開始Randy's Donuts進軍韓國嘅時候，原本只係得濟州有直營店，後嚟喺大邱東城路開咗分店，到而家終於喺弘大延南洞開咗分店啦！
Randy's Donuts係11:00開門，小編當日諗住早啲去打卡，點知早30分鐘到都已經有唔少人喺度等緊，人氣相當之高。喺開鋪10分鐘之前，職員就會出嚟重新整理隊伍，然後11:00準時迎接客人。
入到去大家可以先睇清menu，之後揀幾多個，之後再揀要咩味，最後先再俾錢。如果想飲咖啡或者喺鋪頭入面食嘅朋友，就可以上去二樓搵位坐同食。
一早可以望到咁多冬甩真係令人好幸福 呢度嘅冬甩款式真係多到數唔曬，小編見到唔少人比起只係買一兩個，佢哋更加係會一次過買好幾盒，之後再分俾朋友一齊食。
根據唔同款式、口味、大細唔同，價格亦都會唔一樣，大家嚟到真係要小心睇住銀包.......真係一個唔小心...忍唔住就會買好多.....
小編最後係買細盒（可以裝3至4個），大家可以揀唔同口味，之後再上2樓到慢慢食。
Randy's Donuts二樓到四樓係BONA BASIUM賣咖啡嘅地方，不過二樓空間唔算好大，所以小編買完咖啡就上咗三樓。
Randy's Donuts飲料菜單
三樓好闊落而且仲有好多位，大家可以揀坐窗邊位仲可以望到延南洞嘅街道。
小編最後叫咗Glazed Raised冬甩（原味糖霜）、Roasted Coconut Raised冬甩、White Ganache Raised冬甩以及S'mores Raised冬甩。飲品方面叫咗延南BLEND（₩4,500），美式咖啡配冬甩真係冇得輸
Glazed Raised Donut ₩2,200
Glazed Raised係呢度最出名而且最經典嘅冬甩，聽講喺2020年就賣出167,102個，麵包本身好軟，味道好濃郁，但就甜咗少少。
Roasted Coconut Raised Donut ₩2,900
呢個冬甩上面灑滿椰子粉，外面相當酥脆，但只要食就會覺得好軟熟，有雙重口感。
White Ganache Raised Donut ₩3,300
呢款係Randy's Donuts嘅Best Menu之一，上面有黑、白朱古力碎，睇落就好似一個小蛋糕咁，味道都幾唔錯。
S'mores Raised Donut ₩3,300
最後小編會揀呢一個係因為覺得佢好特別，上面加咗買粒棉花糖，同朱古力嘅搭配，又點會唔好食呢？
如果係冬甩控嘅你，之後去開弘大延南洞就千祈唔好錯過啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk