Hello，大家好，我哋係由韓國人每日提供最新韓國旅行資訊嘅Creatrip。
因為疫情影響，如果唔想留喺屋企，有唔少人都選擇去行山，今日小編想大家介紹一個最近韓國人好鍾意放假嘅時候去行嘅山，到底佢喺邊度呢？
只睇相唔知大家認唔認得呢度係邊呢？
睇完Run BTS之後應該認得啦？喺呢集入面，RM同V作為懲罰需要喺寒冷嘅冬天走上山頂，佢哋喺上面見到嘅風景真係令人難忘。即使而家過咗幾年，小編都好想去欣賞吓峨嵯山嘅風景。今日就等小編嚟大家上峨嵯山，順便介紹吓行完山有咩好食啦！
峨嵯山（아차산）同高句麗亭（고구려정）
地址：경기도 구리시 교문1동
小Tips：峨嵯山站2號出口
其實有好多方法都可以上到峨嵯山，但今日就同大家介紹小編搵到去高句麗亭最簡單嘅方法啦。
由峨嵯山二號出口出嚟，轉左再行一個街口到Olive Young。
一直行落去再轉右就會見到一間賣紫菜包飯嘅鋪頭，可以見到唔少人都喺到排隊買紫菜包飯先再去行山。
呢度嘅紫菜包飯係3,000won一條，雖然有啲小貴，但叫做買小小嘢先上山，咁都唔算太差。
見到橙色招牌嘅紫菜包飯天國（김밥천국）嘅十字路口再左轉。
再行兩個街口就會見到一個十字路口，之後稍微向右行，再行上藥房對角條路。
當見到對面間小學，就代表就快到啦！
轉右之後一直行，可能感覺上條路好複雜，呢個時候你只要跟住啲帶住行山裝備嘅人就得啦，小編都係咁樣做。
之後就會見到入口啦！
喺入口左邊你會見到上圖嘅資訊中心，入面會有地圖等等嘅資料。
喺呢度你可以見到首爾主要環山路（둘레길）嘅地圖，如果想要中文、英文或者日文嘅地圖，亦可以問嗰度嘅工作人員攞。
喺中心入面，亦可以免費拎到可以扱印仔嘅小冊子。
上面啲印仔可以喺資訊中心入面介紹嘅首爾其他環山路扱到，如果你鐘意行山嘅話，收集呢啲印仔都係件幾有趣嘅事！
度嘅印仔係「龍馬-峨嵯山 Course 3」。
沿住小徑就會見到路牌，我哋嘅目標係高句麗亭（고구려정）！
走去小徑嘅左邊，會見到呢個入口，行入去就會見到下圖嘅石路。不過因為呢條路好跣，所以除非係著住爬山鞋，唔係都唔推薦大家行呢邊。
而小徑嘅右邊，你就可以發現呢條路，係上山最簡單嘅路線。
一直跟住啲路牌！
當你見到26號消防栓箱，就可以從主徑行入左邊嘅小徑。
小編由地鐵站上高句麗亭大約用咗40分鐘左右！
RM同V就喺坐喺呢個亭前面飲前一日Jin為佢哋準備嘅熱湯啦。
小編去嗰日天氣真係好好！
喺個亭前面可以見到好多大石，可以坐喺度欣賞風景同影相。喺度仲可以見到123層樓嘅樂天世界搭添！小編嘗試搵個同RM同V一樣嘅角度影相。
只係行30分鐘山就可以喺首爾欣賞到咁嘅景，真係好值得！因為上峨嵯山嘅路線算簡單，所以都可以見到好多人帶埋一家大細或者狗仔上嚟。
不論你係A.R.M.Y想去踩點定只係鐘意行山，峨嵯山都係個好好嘅地方。因為上高句麗亭嘅路唔難，除非係想行嗰條好跣嘅石路上山頂啦，唔係嘅話只係着普通波鞋就ok！
行完山可以食嘅嘢
小編問過好多韓國人之後，最多人推薦去食呢間辣炒年糕！當你行番去峨嵯山途中，你會喺近1號出口見到呢間신토불이 떡볶이（Shintoburi Tteokbokki），條隊仲好長添！
當時店員同小編講話等位要40分鐘至一個鐘，所以小編就決定賣外賣走啦。
外賣嘅攤位就喺對面，只係3分鐘就可以買完走人! 小編買咗個14,000won嘅三人份辣炒年糕，入面包括三人份嘅年糕、三隻餃子、三舊魚糕、三隻烚蛋同二條熱狗。
而신토불이 떡볶이行幾分鐘就會見到순금이 떡볶이（Soongeumi Tteokbokki），呢度最出名係紫蘇葉辣炒年糕（깻잎 떡볶이），所以如果鐘意紫蘇葉嘅話都可以試吓呢度！
小編帶住年糕同零食，由峨嵯山站搭咗15分鐘的士去咗纛島漢江公園（大概6,000won）。
以上就係關於峨嵯山嘅介紹啦，有咩意見都可以留言話我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
