Hello，大家好，我哋係由韓國人每日提供最新韓國旅行資訊嘅Creatrip。
對於香港人嚟講，三大係港大、中大同科大，但大家又知唔知韓國都有三大呢？韓國嘅三大分別係首爾大學（서울대학교）、高麗大學（고려대학교）同延世大學（연세대학교），韓國人會稱呢三大為「SKY」，係佢哋心目中韓國最頂尖嘅大學。而喺好多歌手idol會讀嘅「實用音樂系（실용음악과）」都同樣有排名頭三嘅大學，分別係首爾藝術大學（서울예술대학교）、湖原大學（호원대학교）同東亞放送藝術大學（동아방송예술대학교），人稱實用音樂系嘅SKY。
今日就等小編集同大家介紹呢三大實音系出身嘅9位實力派idol啦！
9位實用音樂系SKY出身嘅idol
前BESTie成員 有智（首爾藝術大學）
daum
前EXID同BESTie成員有智喺idol時期已經係一位出名唱功勁嘅主唱，擁有強而有力嘅聲色嘅佢係SKY之一嘅首爾藝術大學實用音樂系嘅學生。佢入大學嘅故事同樣好精彩，聽聞佢喺首爾藝術大學、湖原大學、東亞放送藝術大學、仲有同德女子大學（동덕여자대학교）四間以實用音樂系為名嘅大學都收到合格offer，最後先揀入讀首爾藝術大學，係名副其實嘅實力派！
前Hello Venus成員 娥羅（首爾藝術大學）
아시아경제
只係以Hello Venus成員活動咗兩年左右嘅娥羅，雖然係主唱，但唔多機會可以展現到歌唱實力，估唔到佢竟然都係首爾藝術大學實用音樂系嘅同門！2014年退出Hello Venus嘅娥羅，之後以演員出道而且繼續活動，2019年更喺順利喺首爾藝術大學畢業添！不過就唔多見佢有咩演藝活動啦。
BTOB 昌燮 & 炫植（湖原大學）
實力派男團BTOB嘅「湖原Line」昌燮同炫植嘅湖原大學合格故事都一樣好精彩。據稱2011年嘅時候，係湖原大學實用音樂系歴嚟競爭率最高嘅一屆，當時3000人先收得5個，而兩男三女嘅合格學生當中嘅兩男嘅就係BTOB嘅昌燮同炫植啦！當時佢哋雖然都係練習生而互相認識，但都冇同對方講自己打算去報湖原大學，兩個人係到合格之後先發現大家變咗同學，真係夠哂戲劇性。不過唔少網民都話，最勁都唔係BTOB有成一半以上都係實音系出身（如果加埋前成員鎰勳嘅話 7人有5個都係），之但係兩個湖原學生都唔係主唱，佢哋上面竟都仲有一個恩光🤣！咁多成員都係實音系都好難唔係實力派！
金在奐（湖原大學）
더위키
Wanna One出身嘅金在奐亦都係2016年入學嘅湖原大學實音系學生，當年兩次招生嘅競爭率同樣好高，都係二百幾人先收一個，但金在奐就以實力成功合格！最近金在奐終於喺BTOB主持嘅Naver Now電台 《BTOB的四拍子》見到佢嘅大學同門師兄昌燮啦！佢話雖然冇喺學校見過昌燮，但出道前就有試過好似睇明星公演咁坐埋一邊見過炫植喺學校同人合奏，雖然佢唔知點解好搞笑咁講錯自己係2017年入學🤣...
鄭世雲（湖原大學）
매일일보
一樣係湖原大學出身嘅仲有鄭世雲添！佢同樣喺2016年通過競爭好勁嘅面試成功同金在奐做咗同學，兩個人之後仲要咁啱一齊參加《Produce 101》第二季添，粉絲亦都稱佢哋為「湖原s」（點解湖原大生嘅合格故事都咁戲劇性咁🤣）不過世雲好可惜喺2019年嗰時因為難以兼顧學業同工作而選擇退學，雖然而家唔係湖原大生，但只係成功通過面試就已經證明到鄭世雲係個實力派歌手啦!
有唔少BTOB同金在奐fans都等咗呢4個同門師兄弟嘅合作舞台好幾年（包括小編），所以早排昌燮同在奐喺電台見面令小編好開心哈哈，雖然而家世雲退咗學，但都希望日後「湖原line」同「湖原s」有機會合作啊。
SF9 在允 （東亞放送藝術大學）
톱스타뉴스
SF9嘅在允就係東亞放送藝術大學嘅學生啦，雖然佢嘅定位喺副唱，但佢竟然係實音系SKY出身嘅學生，證明佢喺音樂方面嘅出眾實力！不過佢上面同樣有出身於慶熙大學言論情報系嘅主唱仁誠...點解實音系SKY出身上面都仲可以有再勁啲嘅主唱？
ONEWE 勇訓 （東亞放送藝術大學）
TV DAILY
ONEUS嘅兄弟組合ONEWE嘅主唱勇訓都係東亞放送藝術大學實用音樂系出身嘅idol！2015年入學嘅勇訓聽講足足重考咗兩次先好辛苦咁入到，但最後估計係因為好難兼顧兩邊而退咗學ㅠㅠ 真係好可惜..不過東亞放送藝術大學+RBW出身就同樣係實力保證！
前The Ark成員 鄭有珍（東亞放送藝術大學）
TV DAILY
曾經喺2015年以The Ark出道嘅主唱鄭有珍都係東亞放送藝術大學實音系同門，當年The Ark出道冇耐有珍就因為聲帶疾病而停止活動，最後The Ark好可惜咁喺2016年解散。不過後來有珍繼續練習唱歌，最後喺2018年順利入讀東亞放送藝術大學，可見佢突出嘅歌唱實力！（其實當初The Ark出道歌The Light就已經好好聽ㅠㅠ）
以上就係9個實用音樂系SKY出身嘅實力派idol啦，其實總有有好多同校唔同系，或者唔同校但都係實用音樂系嘅而不能盡錄，如果有邊個idol小編冇提到嘅話，歡迎留言分享俾我哋啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
