河南「House Plant cafe 」介紹
Cafe入面竟然賣家俬？位於京畿道河南嘅特色cafe！
Hello，大家好，我哋係由韓國人每日提供最新韓國旅行資訊嘅Creatrip。
河南係位置韓國京畿道嘅一個小城市，距離首爾大約一個鐘車程。河南四周都充滿好靚嘅大自然風景，令你可以暫時遠離首爾嘅繁囂，仲有啲特別嘅cafe可以俾你享受難得嘅寧靜添！今日就等小編同大家介紹位於河南嘅一間充滿郊外風情嘅家俬倉庫式cafe—House Plant啦！
House Plant（하우스 플랜트）
地址：경기도 하남시 덕풍북로6번길 14
營業時間：10:00-22:00（假期或周末記得去ig check佢哋開唔開！）
Instagram: houseplant.official
小Tips：由河南市廳站（하남시청역）1號出口出嚟，直行5分鐘左右就會見到有個巴士站，喺嗰度坐30號巴士，然後搭一個站喺Hansol Sol Park Apartment（한솔솔파크아파트）落車，再行1分鐘就會見到cafe喺你右邊啦。
就咁經過門口嘅時候，或者會覺得呢間會係一間殘舊嘅cafe，但入到去絕對會令你驚喜！
一入到去cafe，就會feel到呢間cafe好溫馨嘅氣氛，天氣好嘅時候，仲可以坐喺戶外，盡情享受大自然。小編去嘅時候天氣啱啱好，唔會太凍或者太熱，非常舒服。再行入啲仲會見到一面寫有「House Plant」嘅紅磚牆，呢度係一個受歡迎嘅打卡位，大家記得唔好錯過啊。
House Plant分為三大區域，室內、家俬倉庫同室外。行入室內嘅空間就會見到可以落單嘅地方，呢個區域以木製家俬為主，周圍放滿好多舒服嘅梳化，有種樸實嘅復古感覺，而且好闊落有好多座位，所以你唔使怕會冇位坐。
呢邊仲有個落地玻璃添，如果你覺得戶外太曬嘅話，亦都可以揀坐喺呢度舒服咁享受日光。
室內空間同家俬倉庫連接一齊，你可以揀室內行入去又得，室外行入去都得。
家俬倉庫空間嘅門口好有郊外鄉村味，未行入去就已經預計到入面會有種經典倉庫嘅感覺。
呢邊嘅倉庫空間都係以木製家俬為主，同樣有好多位，鐘意坐邊都得！
入面嘅家俬如果有興趣仲可以買走㗎！詳細可以睇佢哋嘅網站Rustic Furniture。
佢哋除咗賣枱凳，仲賣木製鏡、吊燈同門添，非常推薦需要樸素木製家俬嘅人嚟呢度！而且呢度有自然嘅日光，就算只係坐喺度休息都好舒服。
除咗室內空間之外，佢哋仲有室外嘅座位，天氣好嘅時候坐喺呢度飲住咖啡同食住甜品真係好嘆，呢度靜靜地冇咩人，小編同朋友足足喺度坐咗幾個鐘！
呢度亦係第二個你唔可以錯過嘅打卡位！喺呢條兩邊都係紅磚牆嘅巷，可以影到好靚又有藝術感嘅相！小編周圍參觀行到攰之後，就決定去點咖啡同甜品嚟食啦。
House Plant嘅menu有咖啡，不含咖啡飲品同茶，當中招牌飲品係bomb bee同cream hot chocolate，價錢由￦5,000至￦7,000不等。
至於甜品一共有5種蛋糕可以選擇，蘿蔔蛋糕、蕃薯蛋糕、蘋果芝士蛋糕、伯爵茶雪芳蛋糕同朱古力慕絲蛋糕。小編覺得呢度啲蛋糕比其他地方都貴啲，因為都超過￦8,000，除咗蛋糕都仲有忌廉士多啤梨三文治，炒蛋三文治同牛角包三文治。
因為全部都睇落好吸引，小編揀咗好耐先落到單。最後小編點咗招牌飲品bomb bee，士多啤梨鮮奶同蕃薯蛋糕！
Bomb Bee ₩7,000
Bomb bee係佢哋嘅招牌之一，係一杯加入咗忌廉嘅咖啡，上面嘅花瓣仲帶啲果味，要記得攪勻咗再飲啊！雖然有忌廉，但咖啡嘅苦味中和咗佢，所以入口唔會太甜，小編非常推薦俾鐘意飲咖啡嘅人!
士多啤梨鮮奶 ₩7,000
唔飲咖啡嘅朋友可以試吓呢杯士多啤梨鮮奶，入面加入咗新鮮嘅牛奶，士多啤梨果醬同奶泡，攪勻後再飲真係好正！好有士多啤梨味之餘又唔會過甜！
蕃薯蛋糕 ₩8,500
呢度最受歡迎嘅蛋糕其實係朱古力慕絲蛋糕，但小編揀咗蕃薯蛋糕。上面層忌廉好滑又好味，下層嘅係好甜嘅蛋糕，鐘意食蕃薯嘅朋友一定要試吓！好食到不知不覺就食清光哈哈。
佢哋有出售好得意嘅細罐裝冷萃咖啡，鐘意飲冷萃咖啡嘅朋友，可以買嚟試吓！
除咗罐裝嘅冷萃咖啡，佢哋仲賣咖啡豆同香薰添！
以上就係關於河南cafe—House Plant嘅介紹啦！之後如果有機會去京畿道玩，非常推薦大家去吓呢間cafe！如果有其他cafe想我哋分享嘅話，歡迎留言話我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk