東大門「飾品零件批發商場」介紹
想整返一條獨一無二嘅首飾？咁配件喺韓國邊度有得買？一齊同小編去東大門飾品零件批發商場睇吓啦！
Hello，大家好，我哋係由韓國人每日提供最新韓國旅行資訊嘅Creatrip。
相信大家都知東大門係一個有好多批發市場嘅地方，無論係衫、褲、書等大家都可以喺度搵到同買到，不過大家又知唔知呢度仲有一個「飾品零件」批發區呢？大家喺呢度可以用超平嘅價錢買到唔同款式嘅材料，製作出屬於你嘅首飾！如果想知喺邊度就要繼續睇落去啦！
東大門飾品零件市場
동대문부자재시장（輔資財市場）
- 地址：서울 종로구 종로 266 A종 5F
- 營業時間：星期一至星期六09:30至19:00（16:00後陸續有鋪頭會閂門）
- 交通：東大門站（동대문역）9號出口，行到去東大門綜合市場（동대문종합시장）A棟，上去5樓就會到。
由東大門站9號出口出嚟之後，可以直接見到「東大門綜合市場」嘅入口，入到去之後沿住地上紅色指標行，上5樓就可以去到飾品零件區。
因為呢度都幾大，每一間都有啲似好容易會蕩失路，不過大家可以記住每一間舖都有佢哋嘅招牌同Number。
小編好推薦大家嚟之前，可以先喺IG搵#부자재상가、#부자재等Hashtag，可以睇吓有冇邊一間舖頭係屬於自己嘅風格，之後嚟可以即刻搵到目標，當然大家亦可以嚟到慢慢行，或者拎住相問吓舖頭有冇類似嘅款式。
呢度大部份嘅飾品配件都好親民，好易令人忍唔住一買就買好多。
除咗零件之外，呢度亦都有唔少已經做好咗嘅飾物，如果睇啱大家都可以直接買。
提提大家呢度唔係每一間鋪頭都俾影相，如果大家真係想影，最好先問吓老闆，如果唔係偷影會好冇禮貌
每一件配飾零件價錢大約係₩200至₩2,000左右，價錢一啲都唔貴，唔少韓妹都會嚟到揀自己鍾意嘅配件，整出獨一無二嘅飾物。
小編最後都忍唔住買咗啲嚟整耳機盒，大家又估唔估到以上材料用咗幾錢呢？答案係9,800，真係相當之抵！
呢度好多間舖頭都只係接受現金，或者係韓國銀行轉賬，如果想碌卡嘅朋友，最好都係提前撳定現金。
唔知大家之後嚟韓國，又會唔會想去行吓呢？話唔定大家可以喺度尋到好多寶，再整一個獨一無二嘅飾物啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk