韓國無人火車站
呢啲出現喺mv同電影入面嘅火車站究竟喺邊？5個好值得去打卡嘅復古火車站！
Hello，大家好，我哋係由韓國人每日提供最新韓國旅行資訊嘅Creatrip。
因為其他交通工具嘅普及，一啲冇人看守嘅車站已經被遺忘或者唔再運作而變成廢站（폐역），不過呢啲車站都好有歷史價值，當中好多都變成咗觀光景點，亦出現喺唔同影視作品入面添。今日就等小編同大家介紹吓呢啲無人車站啦！
韓國無人火車站
花本站（화본역）
- 地址：慶尚北道軍威郡山城面花本里1224-1 （경상북도 군위군 산성면 화본리 1224-1）
花本站位於慶尚北道一個叫軍威嘅地方，花本站由日殖時期嘅1938年開始投入服務，雖然而家仲係運作緊，不過就只係得「無窮花號」列車一日喺度停六次車，所以每日都只係得好少乘客會經過呢度。啡色同粉紅色嘅配搭真係顯到個車站更可愛，係一個打卡好地方！
呢個車站嘅復古風外觀更加令佢成為2010年「韓國最靚嘅無人車站」，吸引好多人去朝聖。車站內部待機室嘅位置展示咗花本站昔日嘅樣貌同以前用過嘅物品，俾遊客參觀同了解車站嘅歷史。
花本站第二個賣點就係呢個水塔啦，聽聞呢種水塔係蒸氣火車年代用嚟供水俾火車用嘅，所以而家已經冇咩地方有呢種水塔啦。
2021年2月底播出嘅節目「孫賢周的簡易車站（손현주의 간이역）」介紹嘅第一個車站就正正花本站啦！
九屯站（구둔역）
- 地址：京畿道楊平郡砥平面九屯站街 3 （경기도 양평군 지평면 구둔역길 3）
位於京畿道楊平嘅九屯站由1940年開始工作，但而家已經變成廢站。
呢度唔會再有列車經過，所以可以自由咁喺路軌上面散步！
而家九屯站已經變成一個好出名嘅景點，所以有長凳等等嘅設施等你可以去嗰度影人生照（인생샷）！
因為電影「初戀築跡101」曾經喺呢個車站取過景而令佢變得更出名，吸引好多人學主角一樣喺路軌上面影相。
IU亦都喺到影過《花書籤2》嘅專輯相添！
九屯站周圍有好多自然景色，尤其係侯車室附近嘅銀杏樹喺秋季嘅時候會特別靚。
（舊）書道站（(구)서도역）
- 地址：全羅北道南原市巳梅面書道街 32（전라북도 남원시 사매면 서도길 32）
呢個位於全羅北道嘅無人車站係日殖時期建造嘅車站，好有日本古代木製建築物嘅特色，不過而家已經變咗廢站啦。
呢度同樣係個著名嘅旅遊景點，周圍有管理得好好嘅自然環境。
路軌兩旁嘅樹木形成好靚嘅「樹隧道」，無論咩角度都可以影到靚相。
書道站亦係韓劇《陽光先生》嘅拍攝地添！
臨陂站（임피역）
- 地址：全羅北道群山市臨陂面書院石谷路37（전라북도 군산시 임피면 서원석곡로 37）
臨陂站係位於全羅北道群山市嘅無人車站，至今雖然已經唔再服務，不過仍然會有列車經過，所以只可以參觀車站，唔可以走落軌道。
聽聞呢度係日殖時間專門用嚟送米去日本嘅車站之一，建造於1912年嘅臨陂站，據聞仲係韓國第二古老嘅車站添。
淺藍色嘅外牆同鑽石型嘅屋頂充滿西洋風格，就算而家睇都係一個設計好新潮嘅車站！正正係呢種融合日本同西方風格嘅設計，令佢嘅歷史價值受到認證而被登錄成為韓國第208號文化財產。
車站內部保留咗以前嘅樣貌，令嚟到嘅人可以想像到當時呢個車站營運嘅時候係點嘅情景。
日迎站（일영역）
- 地址：京畿道楊州市長興面三上里291-3（경기도 양주시 장흥면 삼상리 291-3）
最後一個都係一個而家已經唔再服務嘅車站，而且相信只要係A.R.M.Y都會認得呢個車站。
因為BTS《春日》MV嘅第一個場景就係喺日迎站取景啦！呢個站雖然係2004年終止咗服務，但預計會喺2023年重新營運！
日迎站停止服務嘅時候就預咗會重新開番，所以呢個站嘅狀態保存得好好，有種復古嘅感覺。而家可以自由出入呢個車站，但唔肯定2023年重啟之後可唔可以咁做，所以建議大家2023年之前嚟日迎站打卡啦！
韓國最近好流行復古，唔知大家喺疫情過後有冇興趣嚟呢啲復古嘅無人車站參觀吓呢？大家最想去嘅又係邊個車站？歡迎留言同我哋分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
