韓國元祖咖啡廳茶館介紹
韓國茶館文化同有65年歷史嘅學林茶館介紹，韓國第一間咖啡廳喺100年前就有？
Hello，大家好，我哋係由韓國人提供最新韓國旅行資訊嘅Creatrip。
最近因爲復古風興起，而令到茶館再次受到關注。 最近BTS都喺乙支茶館拍攝 2021 年Season Greeting，一度成爲話題，今日就同大家介紹韓國以前嘅茶館同茶館文化，仲會介紹一間運營咗65年嘅茶館。
茶館文化嘅開始
茶館呢個詞係由漢字茶同韓文「房」合成嘅單詞，不過呢啲地方唔單止係賣茶，仲包括咗各種咖啡同飲品。西式咖啡喺韓國受歡迎之前，曾經引領過韓國嘅茶文化，茶館可以話係韓國咖啡店嘅始祖。
한겨레
茶館喺韓國首次出現大概喺1920年代左右，嗰時亦都係日本帝國主義強佔時期，當時好多茶館都係集中喺明洞大街同鐘路大街。聽講20世紀50年代中期，單單淨係明洞就有50幾日間茶館。
而亦都聽講當時韓國嘅比較貧窮嘅藝術家都會聚集喺茶館，討論藝術同寫作，所以可以話多數嘅韓國文學作品都係喺呢度誕生。出版紀念會、詩朗誦會、音樂鑑賞會等文化活動都係喺茶館舉行。亦即係話由1920年到1950年代嘅茶館就係韓國嘅精英藝術聖地。
茶館全盛期
경향신문
1960年代到1980年代，韓國男女老少都鍾意茶館文化嘅時代，係呢個時期唔單只係精英知識分子同藝術家，年輕人同老人家都會經常去茶館，所以呢度就轉變成一個新一代嘅文化空間同熱門場所。
웰빙뉴스
喺當時除咗茶館之外，幾乎冇其他文化設施可以好易咁去到，所以所有人都會選擇去茶館，精英知識分子嘅討論場地、大學生聚會同相親場所、約會場所、中老年人嘅休息場所，全部都係喺茶館入面進行。
유튜브 ebs culture
而且因爲嗰時冇手機，所以約定時間同地點係好重要，因為有啲咩差錯嘅話，咁就會搵唔到對方，正因為係咁所以好多人都會用茶館嚟做約定地方，先嚟嘅人就可以喺茶館入面邊飲邊等，同時茶館個名本身就有「約定茶館」之稱。
국제신문
雖然入面可以變飲嘢邊傾偈，同而家嘅cafe好相似，不過茶館更加接近係一個文化空間。
pet paper
特別係呢個時期，出現咗可以聽音樂嘅音樂茶飲，所以變得更加流行，而家只要有手機就可以好輕鬆咁聽音樂，不過當時嘅韓國人係好難有咁嘅機會，所以佢哋為咗聽音樂就會去音樂茶館。
경향 신문
音樂茶館嘅一角仲會設置玻璃窗嘅音樂盒，入面仲有音樂茶館DJ，聽講當時嘅音樂茶館DJ係當地偶像級，相當受歡迎同有人氣，喺紙上面寫故事同申請曲的話，音樂茶館嘅DJ就會播申請曲嘅音樂。
茶館菜單
유튜브 msg
同而家cafe賣嘅濃縮咖啡唔同，茶館當時係賣即溶咖啡。
mbc 강원 영동
茶館賣嘅咖啡就係用呢啲速溶咖啡粉整，咖啡粉、奶油、白糖嘅比例要調整得好好，因爲每個人嘅口味都唔同，所以會按照2:2或者2:2:3嘅比例製作！咁就係最完美，最符合大眾嘅口味。
雙花茶
雙花茶係將黃芪、桂皮、甘草等藥材放入熱水之後，再落大棗或者松子，再落蛋黃飲用嘅中草茶。
因爲雙花茶係用熱水沖，當蛋黃稍微熟透嘅時候，就可以一啖食咗個蛋黃，之後可以慢慢享受雙花茶，聽講呢款雙花茶對緩解疲勞同溫暖身體係有好大嘅效果！
威士忌茶
威士忌茶係威士忌同紅茶混合飲嘅酒類飲料，因爲威士忌嘅價格太貴，所以就喺紅茶入面加威士忌之後賣。
消失咗嘅茶館
유튜브 14f
茶館隨住90年代咖啡自動販賣機變得越嚟越大衆化，同埋賣濃縮咖啡嘅咖啡廳誕生而逐漸消失。再加上1999年梨大開咗星巴克1號店，咖啡外賣文化開始流行，茶館文化就漸漸消失，亦都因為係咁茶館變成咗非法性交易場所。
茶館嘅女老闆叫「madam」，女服務員叫「lege」（lady，當時韓國發音），當時佢哋嘅代表形象就係騎住電單車喺保溫水樽入面裝咖啡送咖啡。
當佢哋送完咖啡之後，就會入屋同客人傾偈。
呢度變質成爲性交易場所，仲可以追加費用進行性交易，而家都仲有好多係打住茶館之名，嚟進行非法性交易地場所。
而家嘅茶館
韓國都仲有少數保留住茶館文化嘅地方。
最近BTS喺乙支路運營咗近40年嘅乙支茶館拍攝2021年嘅《Season's Greetings》，小編仲親自拜訪咗由1956年開始營運嘅學林茶館，已經有65年歷史。
學林茶館
- 地址：서울특별시 종로구 명륜4가 대학로 119
- 營業時間：每日 10:00-23:00
由惠化站3號出口出嚟，行一陣就會發現到2樓嘅學林茶館，呢間茶館係大學路上面歷史最悠久嘅舖頭，亦都係全韓國第三間歷史最悠久嘅舖頭。呢度係韓國衆多文學人、音樂人、演員等鍾意嘅地方，亦都係主導韓國民主化運動嘅大學生成日會去嘅地方。
電視劇《來自星星的你》入面嘅都敏俊（金秀賢）都有喺呢度拍過唔少場景。
推開1樓嘅玻璃門，就會見到用木頭做成嘅狹窄樓梯。（好有feel～～～）
打開古老嘅木門行入去就會見到呢個地方，呢度就係擁有60年歷史嘅學林茶館。
雖然小編嚟嘅日子係平日嘅朝早，不過都有好多客人，無論男女老少都喺呢度渡過悠閒嘅時光。
呢度會一直播放住古典音樂，可以一路聽住呢啲古典音樂一路飲咖啡，真係好寫意。
學林茶館嘅照明唔係好光，比較沉重，加上佢係木製傢俬，所以比起老舊有一種更加高級嘅感覺。
透過大窗戶仲可以見到大學路風景。
呢張相係1988年喺呢度影嘅一張相，大家有冇發現，除咗窗簾同燈光唔同之外，其他地方都係一樣呢？
由舖頭左面嘅小樓梯上去，仲可以去到呢度嘅閣樓。
呢度就係由2樓俯瞰落去學林茶館嘅景色，呢一種古色古香嘅設計就係茶館嘅特色，大家望到係咪都覺得呢度好啱休息呢？
呢度仲有一本學林茶館嘅相片集，睇住呢本相片集就會發現呢30年嚟大學路嘅風景有啲咩變化，真係幾神奇。
雖然學林茶館嘅外內依然如故，不過Menu就變做現代風格。呢度有埋喺普通咖啡廳都可以搵到嘅濃縮咖啡、傳統茶、其他各種飲品，同簡單嘅酒類飲品。以前好似淨係會買維也納咖啡、漢藥茶、芭菲等！
小編叫咗呢度最受歡迎嘅維也納咖啡同藍莓芝士蛋糕。
維也納咖啡 (₩6,000)
呢度嘅維也納咖啡同出邊飲嘅維也納咖啡有啲唔同，呢度係鮮奶咖啡上面再放奶油。
奶油真係好厚好多，一飲會令人覺得好幸福。
藍莓芝士蛋糕 (₩6,000)
小編睇落覺得比起似芝士蛋糕，更加似牛奶布甸，果醬可以揀藍莓醬同橙醬。
食落去芝士蛋糕好濃郁，好似希臘酸奶咁散發出酸甜味道，同藍莓果醬好夾。
今日同小編一齊了解咗韓國咖啡廳嘅始祖茶館，仲有一齊探訪左60幾年歷史嘅學林茶館。大家覺唔覺得好有趣呢，下次嚟韓國的話，都可以去韓國嘅茶館睇吓。
推薦大家到乙支路乙支茶館同大學路嘅學林茶館！
如果有更多想知嘅內容，都可以隨時留言或者dm話俾我哋知：）
Instagram：creatrip.hk