韓國四·一九運動
64年前嘅今日，「四·一九運動」總統選舉造假，成為韓國第一次民主革命
Hello，大家好，我哋係由韓國人每日提供最新韓國旅行資訊嘅Creatrip。
大家知唔知喺64年前嘅今日韓國發生咗啲咩事呢？當年嘅今日係繼韓戰之後，最早爆發民主化運動之一，史稱「四·一九運動」。雖然當時成功將大韓民國第一任獨裁總統拉落台，但喺革命之後，由朴正熙發動軍事政變，開始咗長達27年黑暗獨裁政權，所以同時亦被稱為「未完嘅革命」。
韓國四·一九運動
第一次馬山事件
李承晚
韓國光復之後，大韓民國第一任總統由李承晩統領，任期間雖然成功拉起戰後經濟，但屠殺萬數人嘅濟州島「四·三事件」，強行喝令釜山戒嚴，軍隊進入國會施壓嘅「拔萃改憲」，以及未過修憲門檻，以四捨五入票數後通過嘅「四捨五入改憲」等爭議，令佢可以維持12年政權。
喺上任初期，李承晩透過南北兩韓、韓日情節等民粹主義，鼓吹大眾示威同討論，塑造出政權熱絡、參與議題嘅假象，例如動員反對分裂國土停戰協議示威，或要求李承晩再度參加選舉遊行、抗議日本遣返在日僑胞舉動等等，某種程度上為韓國早期「大內宣」。
不過，佢呢一種手法喺1950年代後期逐漸被人睇穿，李承晩只可以動用軍警強制力維持政權。
喺1960年3月15號大韓民國第四任總統選舉前，包括李承晩在內，總共有三人參與總統選舉。兩個候選人當中一個被李承晩指控為共產黨員，快速逮捕並處死，另一位候選人喺美國就醫過程中不幸心臟麻痺猝死。
而喺選舉當時，李承晩喺投票過程中禁止在野黨集會，恐嚇大眾投票俾李承晩，最後灌水改票數，引發大批民眾不滿。
當日市民同學生團體喺慶尚南道馬山市舉行譴責李承晩政府選舉舞弊示威，但就受到當局開槍進行強力鎮壓，造成多名人員死傷，好多人都被誣陷為共產黨人士，遭到無情拷問。
呢個喺韓國史稱為「馬山義舉」，好多人都唔再相信李承晩，同時成為日後將李承晩拉落台嘅導火線。
第二次馬山事件
金柱烈屍體
喺1960年4月11號，喺馬山港口發現第一次抗爭中失蹤嘅高中生金柱烈（김주열 音譯）屍體，頭骨更加被催淚彈擊穿。雖然當局表示金柱烈係溺水身亡，同當局鎮壓無關，但催淚彈、手綁石塊掉入海嘅死法，引嚟大批民眾不滿，所以舉行咗第二次示威。
當時呢件事有部分媒體去報導，震驚全韓國，甚至仲將呢件事傳到去西方國家。當時各個城市甚至高中、大學都出現示威遊行，抗議選舉舞弊以及警察血腥鎮壓行為。李承晩對於呢啲事都係隻眼開隻眼閉，只係喺4月15號表示馬山示威者為「共產主義者鼓舞同操控」，甚至警告參與示威嘅青年為「煽動暴動」。
喺4月18號當日有三千幾位高麗大學聚集，宣讀《為爭取真正的民主理念而高舉烽火（진정한 민주이념의 쟁취를 위하여 봉화를 높이들자）》宣言，同時行去國會議事堂，採取非暴力形式抗議，但喺返學校途中受警察庇護反共青年團份子襲擊，好多學生都受傷慘重，再次引起國民怒火。
1960.04.19當日
4月19號當日，有三萬幾名大學生、高中生走上街頭，其中有幾千人去景武台（今青瓦台）抗議，而警察就對呢班示威者開火，學生和平示威亦都為咗生存而努力暴動，喺釜山、光州、木浦、仁川、清州等各大城市，有幾千名學生北上示威。當日有130人不幸遭警方射殺，幾千人受傷，李承晚政府亦針對主要城市頒佈「非常戒嚴令」。而值得慶幸嘅係，韓國軍方當時對政府定調示威為「反共鎮壓」表示保留，不加入鎮壓行列。
未完嘅革命
因為李承晚嘅逃避，加上唔少學生死傷慘重，令到當時唔少市民都加入呢場示威遊行，轉守為攻，破壞與焚燒反共青年團、李承晚所屬政黨自由黨幹部嘅屋。時任政府亦同黨內高層進行討論，尋求安全脫身方式。同時美方亦注意到呢次示威暴動，派遣當時駐韓大使Macanarghy D.P對李承晚政府施壓，要求呢件事件可以刈有效妥善解決。
4月21號內閣因全國爆發革命為由宣布落台；4月25號有嚟自唔同大學300幾位大學教授集體連署，要求李承晚辭職。
最後李承晚喺1960年4月26號宣布辭職，結束大韓民國「第一共和」，並由兩日前被任命為內閣首長，認為係無黨派系許政代理臨時總統。而李承晚逃亡去到夏威夷，直到死之前都唔返韓國，喺1965年過世後，遺體先送韓國，葬於國立顯忠院。
「四·一九運動」雖然睇落去好似成功咗，亦因為呢件事成為大韓民國民主主義開始，但韓國局勢亦未因為咁而穩定。喺第二年5月16號，朴正熙領軍攻入首爾（當時稱漢城），視為「516軍事政變」，而419革命亦開啟數十年韓國獨裁政權，成為歷史中最悲慘開端，而稱為「未完嘅革命」。
419革命烈士紀念碑
以上係「四·一九運動」嘅相關介紹，唔知道大家又對呢件事有冇多咗了解呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk