韓劇OST界嘅IDOL
韓劇OST絕不能少咗佢地！Gummy、太妍、 K. Will 統統上榜
Hello，大家好，我哋係由韓國人每日提供最新韓國旅行資訊嘅Creatrip。
每套韓劇都配有好幾首歌，幫助推進劇情，營造氣氛，令觀眾睇得更加投入。 有時更加因為套劇受歡迎，令首OST都人氣急升，甚至超過人氣偶像團體同歌手，喺享負盛名嘅韓國音樂排行榜上攀升至第一位。
大家又識幾多個專門唱OST，被稱為「OST女王」、「OST之王」嘅歌手呢？ 今日就同小編一齊嚟睇下啦~
韓國OST界嘅IDOL
1. PUNCH
講到OST女王，一定唔可以唔提PUNCH，佢唱過好多人氣韓劇嘅OST，例如：《沒關係，這是愛情》、《皮諾丘》、《太陽的後裔》（同CHEN一齊合唱嘅〈Everytime〉）、《山茶花開時》......最令人印象深刻嘅係同EXO燦烈合唱《鬼怪》嘅〈Stay with me〉。 1993出生嘅PUNCH，年紀輕輕就唱過咁多膾炙人口嘅OST，「OST 女王」呢個稱號真係當之無愧嘅！
2. LYn
大家可能對LYn比較陌生，但只要一唱《來自星星的你》〈My Destiny〉嘅話，大家就會即刻記得！佢仲唱過《101個求婚》、《我的女朋友是九尾狐》、《擁抱太陽的月亮》、《太陽的後裔》等多套韓劇嘅OST。LYn嘅聲音好特別，佢唱嘅OST更加令套劇有畫龍點晴嘅效果。
3. 10cm
10cm以唱抒情嘅OST而走紅。 近年唱過《鬼怪》、《德魯納酒店》、《愛的迫降》同《Start Up》嘅OST。套套都係超人氣嘅韓劇， 佢唱嘅OST大家都好熟悉，奠定咗佢「OST之王」嘅地位。
4. EXO - CHEN
身為EXO成員嘅CHEN，都唱過唔少韓劇嘅OST，好似《沒關係 這是愛情》中嘅〈Best luck〉， 發佈咗短短幾個鐘，CHEN嘅名就登上韓國網站搜索量嘅前10名。 自此之後，CHEN就被冠上「OST之王」嘅稱號。之後嘅《太陽的後裔》、《月之戀人 - 步步驚心：麗》、 《百日的郎君》到最近嘅《你喜歡布拉姆斯嗎》都有獻唱。
5. Gummy
Gummy可以講係韓劇OST女王之中嘅女王！每次Gummy唱嘅OST，嗰套劇都肯定大熱。 首首都係經典，從《那年冬天，起風了》、《主君的太陽》、《太陽的後裔》、《雲畫的月光》、《百日的郎君》、《德魯納酒店》、《浪漫醫生金師傅2》、《The King：永遠的君主》、《你喜歡布拉姆斯嗎》都有Gummy嘅靚聲參與。喺咁多首OST之中，大家最鍾意邊首呢？
6. K.Will
K.Will係韓國好出名唱抒情歌嘅歌手，仲係聲樂老師、舞蹈演員、音樂家、作曲家，演員同DJ。 K.Will喺2005年開始唱OST，《這該死的愛》、《燦爛的遺產》、《來自星星的你》、《皮諾丘》、《龍八夷》、《太陽的後裔》、《雲畫的月光》、《Start Up》、到《都市男女的愛情法》、《Oh！珠仁君》等等佢都有份參與OST，當中《變身有情人》嘅〈Beautiful Moment〉受到國內外觀眾嘅高度評價同喜愛。
7. BEN
BEN係被公認為當今最有才華嘅女歌手之一，但佢喺被稱為「OST女王」之前，都花過好長嘅時間喺 K-pop 版圖上為自己站穩住腳。 佢嘅歌聲好易認，唱出令人心碎嘅旋律，慢慢就被大家熟識。《Healer》、《製作人們》、《Oh 我的鬼神大人》、《記得你》、《又，吳海英》、《雲畫的月光》、《ALICE》、《今生是第一次》等等嘅韓劇OST，BEN都有份唱。
8. 太妍
泰妍擁有沉穩嘅聲線，她唱嘅OST有時比套劇更加出名。 佢第一首唱嘅OST係《快刀洪吉童》中的《如果》，大受歡迎之後，繼續參與《貝多芬病毒》、《雅典娜：戰爭女神》、《那年冬天的風》、《你們被包圍了》、《德魯納酒店》等韓劇嘅OST。電影方面亦都有唱過《超級巨猩3D》、《冰雪奇緣2》等OST。每一首OST一出都橫掃多個獎項，當中《當王子遇上女軍官》〈瘋狂地想念你〉（미치게 보고싶은）、《那年冬天 風在吹》〈還有一個〉（그리고 하나）〉、《德魯納酒店》〈名為你的詩〉（그대라는 시）都實現咗「All Kill」嘅記錄！
9. 成始璄
唔知大家識唔識成始璄呢位歌手呢？ 佢有「情歌皇太子」之稱，聲線溫柔又渾厚嘅佢喺《秘密花園》、《請回答1994》、《來自星星的你》、《藍色海洋的傳說》等韓劇中唱過無數感人嘅情歌，首首都獲得好高嘅評價。
10. 白智榮
講到最初嘅韓劇OST女王，可以話係白智榮啦。 白智榮最初係從拉丁舞曲起步，後來參與韓劇嘅OST配唱，《黃真伊》、《IRIS》、《秘密花園》、《公主的男人》、《屋塔房王世子》、《九家之書》、《製作人們》、《雲畫的月光》、《夫妻的世界》等熱門韓劇都有獻唱，其中《秘密花園》嘅〈那個女人〉仲俾台灣歌手楊宗緯改詞翻唱添！
11. Davichi
Davichi 係一個韓國女子組合，有 2 名成員，包括李海莉和姜珉炅。如果大家係K-pop 嘅fans，一定唔會唔識佢哋！佢哋都唱過超多嘅OST，包括《伊甸園之東》、《拜託小姐》、《天國的眼淚》、《BIG（真愛上錯身） OST》《IRIS》、《沒關係，是愛情啊》、《太陽的後裔》、《月之戀人 - 步步驚心：麗》、《當你沉睡時》、《愛上變身情人》、《愛的迫降》、《The King：永遠的君主》、《Start Up》等等。
12. Paul Kim
Paul Kim唱過嘅OST唔多，但每一首都受到高度評價，仲連續幾個月都維持喺音樂排行榜榜首。當中《要先接吻嗎》嘅〈 Every day, Every moment)〉（모든 날, 모든 순간）橫掃所有排行榜，仲喺2018年M2 x Genie、Melon Music Awards同Mnet亞洲音樂大獎中獲得OST獎。之後《德魯納酒店》嘅〈So Long〉（안녕）、《The King：永遠的君主》嘅〈Dream〉都獲得好好嘅成績。
以上就小編為大家列出嘅OST之王、OST女王啦！大家最喜歡邊一位歌手呢？留言讓話俾我哋知啦~
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com