首爾紫色主題咖啡廳
首爾3間「紫色主題cafe」，每一間都超夢幻，難怪佢咁受歡迎！
Hello，大家好，我哋係由韓國人每日提供最新韓國旅行資訊嘅Creatrip。
韓國咁多間Cafe，大家又會唔會想去啲特別主題嘅cafe呢？今日小編同大家介紹3間以「紫色」做主題嘅cafe，下次嚟韓國都可以有一個不一樣嘅旅行體驗！
首爾紫色主題咖啡廳1
店名： Cafe Monstercat （요괴냥수비대）
Instagram：cafe_monstercat
營業時間：星期三至星期日 13:00 - 21:00
地址：서울 마포구 홍익로 13-12
小Tips：由弘大入口站9號出口行大約10分鐘。
第一間想同大家介紹嘅係最近弘大好受歡迎嘅Cafe Monstercat（요괴냥수비대），佢之所以咁受歡迎，係因為老闆係YouTuber 곽토리（Kwak tori），佢成日會拍片同大家互動，可愛嘅外表同活潑嘅性格，更加係令人鍾意。
入到鋪頭，大家會覺得呢度俾人一種好可愛嘅感覺，因為老闆係貓奴，所以好多飾物同擺設都同貓有關。
呢度都有好多款唔同飲品，不過有啲可惜嘅係呢度冇甜品
喺等飲品嘅期間，大家仲可以睇吓呢到啲小精品或貼紙，每一款都可愛，有興趣嘅朋友都可以喺度買。
鋪頭唔算多位，因為佢一星期只開四日，所以每一次去都好多人，當日小編一開始去嘅時候就只剩返呢兩張檯。
要提提大家，呢度落完單之後係冇振動器提供，所以一定要聽住老闆叫number。
最後小編叫咗一杯薰衣草乳酪沙冰同一杯茉莉西柚梳打。
薰衣草乳酪沙冰 (₩7,200)
冇好濃嘅薰衣草味，不過有好重乳酪味，甜甜地都幾好飲。
茉莉西柚梳打 (₩6,500)
飲嘅時候會覺得好涼爽，特別推薦大家夏天或春天嚟飲，好正！
雖然價錢係偏貴少少，不過至在夠可愛，po上ig應該都會呃到唔少Like！
除咗室內之外，呢度仲有室外位置，可以吹吓風又係另一種享受。
喺韓置見到全身鏡又點可以唔打返張卡呢？
每個人嚟度仲會喺呢個牌前面打卡，之後嚟大家都知要點做啦
除咗Cafe之外，大家嘆完飲品之後，仲可以去隔離鋪UNIPOPCORN睇吓，都係同一老闆開㗎！
首爾紫色主題咖啡廳2
店名： Cafe Be Purple（카페 비퍼플）
Instagram：bepurple_cafe
營業時間：每日 10:00 - 21:00 （Brunch 星期一至四 11:00 - 19:00、星期五及六11:00 - 20:30）、每個月最後一個星期三休息
地址：서울 은평구 통일로 633 1층
小Tips：由碌磻站5號出口行大約3分鐘。
如果喺Naver搵「紫色咖啡廳」，呢一間出現嘅之數真係多到數口唔曬，既然佢咁出名，小編當然都要去實地探訪睇吓佢有幾巴閉！
呢度最出名嘅就係Cream Cafe Mocha，可惜小編當日太遲去已經賣曬 所以小編只好叫其他飲品。
呢度每一個角落都可以成為打卡位，鋪頭店面夠大，一啲都唔會覺得好逼，牆身同櫈都係紫色，令人好放鬆。
呢個一個KOL打卡位，喺IG搵應該10個都有至少8個人喺度打過卡
即影即有有好多鋪頭入面嘅detail位，唔知大家又搵唔搵得曬呢？
呢度有好多梳化櫈，啱曬大家行到攰之後嚟休息。
最後小編叫咗呢度季節性飲品士多啤梨奶、士多啤梨鬆餅同老闆推薦嘅咖啡鮮奶。
最近喺韓國呢種牛角包鬆餅真係超hit，呢度嘅鬆餅好酥脆，cream唔會太膩，一啖鬆餅一啖士多啤梨同cream一齊食真係好幸福。
老闆推薦嘅咖啡鮮奶唔會好苦，同甜品一齊食啱啱好。而士多啤梨鮮奶係用咗新鮮士多啤梨同果醬去一齊食，簡直係完美！
食完之後，喺走之前大家都記得要喺呢個招牌前面打返張卡啊！
鋪頭好闊落，啱曬行到攰想搵一個舒服地方坐吓嘅大家！
首爾紫色主題咖啡廳3
店名： Tape（테이프）
Instagram：tapeseoul
營業時間：每日 12:00 - 22:00
地址：서울 용산구 이태원로14길 21 2층 TAPE
小Tips：由梨泰院站4號出口行大約7分鐘。
如果只睇外觀可能唔會太顯眼，但喺梨泰院區佢係一間好受歡迎嘅Cafe之一。
呢間Cafe有兩層同時有好多位，不過當日小編去天台已經閂咗，如果唔係可以欣賞到梨泰院嘅景色 不過如果大家有興趣都可以喺佢哋IG睇更多相。
呢度好多款蛋糕都係以銀河做主題，望住都覺得好夢幻。
呢度有好多款飲品可以揀，不過比較特別係有酒賣，如果夜晚嚟飲返杯應該都幾有feel！
最後小編叫咗呢度嘅士多啤梨芝士蛋糕（右邊）同朱古力榛子蛋糕。飲品方面就叫咗綠茶鮮奶同熱帶水果茶。
綠茶鮮奶相對比較偏甜，如果鍾意飲甜嘅朋友應該會幾鍾意，而水果茶好香果味，酸酸地同蛋糕一齊食會好夾。
榛子朱古力蛋糕食第一啖已經令人超有驚喜！佢好濃味，食食吓會覺得有啲似金莎？
由外表睇已經覺得好吸睛，呢一個士多啤梨芝士蛋糕味道亦都相當唔錯，不過有啲可惜嘅係原本IG睇以為係紫色，但嚟度先發現變咗藍色，不過都一樣好靚。
比起坐中間位，小編推薦不以先坐角落位，因為紫色背景同石膏牆嘅配搭令到呢度更有一種藝術風格？
如果大家之後有興趣嚟呢一間cafe，小編建議可以喺黃昏嘅時候去，咁樣先可以更加清楚睇到內部嘅紫色
唔知今次3間以「紫色」做主題嘅cafe，大家又鍾唔鍾意呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
