新沙「智異山黃土谷土種黑豬」介紹
BTS練習生時期常去嘅「姨母食堂」，身為A.R.M.Y嘅你又點可以錯過？
Hello，大家好，我哋係由韓國人每日提供最新韓國旅行資訊嘅Creatrip。
今日小編要同大家介紹嘅呢間餐廳，只要係A.R.M.Y一定都有聽過！因為呢間智異山黃土谷土種黑豬（유정시당）係BTS仲係練習生嘅時候，成日會去嘅食堂之一，到底點解佢會咁受歡迎？咁就要繼續睇落去啦！
新沙「智異山黃土谷土種黑豬」介紹
營業時間：平日10:00 - 22:00、週末 10:00 - 20:00
地址：서울 강남구 도산대로28길 14
小Tips：由新沙站1號出口行大約13分鐘，或者由鶴洞站7號出口行大約8分鐘就會見到。
呢間「智異山黃土谷土種黑豬」位於新沙同鶴洞站中間，如果由地鐵站行過去，大約兩邊都係行十分鐘左右，因為佢相當出名，所以會好易搵，如果真係唔識只要問路人佢哋都會好熱心教大家點去。
大家可以睇到當年BTS第一個真人show綜藝節目《新人王 防彈少年團 - Channel 防彈》都有喺度拍過，雖然已經係8年前，但望住佢哋好似一啲都冇變咁。
餐廳內部好大，小編大約係1點左右時候去，當時真係好多上班族喺度食飯。 （因為怕打擾到其他人，所以上圖係比較少人嘅時候影）
大家嚟到完全唔需要擔心溝通唔到，因為呢度嘅menu有韓文、中文、英文同日文，呢到幾乎每一檯都係叫有情黑豬蔬菜包飯（至少要叫2人份），小編當然都跟風叫咗啦
另外呢度黑豬肉石鍋拌飯都好出名，大家之後嚟都可以試吓！
餐廳內部除咗會貼滿防彈嘅海報之外，連水樽、紙巾盒、餐盒等呢度都會貼滿唔同成員嘅貼紙，所以每一個位都可以係打卡位。
雖然當時小編去嘅時候都有好多客人，不過唔使等好耐，老闆就已經好快準備好曬同送上檯，大家又有冇俾佢份量嚇親呢？
一上檯嘅時候已經可以即刻食得，呢度嘅豬肉超嫩，甜甜辣辣包住嚟食，或者配飯一齊都好唔錯。
食到一半嘅時候，老闆就問小編係唔係A.R.M.Y，如果係鍾意邊位成員？講完之後老闆就送咗紀念品俾我哋。不過提提大家，有啲成員因為太搶手，所以好快會冇曬，可能去到都要靠運氣。
呢度每一個角落都放滿好多BTS嘅精品，望住真係覺得好幸福（如果小編可以喺度返pt幾好呢 ）。
真係唔可以講笑，呢度真係每一個角落都好好影，令人影到唔捨得走....
如果大家之後嚟到都想坐返成員當時坐過嘅位，一定要認住上圖，不過因為唔少年輕人嚟到最先都會揀坐呢度，所以去到嘅時候可能都要靠運氣。
因為當日太多客人，小編只可以遠望J-hope嘅人型牌...下次去一定要同到佢合照
雖然同唔到J-hope合照，好彩都可以同V一齊影，真係太有型啦
其實除咗防彈之外，呢度都有唔少韓星都嚟過，就好似早排拍完《女神降臨》而大熱嘅黃寅燁、ATEEZ成員等，如果大家之後嚟，話唔定可能都會撞到韓星
如果有更多想知嘅內容，都可以隨時留言或者dm話俾我哋知：）
Instagram：creatrip.hk