韓國身份證號碼嘅秘密
韓國身份證號碼入面竟然包括咗性別同出生地？一齊嚟睇吓同香港嘅身份證號碼又有咩唔同啦！
Hello，大家好，我哋係由韓國人每日提供最新韓國旅行資訊嘅Creatrip。
每個人出世就會有一張自己獨有嘅身份證，韓國人都唔例外。不過你又知唔知韓國人身份證嘅秘密？今日就等小編帶大家了解吓啦！
咩係住民登錄號碼？
韓國嘅身份證稱為「住民登錄證（주민등록증）」，所以住民登錄號碼就係呢張登陸證上面嘅號碼啦，而佢係根據韓國住民登記法頒發俾所有居住喺韓國國民嘅號碼。韓國嘅住民登錄系統由1968年就一直沿用到而家，同其他國家嘅系統一樣，係政府用嚟識別自己國家居民嘅系統。
上圖呢個就係可以喺住民登錄證上面搵到嘅號碼啦，就好似我哋身份證號碼咁。只不過喺韓國，你可以用登錄證號碼加入保險同考車牌，所以就算冇帶登錄證出門口，只要講出登錄證號碼都可以claim到保險；就算冇帶車牌出門口，警察都可以透過你嘅登錄證號碼去check到你有冇車牌。韓國政府亦因為咁喺2008年取消咗對於冇帶車牌嘅罰款。另外，手提電話上面亦都可以發行電子車牌，咁就唔使帶住實體車牌周圍去。
當然，呢個居民號碼最重要就係可以加埋電話號碼用喺上網驗證身份，所以居民登錄號碼對於喺韓國生活係好重要嘅一樣嘢。好多韓國人亦都會記實呢個號碼，因為日常生活實在太常會用到佢。
住民登錄號碼： 前六位數字
韓國嘅住民登錄號碼由兩組號碼組成，前六位數字＋後七位數字，一共係十三個數字。而前六位數字係代表出生日期嘅意思，例如上圖嘅人嘅前六位數字係「820701」，咁就代表佢喺1982年7月1日出世啦。就係因為咁，喺韓國你可以通過身份證前六位數字去知道一個人嘅年紀。
住民登錄號碼：第七個數字
住民登錄證嘅第七位數字係由性別同出生年份決定，1係男性，2係女性。而如果係2000年後出世嘅人，男性就會係3，而女性就會係4。
所以上圖嘅人係2，可見佢係2000年前出世嘅女性。
NEWSIS至於外國人用嘅外國人登錄證，佢嘅系統亦都同韓國人用嘅住民登錄證相同，只係第七位數字會用5至8號，而唔係1至4號啦。2000年前出世嘅外國男性為5，女性為6。而2000年後出世嘅外國男性為7，女性為8。
住民登錄號碼：第八至十一位數字
住民登錄號碼嘅第八至十一位數字係出生地嘅固有號碼。第八同九位數字係地方自治區嘅號碼，首爾、釜山同京畿道等等都有佢各種嘅號碼。而第十同十一位數字就代表再細單位嘅出生地號碼啦。不過呢個系統有洩露個人資料同歧視特定地區嘅問題，所以呢個系統喺最近就被廢除咗啦。
住民登錄號碼：第十二位數字
第十二位數字就係代表申報出生嗰日按照申報次序而獲發嘅號碼啦，不過呢個都同樣廢除咗啦。
住民登錄號碼：最後一個數字
住民登錄證最後一個數字就係代表「驗證號碼」啦，呢個數字會盡量避免用前面出現過嘅數字，亦會用特別嘅公式計出嚟。
45年嚟嘅制度改革
就係好似上圖咁講，韓國嘅居民登錄號碼包含太多資料而會衍生好多唔同問題，所以喺韓國嘅居民號碼喺2020年10月就做咗45年嚟嘅第一次制度改革啦。呢次係對於第8至13位數字嘅改革，新制度唔會再包括出世地等等嘅個人資料喺登陸號碼入面，變為由電腦隨機發放。不過喺改革前發行登陸號碼嘅人就唔受影響，要用番本身個號碼啦。
以上就係關於韓國身份證號碼嘅一啲小知識啦，雖然而家登錄號碼嘅系統已經更新咗，但小編覺得知道舊系統原來包括咁多個人資料呢樣嘢都好有趣！唔知大家又有咩諗法呢？歡迎留言話俾我哋聽！
如果有更多想知嘅內容，都可以隨時留言或者dm話俾我哋知：）
Instagram：creatrip.hk