首爾粉紅色主題咖啡廳
兩間充滿少女心嘅「粉紅色主題cafe」，就連BLACKPINK ROSÉ同Girl's Day惠利都去過？
Hello，大家好，我哋係由韓國人每日提供最新韓國旅行資訊嘅Creatrip。
如果本身大家都自認有一顆少女心，咁今日同大家介紹嘅2間以「粉紅色」做主題嘅cafe，大家應該都會幾鍾意，如果唔想錯過，就要繼續留意落去啦！
首爾粉紅色主題咖啡廳1
店名： Rachel's Kitchen
Instagram：hd_rachelskitchen
營業時間：每日 11:30 - 22:00 （Last Order 11:00）
地址：서울시 마포구 와우산로 29길 47 1,2층 라헬의부엌
小Tips：由弘大入口站6號出口行大約4分鐘。
第一間要同大家介紹嘅cafe係Rachel's Kitchen，雖然其他唔同城市都有呢一間分店，不過小編今次去嘅係首爾弘大店。白色外牆配粉紅色門，真係令人超有少女心，會好想喺門口度打返好幾張卡
呢度總共有兩層樓高，一樓主要係落單，同埋只得兩張檯同一個小角落打卡，所以好多人喺一樓買完都會上二樓食。
只要每一間Cafe有全身鏡，唔少韓妹都會喺前面打卡，小編當然都唔例外梗係要跟下風啦！
因為當日小編都算早去，所以當時冇乜客人可以盡情打卡，2樓好闊落，而且有個好大嘅落地玻璃窗，超通風。
天氣好嘅時候，窗邊位一直都係大受歡迎，可以邊嘆住咖啡邊望住街景，真係令人好享受同寫意。
雖然影得唔係好專業，不過呢度真係好多打卡位。
唔知有冇人同小編一樣都係梳乎厘控呢？每一次去Cafe一定必叫！今日除咗叫梳乎厘之外，小編仲多叫咗一杯士多啤梨鮮奶同美式咖啡。
梳乎厘 (₩11,000)
梳乎厘係呢度嘅招牌，每一個人嚟到都一定會叫，佢有好多口味揀（原味、士多啤梨、綠茶等），當日小編就揀咗原味，而且份量都幾多。食嘅時候入口即溶，好香蛋味，相信冇人係會唔鍾意，加上佢價錢一啲都唔貴，真係超值得試！
美式咖啡 (₩4,200)
嚟韓國每日飲一杯美式咖啡是常識吧？ 基本上每一間都差唔多，不過值得一提嘅係佢呢度嘅飲管好可愛。
士多啤梨鮮奶 (₩7,500)
如果唔鍾意飲咖啡嘅朋友，可以試吓叫呢一杯士多啤梨鮮奶，總共分咗三層，最底層係士多啤梨醬、第二層係牛奶，最頂係士多啤梨雪糕，將佢哋搞勻一齊飲，真係好好味。
咁有少女風嘅cafe，大家會唔會鍾意呢種風格呢？
首爾粉紅色主題咖啡廳2
店名： Mamma Mia
Instagram：mammamiadosan
營業時間：11:00 - 21:00
地址：서울 강남구 압구정로42길 45
小Tips：由狎鷗亭站2號出口行大約14分鐘。
第二間係位於狎鷗亭附近嘅cafe，呢度每日都有新鮮出爐嘅蛋糕，而且種類都好多，每一次嚟都會有唔同新驚喜。
如果喺網上打粉紅色主題cafe，一定會搵到佢嘅蹤影，因為佢相當之出名，就連BLACKPINK嘅ROSÉ同Girl's day嘅惠利都有去過。
因為呢一間Cafe實在太出名，所以小編都去咗兩次 不過如果大家有興趣就唔建議週末去....因為實在太多人，要排隊先入到，相反平日就會少啲人。
呢度每一款甜品都好吸睛，如果有鍾意嘅可以自己夾，之後再拎去櫃檯埋單。
雖然每款都好可愛，但可惜嘅係小編冇辦法試晒所有
一開始都講過BLACKPINK ROSÉ同Girl's Day惠利嚟過，大家記住都要喺度打返張卡。
一樓嘅室內好有藝術feel，掛滿咗好多畫，喺度打卡都幾唔錯。
去到室外就係另一個feel，呢度掛滿咗好多假花，坐喺度嘆咖啡會覺得好浪漫。
上到二樓會覺得好似去咗一個玫瑰花園咁。
當日天氣好所以小編決定坐室外，同時叫咗兩個蛋糕同兩杯飲品。
紅蘿蔔芝士蛋糕 (₩8,500)
唔知由幾時開始，紅蘿蔔蛋糕喺韓國超hit，幾乎每一間Cafe都會有，雖然佢有好厚嘅cream，但食嘅時候一啲都唔會覺得好膩，唔會太甜，都幾唔錯。
士多啤梨Cup cake (₩4,500)
入到Cafe最先吸引小編嘅就係呢一個甜品，超可愛嘅外表真係令人唔捨得食佢，鬆軟嘅麵包配上士多啤梨醬，真係冇人會唔鍾意。
士多啤梨鮮奶 (₩8,000)
同一開始介紹第一間嘅士多啤梨鮮奶相比，小編覺得呢度更好飲，因為佢更加甜，仲會食到好多士多啤梨果肉，同時都係呢間Cafe嘅招牌飲品。
唔知以上兩間粉紅色主題Cafe，大家又會鍾意邊種風格多呢？歡迎大家留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk