首爾黃色主題咖啡廳
首爾3間以黃色做主題嘅Cafe，當中有冇邊一間會係啱你心水？
Hello，大家好，我哋係由韓國人每日提供最新韓國旅行資訊嘅Creatrip。
韓國咁多間cafe唔知大家會唔會成日苦惱去邊間好呢？如果以顏色做主題唔知大家又會唔會易啲揀呢？今日小編先同大家介紹3間嗎首爾以「黃色」做主題嘅cafe，如果大家有興趣就要繼續睇落去啦！
首爾黃色主題咖啡廳1
店名： Butter Book
Instagram：butterbook.kr
營業時間：星期二至星期五 13:00 - 20:00、週末 12:00 - 20:00、逢星期一休息
地址：서울특별시 해방촌 용산구 신흥로15길 20
小Tips：由綠莎坪站2號出口行大約17分鐘。
第一間想同大家介紹係位於解放村嘅Butter Book，呢間Cafe一直以嚟都係大熱，唔少韓國KOL都去過打卡。只係睇外觀係唔係都覺得有種好文青嘅感覺呢？
雖然鋪頭店面唔係好大，但呢度都有分室內同室外，天氣好嘅話，真係好推薦大家坐出面。
呢度飲品類唔算多，但基本上嚟到都係會飲樽裝奶多。
當日小編大約11:30左右去到，一開始都奇怪點解口味只係得咁少？
所以就問咗老闆，佢話大約等多10分鐘左右，就會準備好曬其他口味。
喺等緊嘅期間，小編就諗定揀咩雪糕好 每一款都好吸引，真係令人十五十六
最後小編就揀咗兩款口味雪糕、樹莓冬甩，同埋伯爵樽裝奶茶。
樹莓冬甩 (₩4,500)
樹莓冬甩係呢度嘅招牌甜品，只要打開IG幾乎會見到十個有八個人會叫呢款，食嘅時候會覺得酸酸甜甜，就算係朝早食都會覺得好開胃。
雪糕（黑芝麻+濟州柑橘） (₩5,300)
原本小編喺IG見到好多都係用筒裝，諗住打卡嘅時候可以影得靚呢...點知當日只係得杯裝。雖然睇落去外表不討好，但每一款雪糕都好濃味，
特別係黑芝麻最近喺韓國真係大熱，超有味，另外濟州柑橘味仲有一粒粒嘅柑橘，一樣都係好好味。
伯爵樽裝奶茶 (₩5,000)
一打開已經可以聞到好濃嘅伯爵奶茶味，飲嘅時候仲會覺得好滑，令人一試就會愛上嘅味道！
整體嚟講，如果十分滿分的話，小編會俾呢間9.5分，因為每一款甜品同飲品都好好味！而0.5分係想提提大家，雖然早去係可以坐到靚位，不過太早去好多甜品都未出曬，需要等一段時間
首爾黃色主題咖啡廳2
店名： Riverway
Instagram：riverway_cafe
營業時間：星期二至星期五 12:00 - 21:45、週末12:30 - 21:45、逢星期一休息
地址：서울 마포구 합정동 410-17 1층 리버웨이
小Tips：由上水站1號出口行大約6分鐘。
第二間要同大家介紹嘅係主打素食Riverway Cafe，呢間小型Cafe係由一位韓國人同一個哥倫比人夫婦一齊經營。由外觀睇係唔係已經覺得好有異國風情呢？之前小編諗住週末去，點知要大排長龍，所以今次小編學識平日嘅黃昏時候前去，相對客人亦都冇咁多。
揀好位置坐底之後，老闆娘就會直接送上Menu俾大家參考，因為有英韓翻譯，所以大家都唔使擔心會點錯，或者有溝通上嘅問題。
內部裝修俾人一種好溫暖嘅感覺，每一個擺設都可以feel到老闆嘅用心。
呢個空間應該係老闆娘同老闆嘅回億，望住佢哋一齊去過嘅地方，令小編都好想疫情快啲好轉，飛返一轉。
最後小編叫咗呢度嘅招牌菜Organic granola bowal同一杯Green tea latte。
只要叫任何一款食物或飲品，呢度都會送coupon，集齊8張就可以免費獲得一杯美式咖啡。
Organic Cranola Bowal (₩9,000)
大家落單嘅時候可以喺揀乳酪、牛奶、杏仁奶3選1，最後小編就揀咗乳酪，上面仲有唔同堅果類同生果，每食一啖都會覺得好健康。
Green tea latte (₩7,000)
小編覺得都不過不失，唔會太甜，上面層cream都好好飲。
喺走之前，小編見到唔少人都會喺呢個位打返張卡，之後大家嚟都唔好錯過啦！
首爾黃色主題咖啡廳3
店名： Cafe Birkin
Instagram：cafe.birkin
營業時間：每日 11:00 - 23:00
地址：서울 마포구 양화로6길 28
小Tips：由上水站1號出口行大約12分鐘或者由合井站出口行大約3分鐘。
同樣都係位於上水站附近嘅一間Cafe，呢間cafe喺Naver評分相當高，5分入面足足有4.4分！而且都有百幾多個blog介紹過，人氣都相當高。
小編大約係3點左右去到，估唔到當時都幾多人，所以影唔到室內嘅相俾大家參考
呢度嘅甜品係自肋式去夾，不過可能因為小編太晏去到，好多甜品都冇曬
夾完之後大家就可以拎去櫃檯叫埋飲品一齊落單。呢度主要分咗咖啡類同非咖啡類，因為有韓英翻譯，大家都唔需要擔心溝通上嘅問題。
另外，如果大家對於呢度嘅甜品有興趣，都可以買外賣拎走。
最後小編叫咗佢哋嘅朱客力棉花曲奇、艾草鮮奶，同埋西柚梳打。
艾草鮮奶 (₩6,000)
呢一杯真係好有驚喜，因為唔係度度都有得飲艾草飲品，小編都係出於好奇心去試，點知真係好甜，同上層cream一齊飲，真係好滑同易入口！
西柚梳打 (₩7,000)
相比艾草鮮奶，呢一杯西柚梳打就令小編有少少失望，雖然飲落係好清爽，但就有啲苦
朱古力棉花曲奇 (₩4,500)
因為網上指呢個係超牌甜品，小編都充滿期待去試，雖然味道係唔錯，甜度亦都算中尚，不過就硬咗少少，有啲難分開。
如果大家好似小編用叉切開可能都要花少少力氣，而且仲會可能切到好碎，建議如果大家食嘅時候，用手分開會比較好。
最後小編都趁有人起身準備走嘅時候，快速咁影返張相留念。
今次同大家介紹咗3間位卡首爾嘅「黃色主題咖啡廳」，唔知大家又會唔會鍾意小編呢次嘅介紹呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk