15首動漫風K-POP

下一秒就好似要出去跑十個圈嘅熱血感！15首一聽前奏就過度投入嘅動漫風K-POP！

네사

4 years ago

Hello，大家好，我哋係由韓國人每日提供最新韓國旅行資訊嘅Creatrip。

而家嘅10代由好細個就每人一部手提電話，大家睇片睇劇嘅習慣都由電視轉咗去唔同嘅網上平台，但對唔少90後嚟講，佢哋童年回憶就係每日放學趕番屋企睇嘅卡通動漫。其實呢個回憶對於韓國人都係共通㗎，我哋有兒童台、 J2或者Cartoon Network嘅話，佢哋亦都有一個專睇動漫嘅電視台，叫做「Tooniverse （투니버스）」。1995年成立嘅Tooniverse，深深影響住好多我哋識嘅idol，例如INFINITE嘅L、 NU'EST嘅JR同SEVENTEEN嘅Woozi都係有名嘅動漫迷，當中Woozi更加試過喺V LIVE上淨係講動漫OST都講咗成個鐘，粉絲都話佢係「Tooniverse生出嚟嘅天才作曲家」添！

不過就算有啲人好似小編咁，雖然唔叫睇得多動漫，但相信都會認同動漫歌有種好熱血嘅感覺，嗰種搖滾音樂令人一聽就好有力量，腦入面即刻出現某啲動漫主角係咁跑嘅畫面...哈哈！不過大家又知唔知，動漫歌其實唔只日本先有，K-POP入面都有唔少充滿動漫感覺嘅歌呢？

今日小編就私心精選咗15首一聽前奏就會過度投入（과몰입: 對某件事過度投入而做出某啲反應，例如好似小編咁一聽呢啲動漫歌就會自動想像情景，然後心跳加速..哈哈）嘅動漫風K-POP，一齊嚟睇下你又有冇聽過啦！

（過度投入代表例子: 對K-POP過度投入嘅SEVENTEEN 勝寛 aka 夫教授）

V LIVE

15首動漫風K-POP

1. SEVENTEEN - Run to you

作為「Tooniverse生出嚟嘅天才作曲家」，第一首要介紹嘅當然係SEVENTEEN嘅Run to you啦！呢首歌由成員Woozi作曲作詞，雖然只係收錄曲，但佢陣動漫味真係好濃哈哈。YouTube上有粉絲將呢首歌套用落電影「你的名字」度，真係歌詞所有嘢都好夾，尤其係最後一段「當我的時間和你的時間相遇那一天，我會抱緊你。在我到達之前，你要過得好好的，真的真的很想見你。」 ㅠㅠ...成個畫面出哂嚟，非常推薦大家睇住歌詞聽！小編聽咗幾年都覺得好熱血，好鐘意呢首！

2. SEVENTEEN - Together

如果話Run to you似動漫嘅片頭曲嘅話，咁呢首就似係片尾曲啦！《Together》旋律輕快，或者會以為係首開心嘅歌，但其實佢係講「人生好多辛苦嘅事，好多嘢我哋決定唔到，不過只要一齊捱過佢就可以。」係首治癒加小搖滾嘅動漫風嘅歌！

3. Dreamcatcher - Deja Vu

Dreamcatcher主要推出嘅係搖滾風嘅歌，所以佢哋簡直可以話係動漫風K-POP嘅代表偶像！佢哋首首歌都好聽，但講到第一首想推薦嘅歌，小編一定會推《Deja Vu》，一聽到前奏嘅鋼琴聲加上成員始娟嘅歌聲，小編就即刻被驚艷到！一聽會心動就係好歌ㅠㅠ 歌詞都好有異世界+Fantasy嘅感覺，真係好好聽，真心希望人人都識呢首歌！

4. Dreamcatcher - Fly High

呢首同樣係鋼琴聲開始嘅搖滾風，感覺會好適合的講超能力+Fantasy主題嘅動漫！雖然係搖滾，但Dreamcatcher嘅歌都唔會過度黑暗，就算冇聽開搖滾都會覺得好好聽！

5. Dreamcatcher - Over the Sky

最後一首Dreamcatcher嘅歌都係小編鐘意嘅係鋼琴+搖滾風，呢首有種要保護地球嘅熱血感...下一秒就要打低敵人嘅感覺哈哈。Dreamcatcher其實除咗呢3首之外，都仲有好多好聽嘅搖滾風歌，而且成員個個音色都好靚，所以唔搖滾嘅歌都有好多名曲，好推薦大家去聽！

6. ONEUS - Rewind

小編都好鐘意ONEUS嘅歌，真係首首都好聽，但喺佢哋嘅歌入面最有動漫感嘅係Rewind，連韓文歌名都係「我們的時間在倒退」！隊內成日都對數碼暴龍過度投入嘅成員抒澔都話，佢喺呢隻專輯入面最鐘意呢首歌就可以推斷，呢首歌的確有幾分動漫味啦！小編都好鐘意呢首歌，特別呢隻舞入面融入咗之前幾首主打歌嘅代表舞步，真係好特別。

7. OH MY GIRL - The Fifth Season

OH MY GIRL 主打歌之一嘅《The Fifth Season》都好有清純校園愛情故事嘅感覺，都有種魔法夢幻主題動漫嘅feel，亦係小編好鐘意嘅一首OH MY GIRL嘅歌！

8. OH MY GIRL - Step By Step / One Step, Two Steps

因為太好聽而被稱為「God 발짝, King 발짝（將歌名「一步兩步」入面嘅一同二改做god同king，代表佢係首好聽嘅神曲）」嘅Step By Step/ One Step, Two Steps，係由前B1A4成員振永作曲作詞嘅名曲，呢首都似啲愛情主題嘅動漫歌，特別歌詞好令人心動，「當你遠離我兩步，我便會走近你三步，令我們的關係不再疏遠。當你走近我兩步，我便會站在原地不動，讓我們的關係不會過急。」歌詞同旋律一樣咁正！

9. YooA - Bon Voyage