Hello，大家好，我哋係由韓國人話你知每日最新資訊嘅Creatrip。
大家嚟到韓國都一定會去佢哋嘅主題樂園玩，當中最出名嘅當然唔少得愛寶樂園同樂天世界，咁唔知大家有冇玩過韓國最刺激嘅機動遊戲呢？
今日小編就會介紹韓國最刺激嘅機動遊戲俾大家，等大家下次嚟韓國嘅時候都可以試吓玩！
韓國最刺激嘅機動遊戲
1. 愛寶樂園 - T express（木質過山車）
시민일보
香港人都好鐘意去嘅愛寶樂園，入面就有佢哋最刺激嘅遊樂設施「木質過山車（T Express）」，傾斜度高達77度堪稱係全世界最斜嘅木造過山車嚟㗎！最高時速仲高達104公里！加上呢架過山車上半身係無仼何護欄，淨係用普通下壓式嘅防護設施，所以喺高低起伏或者係轉彎嘅時候，「離心力」就會更加強！
2. 慶州樂園 - Draken
조선일보
慶州樂園可能大家冇乜點聽過，不過都好受韓國人歡迎㗎！入面都有好多好刺激嘅機動遊戲，當中就有個係世界排第六，韓國第一個嘅90度直角過山車！係一個會令你嘅肉體同靈魂分離嘅遊樂設施，呢個過山車最大嘅賣點就係有2次90度垂直下降，最高點更加高達63米，係全韓國嘅過山車之中最高！
3. 樂天世界 - Gyro Drop
롯데월드 LOTTE WORLD
之前海洋公園就有出過帶住VR去玩過山車，咁帶住VR玩跳樓機大家又有冇試過呢？Gyro Drop係樂天世界喺16年開幕嘅跳樓機，仲設有VR設備，增加刺激感！有70米咁高嘅跳樓機，只係用2秒就由最高點跌到落最低點，唔怪之得係話最刺激嘅機動遊戲之一啦！大家可以睇吓燦烈玩就知有幾刺激！
4. 樂天世界 - 亞特蘭提斯
롯데월드 LOTTE WORLD
過山車同激流嘅混合體，出發1.5秒就加速到去72KM時速！係超高速嘅機動遊戲設施，有好多玩過嘅人都話，係你一世玩過最快同最刺激嘅過山車，睇吓EXO佢哋玩到幾開心就知道有幾好玩！
5. 首爾樂園 - Sky-X
연합뉴스
韓國綜藝節目《Running Man》都有嚟過呢度拍攝，大家記唔記得金鐘國同宋智孝玩一個類似空中飛人嘅機動遊戲呢？就係喺呢度拍㗎啦！Sky-X係結合咗高空跳傘同高空彈跳嘅元素，佢亦都係韓國最早嘅飛行體驗機動遊戲，喺50米嘅高空墜落，帶你去感受刺激感！附近仲有動物園，可以一次過觀賞！
6. 月尾島 - 海盜船
천지일보
海盜船可以話係月尾島嘅標誌，嗰度竟然有四座海盜船俾人玩，就可以睇得出到底佢係有幾咁受歡迎。呢度嘅海盜船差唔多會去到90度角，係韓國人覺得最恐怖同刺激嘅海盜船。
以上就係被韓國人認為最刺激嘅機動遊戲，唔知大家玩過幾多個呢？又或者大家覺得有其他更刺激嘅機動遊戲都可以留言話俾小編知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
