韓國人傾偈常用單字
只係一個感嘆詞都可以有咁多意思？一齊睇吓你識唔識得哂呢幾個韓國人傾偈常用單字啦！
Hello，大家好，我哋係由韓國人每日提供最新韓國旅行資訊嘅Creatrip。
好多韓國人會用Kakaotalk傾偈，講效率嘅佢哋會要求好快嘅打字速度，繼而衍生好多文字傾偈嘅時候先會用嘅單字。
今日小編就嚟介紹韓國人喺文字聊天嘅時候最常用嘅幾個單字！雖然內容應該唔少人都會識，但讀韓文教育學嘅小編會集中講多啲語境之類嘅detail位，希望就算係識呢幾個字嘅朋友都會有幫助啦！
韓國人傾偈常用單字
1. 헐 （Heol）
헐（heol）係韓國人常用嘅單字之一，無論網上傾偈定係日常口語嘅時候都可以用嘅單字。 你唔會喺字典度搵到佢嘅意思，因為嚴格嚟講佢只係一個感嘆詞，用嚟表示對一啲事感到驚訝或者難以置信嘅情況，簡單嚟講同廣東話「吓？真㗎/ 唔係啊嘛？」或者係某啲語境亦同英文嘅「wtf？」相似。
例如
A: 나 오늘 고백 받았어 （今日有人同我表白）
B: 헐! 진짜?/ 헐! 대박! （heol！ 真㗎？/ heol！大發！)
不過一定要注意嘅係使用heol嘅時候嘅語境。雖然文字定口語都用得，而且呢個字出現咗好幾年，已經唔係咩潮語，所以就算對住前輩都未至於會有溝通唔到嘅問題。不過佢都仲係一個偏向informal同年輕嘅感嘆詞，如果喺唔適合嘅情況用嘅話，好容易會俾人覺得你有啲輕浮、 冇禮貌或者幼稚添，所以heol都係對住熟人用安全好多。對住前輩或者陌生人想表示驚訝嘅話，헉（類似倒抽一口氣嘅擬聲詞，係中性啲嘅感嘆詞）＋敬語嚟回覆會安全得多。
2. 음 （Eum）
음（eum）係個非常常見嘅單字，類似我哋會用嘅「嗯」嘅感覺。 當佢自己一個出現嘅時候，可以代表「我知道啦/OK」嘅意思， 不過如果佢自己一粒字出現嘅時候，因為係平語所以淨係可以同熟人用。同樣意思而且發音差唔多嘅仲可以用「응（eung）」。呢個單字如果唔小心同陌生人用咗，韓國人聽落真係會覺得好冇禮貌。小編讀韓文教育堂嘅時候，教授有特別講過好多唔同語系嘅外國人都習慣答問題嘅時候用「嗯」，而唔係「네 （ne）」，令好多韓國人會以為佢哋好冇禮貌而發生不必要嘅誤會同衝突，所以大家都要小心用，務求練到無論對方講咩都反射性自動「네（ne）」先。😂
不過呢個單字都係有第二個常用用法，就係可以用嚟表示諗嘢嘅停頓位啦。用法同其他語言一樣，不過當然最重要係用一定要喺後面加敬語嘅答覆先係有禮貌啦。
例如
（第一個用法：短答/恍然大悟＋敬語）
A: 일단 이 부분을 이렇게 바꿔주세요. 이해되셨죠?（咁唔該將呢個位改成咁樣先，你明啊呵？）
B: 음/응~ 네! 알겠습니다. （嗯~ ne！我知道了。）
（第二個用法：停頓＋敬語）
A: 뭐 먹을래요? （你想食咩啊？）
B: 음..조금만 더 생각해볼게요. （emm...等我再諗多一陣。）
3. 와, 오 (Wa, O)
「와（Wa）」同「오（Ｏ）」其實只係「wa」同「oh」嘅意思，用法同我哋用開嘅一樣，用嚟表示驚訝嘅情況。好多數「wa」同「oh」後面跟嘅會係「진짜？（真係？）/대박！ （大發！）」等嘅詞語。小編都好常用呢兩個感嘆詞，特別係「오」，會連續寫好幾個，再加上回覆。咁樣聽落會係「ohhhh~」拖長語氣嘅意思，所以會有強調自己好驚訝嘅感覺。
例如
A: 야 나 오늘 연예인 봤어! （喂 我今日喺條街撞到藝人！）
B: 오오오오오 대박! 누군데? （ohhh~ 大發！你見到邊個？）
3. 加入終聲"ㅂ"
韓國人好興喺msg嗰度用嘅就係加入終聲「ㅂ」，等個msg嘅語氣冇咁僵硬。「ㅂ」係韓國其中一個子音，佢喺初聲嘅時候會發類似「b」音，喺終聲嘅時候就會發「p」嘅收尾音（類似英文sub, soup, bob之類嘅收音）。而韓國人最常就係會喺「네（ne）」嗰度加「ㅂ」，變成「넵（nep）」，會令成個氣氛親切少少。小編最多係同新朋友傾偈或者自己學系嘅Kakaotalk group入面會用，都有唔少韓國打工仔會用，佢哋話咁樣同上司講嘢，冇咁死板之外，仲更加show到自己有熱誠、 積極同有禮貌嘅感覺喎。
4. 加入ㅇ終聲（Eung）
好多韓國人會加ㅇ(ng)收尾音嚟扮可愛，例如넹（neng）, 안녕하세용 （an nyeong ha se yong）同 반갑습니당（ban gap seum ni dang）等等，不過同樣只限於同熟人講嘢先用得，formal場合扮可愛會令你睇落好幼稚同唔專重場合，所以就絕對唔好用啦。
以上同大家介紹咗幾個韓國人喺用msg傾偈嘅時候常用嘅單字，但好多都始終係informal嘅字，雖然有某啲係可以同敬語一齊用，但喺未完全熟習之前，都係會有用錯嘅風險，所以大家喺學呢啲潮語或者文字聊天用字之前，最重要都係打好敬語個底先，咁嘅話之後學咩都會易上手好多！大家如果想知其他同韓文有關嘅內容，歡迎留言話我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk