東廟跳蚤市場尋寶
時尚達人GD都鐘意去嘅東廟跳蚤市場，一萬won以內就可以買到韓星同款衫？即刻mark低佢之後嚟shopping！
Hello，大家好，我哋係由韓國人每日提供最新韓國旅行資訊嘅Creatrip。
大家嚟首爾玩，廣藏市場或者望遠市場就去得多，但大家又知唔知位於東廟嘅跳蚤市場同樣係shopping嘅好去處呢？今日小編就帶大家一齊去人稱「二手vintage市場」嘅東廟跳蚤市場，教你點樣只用一萬won去執明星同款嘅平貨啦！想著到韓星咁或者冇你想像中咁難！
東廟跳蚤市場
營業時間: 星期一至星期五：14:00 - 20:00、週末：10:00 - 21:00
地址：서울 종로구 숭인동 102-8
東廟位於首爾嘅中心地帶，係熱門嘅購物地區，交通都好方便，只要由東廟地鐵站3號出口行出嚟直行，你就會見到連時尚達人G-Dragon都會嚟shopping嘅跳蚤市場啦！
喺週末跳蚤市場周圍都係人，唔單止老人家，就連好多後生仔都會嚟呢度搵vintage嘅商品，同時大家仲可以喺度搵到好多平價嘅二手物品，例如皮帶、手錶、相機等等。
如果係想慢慢行街揀衫嘅朋友，小編建議平日少啲人嗰陣嚟，呢度啲衫堆喺地上面，所以要有心理準備喺呢度真係要摷衫先會成功「執」到平貨番去！嚟呢度買衫嘅話，你可以完全感受到shopping真係運動嚟！
呢啲一堆堆嘅衫多數都只需要二千至三千won，所以記得一定要停低，唔好錯過買平貨嘅機會啊！
好啦！咁而家就嚟睇吓，用一萬won究竟可以著到同韓星有幾似啦！
7個參考韓星穿搭嘅look
1. 宣美嘅連身裙look
宣美身上呢種vintage感覺嘅連身裙絕對係值得買嘅衫，成日都見佢會著呢啲可愛又色彩繽紛嘅連身裙，究竟小編喺東廟會唔會搵到呢？
行咗好多間鋪之後，小編終於搵到類似嘅連身裙！ 雖然唔係完全一模一樣，但一樣係長袖又係深色系，驟眼睇都有幾份相似啊，係咪？或者好難令人相信，但呢條裙只係賣5000won咋！
因為搵唔到同宣美一樣嘅長boot，所以小編配搭咗一pair去到膝頭嘅黑色長襪，大家又點睇呢？
2. IU嘅紅色恤衫
IU呢件紅色恤衫好易搵而且非常百搭，只係行咗幾間鋪，就輕易咁搵到件相似嘅款，而且佢都係只賣5000won咋！
好難想像只係用五千won就可以輕易變成IU。
3. 泫雅同Jennie嘅長裙
下一個look係泫雅同Jennie上身，適合夏天著嘅長裙，呢條裙一樣好容易就搵到。差唔多款嘅多數喺8000 - 10000won之間，但如果你想再平啲都有2000won嘅選擇㗎！
雖然望落唔係完全一樣，但都已經好似！
著上身就睇落同泫雅嗰條好似樣，唔知大家點睇呢？小編覺得呢條裙算成功！
4. 宣美嘅vintage恤衫
就好似啱啱小編提到，宣美鐘意著啲vintage風嘅衫，而佢身上呢件復古碎花恤衫太特別，令小編好想買同款！
小編喺街鋪上面搵唔到相同嘅碎花恤衫，所以最後唯有去咗跳蚤市場附近一間vintage服裝鋪買。雖然係比街鋪貴少少，不過都唔算太貴，只係8000won，而且quality都幾唔錯！
大家又覺得似唔似呢？只要喺東廟就可以買到咁平嘅靚衫，點解仲要買啲貴衫呢？
5. OH MY GIRL勝熙嘅碎花恤衫
一件可愛嘅碎花恤衫係必備嘅百搭款，因為佢永遠唔會outdated！ 著上身嘅時候，仲可以望落後生啲同時又識打扮添！
搵咗好長時間之後，小編終於搵到件相似嘅款啦！雖然隻色唔同，但成個style都已經好相似，仲要只係2000?定3000won咋！
配搭一條黑色短裙，你就可以重現勝熙個look啦！
6. TWICE娜璉同IU嘅白色連身裙
白色連身裙亦都係夏天唔少得嘅款式之一！ 呢種露膊連身裙或者t-shirt已經流行咗好一段時間啦，一齊嚟搵吓東廟有冇呢款可以令你睇落更白嘅連身裙啦！
白色連身裙一樣係好容易搵到嘅衫，只不過因為係白色，買嘅時候一定要check清楚件衫有冇污漬啊！
大家點睇？似唔似娜璉同IU個look？小編望住呢條裙就即刻諗起TWICE 《Dance The Night Away》嘅MV。
7. 宣美嘅碎花裙
每到春天同夏天，有lace花邊領嘅衫都會重新流行起嚟，當然呢啲款喺東廟都好多地方有得買！
小編喺一間vintage服裝店搵到一件極度相似嘅碎花裙，仲要佢特價緊，所以只係賣10000won咋！
個花邊領幾乎同宣美著住嘅一模一樣，大家話係咪呢？
以上就係今日小編準備嘅7個韓星look啦，唔知大家覺得似唔似呢？大家最鐘意嘅又係邊個look？歡迎留言話俾我哋聽！
東廟真係有好多唔同款式嘅衫，而且大部分仲好平添！只不過要注意嘅係，佢哋好多鋪頭都只係收現金或者銀行轉帳，所以日後如果有機會嚟東廟記得要帶夠現金啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk