Hello，大家好，我哋係由韓國人每日提供最新韓國旅行資訊嘅Creatrip。
大家知唔知其實朝鮮時期都有唔少靚女呢？喺當時大家都會叫呢啲靚女做妓生，今日就想同大家一齊了解吓！
咩係妓生？
當講到朝鮮時代嘅靚女，就唔可以唔提妓生（기생）啦。雖然好多人會覺得妓生係僕人，但其實呢啲妓生精通藝術，而且個個都好靚。就係佢哋個個外貌都好出眾，佢哋成日會喺各種人物肖像畫入面出現。
妓生屬於朝鮮時代嘅賤民階級，佢哋接受各種訓練，就係為咗娛樂貴族階級嘅人。精通文學、唱歌跳舞嘅妓生，多數都係貧困家庭出身。不過就算佢哋社會地位低下，都無可否認妓生喺藝術方面有好深嘅造詣呢個事實，如果特別有能力同學問嘅妓生，甚至可以接受到特別待遇添。有唔少人或者會覺得佢哋同妓女一樣，但事實上妓生並唔會提供性服務，萬一有妓生賣淫嘅話，甚至會遭受到得到負面嘅評價或者唔好嘅待遇。
喺某啲以妓生為主角嘅史劇入面，佢哋被描寫成只要引起高級官吏嘅注意，就可以得到一定程度嘅權力，社會地位都因而提高，但其實呢件事唔太會發生，實際上佢哋只會屬於殘民階級。
今日小編將會主要介紹1910-1945年間活躍於「現代」嘅妓生。
6位值得留意嘅現代妓生
朴溫實 （박온실）
 |  |
朴溫實係活躍於1940年代嘅妓生，佢出身於平壤妓生學校，而且更成為咗第一屆嘅韓國小姐。當時韓國同日本合作舉辦咗一場名為「朝鮮小姐」嘅選美大賽，排名係「真善美」（真為第一、善為第二、美為第三），朴溫實就喺呢個大賽上得到「真」嘅名次。當時不論韓國定日本嘅評審都一致認為，朴溫實嘅美麗、風度同氣質都係實至名歸嘅第一名。
根據記錄，朴溫實係一位好有才華嘅歌手同舞者，當時嘅人不惜排隊等候，就係為親眼睇朴溫實嘅表演一眼。佢唔單止有才華，生得靚之外，性格仲好好，盡得所有人嘅喜愛，佢連身材都好好添，163cm嘅身高當時被公認為「高人」。
之前網上更因為發現朴溫實同前4Mintute嘅智賢撞樣而引起一陣討論添！
吳山月 （오산월）
吳山月係活躍於1920年代嘅妓生，同樣係平壤妓生學校出身嘅佢，喺當年非常受歡迎。當時相片賣出嘅數量係衡量一個妓生受歡迎程度嘅標準，嗰個時候吳山月嘅相賣出嘅數量驚人之餘，有時更會被刊登上報紙，可見佢嘅受歡迎程度。
尹彩善 （윤채선）
尹彩善亦係另一位出身於平壤妓生學校嘅妓生。尹彩善唔算係韓國傳統美人嘅樣貌，但正正因為佢有種現代美，反而更有吸引力。佢以出色嘅跳舞實力聞名， 而且更擁有連而家都好令人羨慕嘅168cm高挑身材添！
張連紅 （장연홍）
 |  |
張連紅都曾經係平壤妓生學校嘅學生，之後亦一直留喺平壤地區活動，係當時平壤最歡迎嘅妓生。根據記錄佢本來出身於富裕人家，只不過家道中落之後，佢就淪落為一位妓生。1925年佢雖然得14歲，但佢嘅美貌就已經可以得到所有人嘅注目。
好多人都被張連紅嘅美貌迷得神魂顛倒，更有啲男人會送高價嘅禮物俾佢，就係為咗曬自己有幾有錢嚟吸引佢嘅注意。做咗短暫嘅妓生之後，張連紅就去咗上海求學。
李蘭香（이난향）
李蘭香可以稱得上係韓國史上最出名同最靚女嘅妓生，佢靠驚人嘅美貌，名聲響遍全國，甚至為國王表演過添。佢唔單止樣靚，而且好有才華，佢除咗精通韓國傳統樂器伽倻琴，仲擅長跳西洋嘅華爾滋同鋼琴添。
右二係李蘭香 (네이버 지식백과)
李蘭香皮膚白晢，身高都有165cm，嗰個年代嘅佢高大又引人注目。佢直到25歲一直都擔任朝鮮妓生學生嘅代表理事，30歲退休嘅時候，同咗《中央日報》一位記者結婚。
喺f(x)嘅Sulli啱啱出道嘅時候，因為同李蘭香實在太似樣，網民對於前者係咪李蘭香嘅轉世有好熱烈嘅爭論。
李玉蘭（이옥란）
曾經就讀於朝鮮妓生學校嘅李玉蘭，據說係好有才華嘅歌手。當年佢嘅歌好似《花一般的純情 （꼿 갓흔 순정）》、《기생 수첩（妓生手冊）》同《눈물의 시집（眼淚的詩集）》等等都因為優雅嘅旋律而大受歡迎。
喺韓國歷史上，以上介紹嘅妓生受歡迎嘅程度甚至可以同而家嘅K-POP偶像媲美。喺嗰個主要只用報紙作為傳遞消息媒介嘅年代，都有人甚至會橫跨半個國家，就係為咗睇呢啲妓生嘅表演。真係好難想像如果呢幾位妓生出生於我哋呢個世代，利用而家嘅SNS究竟可以紅到邊個地步。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
