Hello，大家好，我哋係由韓國人每日提供最新韓國旅行資訊嘅Creatrip。
新一代嘅音源逆行icon！Brave Girls嘅 Rollin'，相信大家都俾佢洗咗腦啦？其實小編都唔例外哈哈。多得Rollin'嘅逆行，Brave Girls嘅第二首歌We Ride都喺各大音源榜慢慢逆行當中。捱咗十年，面臨解散前夕嘅Brave Girls名符其實咁走緊花路！所以最近喺韓國，對於下一首好似Rollin'咁急需要即刻逆行嘅好歌，大家都有好多嘅討論。
今日就等10年K-POP粉絲，自稱K-POP Go In Mul （고인물: 打機用語，意思係好熟悉某一個範疇嘅高手）嘅小編，嚟同大家介紹9首而家最多人提到嘅女團隱藏名曲（숨명）啦！
究竟以下邊首歌會係逆行嘅幸運兒，成為第二首Rollin'呢？
9首音源逆行呼聲最高嘅女團歌曲
1. LABOUM - Journey to Atlantis
第一首係LABOUM喺2016年推出嘅《Journey to Atlantis》！呢首真係可以話得到壓倒性嘅支持，除咗佢真係好好聽，歌詞同旋律都充滿夢幻嘅童話色彩之外，佢都同Rollin'一樣係得到廣大韓國軍人喜愛嘅歌之一！而且連成員自己都話好對不住呢首歌，因為佢哋唔夠紅，令呢首好歌得唔到應有嘅關注...ㅠㅠ。小編見到好多軍人網民都表示：「LABOUM嘅歌陪佢哋渡過咗辛苦嘅軍中生活」，除咗呢首之外，仲提到《AALOW AALOW》、《Hwi Hwi》、 《Shooting Love》等等嘅歌添。呢首亦係小編希望逆行嘅名曲之一，小編聽咗幾年都仲係覺得好好聽！
2. OH MY GIRL - Closer
下一首係同樣捱咗好多年先出頭嘅OH MY GIRL喺2015年推出嘅《Closer》！呢首亦係小編認識OH MY GIRL嘅第一首歌，仲記得當年因為《Closer》唯美嘅星座編舞而喺網上引起一陣討論，令小編先好奇咁搵嚟聽，然後喺高音部分俾主唱勝熙嘅音色驚艷到嘅心情。呢首真係夢幻淒美嘅代名詞，係同《Journey to Atlantis》唔一樣嘅童話風。連成員都話，呢種係當時嘅OH MY GIRL先表達到嘅氣氛，而家好難再呈現就知呢首歌係幾咁唯美啦！非常推介大家去睇佢哋一條由頭頂影落去嘅舞蹈片，去搵吓隱藏嘅星座編舞，另外OH MY GIRL嘅歌入面，好多人提到嘅仲有B1A4振永創作嘅名曲《One Step Two Steps》同好特別嘅清涼印度風歌曲《Windy Day》添。（特別One Step, Two Step完全係小編pick）
3. DIA - On the road
同其他隱藏名曲一齊成日俾人提到嘅仲有DIA嘅《On the road》，呢首歌係當年彩娟以I.O.I成員出道之後，同時又以DIA成員參加嘅一次回歸，雖然喺各大音源榜都成功得到前30名嘅成績，但仍然好多人都唔太認識呢首清純可愛嘅名曲。佢哋嘅歌入面，仲有好多人提到出道歌《Somehow》，呢首都一樣好好聽， 而且呢首歌嘅MV更喺香港取境！一路聽歌一路可以見到好多香港嘅景色，非常特別！
4. 9MUSES - Dolls
2010年以9人出道嘅9MUSES，經歷過多次成員更替，之後更喺2019年解散。不過佢哋9年嚟其實推出咗好多好歌，其中好多人覺得需要逆行嘅係2013年加入新成員成雅，變番9人制之後推出嘅《Dolls》。其實呢首已經可以稱得上係佢哋最紅嘅歌，旋律同concept好之外，更加突顯到佢哋主唱line嘅實力添。之後喺同年更一連推出咗《Wild》、《Gun》同《Glue》三首好歌，令2013年可以稱得上為9MUSES嘅全盛期，只可惜每次回歸都係冇驚人嘅突破，甚至連一個一位都攞唔到。加上佢哋再次出現成員更替， 最後好可惜地解散。作為K-POP老粉絲，呢4首歌紅唔起真係覺得好可惜，特別係《Dolls》。
5. EXID - Every Night
EXID除咗《Up&Down》之外，其實《Every Night》都係一首急需要逆行嘅名曲！《Every Night》係2012年成員LE所創作嘅歌，係一首好有氣氛嘅抒情歌，主唱率智嘅音色真係好好聽。只可惜唔係多人認識，連成員都話係一首好可惜紅唔起嘅歌。雖然MV係有啲令人費解同驚嚇...但無可否認係首好歌！
6. Hello Venus - Would You Stay For Tea?
2012年由Pledis娛樂同Fantagio合作推出嘅Hello Venus，佢哋喺2013年發表嘅《Would you stay for tea?》亦係好多人提到嘅隱藏名曲！呢首清純可愛嘅歌係日後同GFRIEND多次合作嘅製作人이기용배嘅初期作品，雖然推出初期唔係好多人識，到而家都係得部分K-POP老粉絲先知道，但真係首好歌嚟，推介大家去聽吓。
7. After School - Shampoo
After School喺2011年發表嘅《Shampoo》都係好多人提到嘅名曲。小編仲記得好多年前第一次聽，俾呢首歌嘅旋律驚艷到嘅感覺...有啲傷心又夢幻嘅氣氛，加上優美嘅琴聲，真心覺得只係個intro已經嬴咗..每次聽都會有種難以形容嘅感覺，過咗咁多年，都係小編心目中二代女團嘅名曲之一!
8. 宇宙少女 - I Wish
2016年出道嘅宇宙少女係韓國Starship娛樂同中國樂華娛樂合作推出嘅女團，佢哋都有好多隱藏名曲，而且2019年推出嘅 《As You Wish》亦喺今年元旦當日成功逆行添。只不過除咗呢首之外，佢哋嘅《I Wish》都好多人提到話希望逆行，呢首夢幻風嘅歌推出當年其實成績都唔算太差，只不過仲係出道初期唔係好多人識得，所以有唔少人都覺得好可惜，希望有機會可以逆行。小編個人最推介《Dreams Come True》同《Save Me, Save You》，雖然呢兩首成績都幾好，分別攞到一位後補同一位，但仍然希望有多啲人認識！
9. Apink - Only One
最後一首係長壽女團Apink嘅《Only One》! 呢首歌其實都唔算成績好差，但對於Apink嚟講卻係少數攞唔到一位嘅歌之一，令好多粉絲都覺得好可惜。《Only One》係Apink轉型後，類似《LUV》嗰種清純優雅風格嘅歌，非常推薦大家去聽。
因為男女粉絲比例等等嘅原因，其實小編覺得K-POP女團嘅生存或者仲難過男團，所以真係有好多滄海遺珠嘅名曲，例如有小編私心推薦The Ark嘅《The Light》、SPICA嘅《Tonight》、 SONAMOO嘅《I Like U Too Much》同Dreamcatcher嘅《Full Moon》、 《Deja Vu》、 《YOU AND I》等等，多到不能盡錄。不過以上就係9首而家最多韓國網民希望可以逆行嘅女團名曲啦！唔知大家又識得幾多首呢？除咗以上嘅歌之外，大家心目中又希望咩歌可以逆行呢？歡迎留言分享俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
