Hello，大家好 ，我哋係由韓國人每日提供最新韓國旅行資訊嘅Creatrip。
今日小編就會同大家一齊比較一吓16年前嘅首爾同而家嘅首爾分別！應該都會有人會好奇點解偏偏係要16年前嘅首爾？
其實係因為小編之前睇咗喺2007年播出嘅《無限挑戰》首爾遊覽特輯。《無限挑戰》係韓國傳奇嘅綜藝節目，13年入面一直備受喜愛嘅歷代韓國綜藝節目嚟㗎！
YouTube MBC entertainment
而「首爾遊覽特輯」就係由6位成員各自淨係帶5000韓幣嘅交通卡往返首爾執行任務嘅特輯！通過呢次嘅重播再次睇返當年首爾嘅面貌，小編感覺好新奇，覺得同而家嘅首爾變化好大，所以就好想同大家分享！
1. 手機![2007年韓國《無限挑戰》綜藝節目截圖，展示各種不同設計的翻蓋手機，代表當時流行的手機款式。]()
유튜브 MBC entertainment
大家又知唔知iPhone首次喺韓國上市就係喺2009年，所以喺07年嘅時候係冇人用智能手機㗎！
喺相入面可以睇到各種各樣嘅手機，雖然而家嘅智能手機大部分都係設計好相似，不過當時嘅手機係有好多唔同嘅設計㗎。
最近嘅智能手機除咗幾個機型外，全部都係單面全觸屏手機，當時有摺疊式手機、滑蓋手機、變形滑蓋手機等多種設計！ 相信大家有好款都有見過！
인터넷 커뮤니티
嗰時嘅韓國手機名係會同代言人一齊發佈同手機相關嘅歌曲，真係好有趣㗎！曾經係「Nori」代言人嘅2PM唱嘅「Nori For You」、曾經係「Lollipop」代言人BIGBANG同2NE1嘅「LOLLIPOP」、同曾經係「Chocolate phone」代言嘅少女時代同f(x)嘅「Chocolate love」等，係當時最大嘅趣味之一。
小編最記得嘅就係細個係最興「icecream」同「Lollipop」手機，真係幾乎個個朋友都有一部，覺得真係超靚，超可愛，唔知道大家又有冇擁有過呢？
2. 數碼相機
另外睇到當時嘅人爲咗影相都會帶住數碼相機！ 最近智能手機嘅鏡頭巳經好好，如果唔係性能特別好嘅相機的話，幾乎係同一般相機冇咩分別。 不過嗰時嘅手機鏡頭就唔係咁好，當時最受歡迎嘅手機都係得130萬像素，比起而家iPhone12嘅1200萬像素真係差好遠。
當時《無限挑戰》嘅人氣真係好高，所以成員經過嘅時候，市民都會用手機影相，仲有啲人係攞數碼相機去影。
回想返細細個嗰陣，小編同屋企人去旅行嗰陣，都一定會帶住數位相機同電池出門口，甚至仲會定期去曬相舖將啲相曬出嚟！
3. 紙張地圖
就如頭先所講，成員嘅任務就係利用大衆交通去首爾某個目的地，而家藝人去到邊好多時都會有經理人車出車入，不過當時成員就要自己睇住地圖同地鐵路線圖去搵路！ 小編亦都真係好耐冇見過紙張地圖同路線圖， 睇返都覺得好新奇。
不過同時睇落都覺得嗰時用嘅地圖都幾唔方便，太大張嘅話，一路睇一路睇都會好麻煩。
最近大家都係用緊手機地圖app，有咗佢真係好方便！ 雖然全世界最常用係「Google地圖」，不過小編個人覺得嚟到韓國，都係用「kakaomap」或者「navermap」會比率方便同準確。
4. 有線耳機
隨住科技越嚟越發達，用無線耳機嘅人都越嚟越多，不過喺以前，大部份人都係用有線耳機。
theqoo
啱啱無線耳機開始嘅時候都仲係覺得好奇怪，但係而家如果見到有人用有線耳機的話，反而會覺得好神奇。
5. 睇報紙
睇到呢個畫面，小編突然諗返去以前都有好多人喺搭地鐵嗰陣睇報紙，地鐵入口擺咗好多免費報紙可以俾人攞嚟睇。
연합뉴스
不過而家大多數都係睇電話多，每個人都慢慢變成一個低頭族。
6. 地鐵幕門
首爾首次設置地鐵幕門嘅時候係喺2006年，之後再一步一步咁擴張，所以喺07年拍攝呢個節目嘅時候，都仲可以睇到好多地鐵仲未安裝地鐵幕門。
當然而家大部分嘅地鐵站都巳經安裝咗！ 呢個係爲咗防止因為失誤而跌落列車軌道，確實安裝咗幕門的話，真係安全好多。
7. 車票
大家睇唔睇到紅色圓圈嘅部分呢？ 嗰個位就係放老式紙車票嘅位嚟啦！
不過09年之後紙質車票就被全面取消，呢種形狀嘅入閘口都跟住消失埋。
直到而家全部都變成啪卡形式。
8. 舊式雜貨舖
睇唔到睇劉在錫後面嘅店鋪呢？ 嗰啲店喺韓國被稱爲「雜貨鋪」，係指個人經營，而且規模好細嘅超市。 睇到呢條片，令小編覺得好新奇嘅係，以前喺首爾市中心有咁多雜貨鋪，點解最近咁難喺街度見到嘅呢？小編上網搵咗一搵，17年嘅調查結果顯示，10年之間有大約3萬間雜貨鋪消失咗！ 取而代之嘅係便利店嘅數量暴增。 喺韓國有時真係誇張到行十步都可以搵到一、兩間。
매일 경제, 인사이트
當然嗰陣時就巳經有便利店嘅出現，不過韓國人就對雜貨鋪比較熟悉，無論買啲咩最先諗到嘅都會係雜貨鋪。
전자신문, 카카오페이 블로그
不過隨住便利店嘅服務同商品都大幅度好轉，令到雜貨鋪都開始慢慢消失，而家就變成咗便利店嘅鼎盛時代！
네이버 포스트 김휴림의 엽서
不過有時都會令人好懷念以前啲雜貨鋪，因爲成日都有大叔或者大嬸喺度，所以每次去的話，有時仲會得到優惠，體會到韓國人嘅「情」意~
9. Skyline
左邊係節目入面嘅首爾風景，右邊就係而家嘅首爾風景。 07年嘅時候首爾嘅高層建築仲未有而家咁多，雖然嗰陣都係有好多建築物，不過大部分嘅都係公寓！
不過最近出現咗好多呢啲高層建築，一睇就可以感覺到呢16年以嚟韓國發展得真係好快！
10. 相似之處
ST 컬쳐
呢度係東大入口站嘅3號出口，後面就可以睇獎忠體育館！ MONSTA X、 iKON、 I.O.I等好多偶像團體都喺呢度演出過！除咗因爲建築物嘅設計有啲變化之外，其他都好似係一樣？
하얏트 호텔
呢度其實係南山嘅凱悅酒店，係1978年開業嘅五星級酒店！左圖雖然畫質唔係太好，不過都應該睇得出係一樣嘅？
네이버 블로그 청조잡문
而呢度就係梨泰院4號出口嘅海米爾頓酒店，由梨泰院站4號出口出嚟就可以即刻搵到梨泰院嘅地標，佢喺1973年開張，到而家已經有48年歷史啦！
大家睇完有冇覺得呢16年以嚟，首爾真係發展得好快呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
