Hello，大家好，我哋係由韓國人每日提供最新韓國旅行資訊嘅Creatrip。
近年越嚟越多韓國人都表示未來唔打算結婚，根據求職網站JobKorea同Albamon嘅調查，只係得33.3%嘅人表示佢哋有結婚嘅打算。而其中就算係想結婚嘅人，佢哋對另一半嘅要求都比以前更嚴格。由準備新屋同開始新生活，冇一樣係唔使用錢嘅。只不過近十年男性對另一半嘅要求雖然高咗，女性卻反而低咗。究竟個原因係咩呢？
異性戀所追求嘅理想配偶形象
男性對「配偶理想年薪」變高
- 年薪：4,194萬won
- 財產：1億6,948萬won
- 身高：164cm
- 年紀差：兩歲年下
根據結婚情報公司Duo，未婚男性理想嘅未來妻子係擁有年薪4,194萬won（交稅後大概350萬won）、財產1億6,948萬won同164cm嘅身高。當中有30.7%人認為最理想嘅年紀差係3至4歲，平均嚟睇係希望另一半可以細自己2.2歲。
韓劇《未生》
結婚相關企業認為，男性對女性嘅年薪要求高咗係因為經濟方面嘅問題。
近年首爾嘅樓價升咗好多，全世界咁睇首爾已經變成繼香港之後樓價最貴嘅地方，令韓國人都認為用人工冇咩可能會買到樓，再加上物價亦都上升咗唔少，各種經濟上嘅負擔令男性對女性嘅年薪要求更高。
另一方面，女性追求嘅理想配偶形象係？
- 年薪：5,319萬won
- 財產：2億 5,000萬won
- 身高：177.4cm
- 年紀差：1.2歲年上
根據結婚情報公司Duo，未婚女性嘅理想未來丈夫係擁有年薪5,319萬won、財產2億5,000萬won同177.4cm嘅身高。
對於年紀差，女性都同男性一樣有25.4%嘅人表示，最理想嘅年紀差為3至4歲年上。不過平均嚟睇就係1.2歲嘅差異，比男性嘅平均理想年紀差相差1年。
對於配偶嘅理想年薪
根據近10幾年嘅數據統計，男女雙方對配偶理想年薪嘅差異逐漸減少。
2008年男性對配偶嘅理想年薪係3,655萬won，女性嘅係6,027萬won，兩者足足相差2,372萬won。不過到咗2018年，兩者嘅差異就跌到得1,125萬won。
同2002年比較嘅話，對於配偶理想嘅年薪，男性係2,300萬won，而女性係3,650萬won。而到咗2018年，男性對於配偶理想嘅年薪升咗1,894萬wonz，到咗4194萬won，之但係女性就只係升咗1,669萬won，得5319萬won。對於呢個情況，比起女性嘅要求低咗，係男性嘅要求高咗先啱，原因有以下呢啲。
韓國係女性工作最困難國家嘅第一名
根據英國經濟專門雜誌《經濟學人》對於29個國家女性工作容易程度嘅調查結果，韓國連續9年都係位於最低嘅29個位，2021年嘅排名仍然冇變。
呢個統計係根據女性經濟活動嘅參與率、生仔之後繼續番工嘅比率、女性佔公司高層成員嘅比率、男女嘅年薪差異同女性佔國會議員嘅比率等等，10個項目去比較而統計出嚟嘅結果，可以發現以上項目嘅男女差別都好大。
每年統計都位於最低29位嘅韓國，就連結婚率同出生率都每年下降緊，因而衍生好多唔同嘅社會問題。而有專家認為，呢個結果係因為好多男性會覺得「女性結婚生仔之後就唔應該做嘢」--> 「所以女人喺結婚之前就應該要有良好嘅經濟能力」嘅公式所導致。
已婚男女嘅理想形象
除咗對配偶嘅理想年薪有變，就連對已婚男女標準model嘅形象都有所改變。
2020年對於成功嘅已婚男性嘅形象係36.3歲、年薪5,000-6,000萬won、一般office工同身高175.5cm。而女性係33.3歲、年薪3,000-4,000萬won、一般office同身高163.1cm。同2005年嘅數據比較嘅話，理想年紀增加咗3歲，理想年薪增加2000萬（女性為增加1000萬），而理想身高都增加咗1cm。
不過上面嘅數據就好似標題所講只係理想型，就好似好多人會想同BTS或者TWICE結婚一樣 。實際上根據就業情報公司Incruit嘅數據，將問題改成「未來配偶最少嘅年薪係？」嘅時候，好多人都表示低過平均年薪嘅27%都可以。
結婚係好睇當時社會環境而決定嘅事之一，雖然越嚟越多人實行不婚主義同不生育主義，而呢樣嘢的確會造成唔少社會問題，但一日社會環境或者風氣冇改善，呢種心態都好難喺一朝一夕改變。大家對結婚同理想嘅另一半又有咩諗法呢？歡迎留言同我哋分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
