Hello，大家好，我哋係由韓國人每日提供最新韓國旅行資訊嘅Creatrip。
應該好多人就算唔太清楚韓國都好，都知道韓國人有好多人都係姓「金、李、朴」。根據韓國喺2015年嘅人口普查嘅資料顯示，韓國前五大姓係金(21%)、李(14.3%)、朴(8.2%)、崔(4.6%)、鄭(4.2%)，大家都可以睇到，呢五個姓巳經佔咗韓國總人口50%以上，但係點解「金、李、朴」會佔咗咁多比例呢？今日小編就會同大家講吓韓國人姓氏嘅秘密啦！
생활정보
南韓有句俗言係：「用一粒石頭喺南山上面扔落去，被石頭扔到嘅人唔係姓金、朴就係姓李。（남산에서 돌던지면 「김,박,이」중에서 맞는다）」。大家又知唔知，原來韓國人本來係冇姓氏，係隨着高句麗喺西元一世紀嘅時候，跟隨中國逐漸接受用姓氏命名嘅方法，而百濟同新羅都分別喺四世紀同六世紀開始用姓氏。而且嗰陣時係得皇室同貴族先會用，因為佢哋覺得用中國姓氏可以令自己變得更高貴，所以嗰陣時姓氏就成為咗身份嘅象徵。
由於受到中國文化嘅影響，所以韓國人嘅姓氏同中國人嘅姓氏有好多都係好似。韓國人嘅姓氏都有單姓同複姓之分。單姓最常見嘅就係金、李、朴、崔、鄭、姜等姓，而複姓就有司空、諸葛、獨孤、鮮於、皇甫、南宮等等。
스포츠월드
因為嗰陣時嘅姓氏係皇族同少數貴族（古代朝鮮稱兩班）先至有嘅特權，奴隸、屠夫、巫師、娼妓等賤民，甚至工匠、商人、僧侶都唔可以擁有姓氏嘅權利。然而因為地方仕紳勢力崛起，為咗吸納忠臣同朝中大臣，高麗王朝（918–1392）開國君主王建就諗住用賜姓呢一招，令姓氏唔再係皇室貴族獨有嘅象徵。另外，喺1047年嘅時候，由於朝廷希望為社會唔同階層提供晉升機會，所以就實行咗科舉制度，仲要求所有參加科舉嘅人都要擁有姓氏，令到姓氏喺韓國就變得更加普及。
唔單止達官貴人屋企可以擁有姓氏，成功發跡嘅商人可以擁有姓氏嘅都日漸普遍，佢哋會用錢去買啲上流人家嘅族譜，可能係嚟自破產嘅兩班貴族，要求擁有姓氏嘅家族喺族譜上面寫底自己個名去獲收姓氏。
글로벌이코노믹
而到咗1894年，朝鮮廢除咗階級制度，允許平民擁都可以有自己嘅姓氏。社會地位比較低嘅人，通常會選擇主人或者上流人士嘅姓氏。而喺1909年，韓國更加要求每個人都必須擁有姓氏，所以國民都傾向用當時嘅主流姓氏作為自己嘅姓氏，所以令常見嘅姓氏更加常見！而李氏同金氏係古代朝鮮皇族常見嘅姓氏，所以深受地方權貴青睞，平民百姓獲准冠上姓氏之後，都一窩蜂去揀姓金或者姓李。
同埋韓國人互相介紹嘅時候，唔單止講自己姓咩，仲會喺前面加埋祖籍，去區別血統。例如姓金的話，就有廣州金氏、安東金氏、義城金氏、慶州金氏等；姓李嘅就有光山李氏、延安李氏、韓山李氏等。因為韓國嘅姓氏唔係有好多個，難保彼此之間會唔會有血緣關係，於是朝鮮王朝晚期就嚴禁同姓同祖籍嘅人通婚，直到一九九七年先至解除。
以上就係大多數韓國人都係姓「金」、「李」、「朴」嘅原因，大家有冇覺得好神奇呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
