Hello，大家好，我哋係由韓國人每日提供最新韓國旅行資訊嘅Creatrip。
2021年2月，Netflix通過YouTube live宣布今年將會喺韓國投資5億美元嘅計劃，總共有13個令人期待嘅韓國節目會喺今年同大家見面，等我哋一齊嚟睇吓有啲咩節目啦！
2021年喺Netflix會上映嘅新節目
1. 樂園之夜
電影
主演： 嚴泰九、全汝彬、車勝元
導演：朴勳政
類型：動作、劇情、犯罪
預訂上映日期：2021年4月9號
《樂園之夜》係講一個試圖離開自己幫派後，失去咗親家姐同侄仔嘅男主角泰久（Tae-goo），同一個身患絕症嘅女主角在妍（Jae-yeon）之間嘅故事。呢部電影喺2020年9月第77屆威尼斯國際電影節上首映，並會喺2021年4月9號喺190個國家嘅Netflix上映。
2. 希望明天地球滅亡
![내일 지구가 망해버렸으면 좋겠어 - 希望明天地球滅亡]()
Netflix 原創情境劇
主演：朴世阮、申泫勝、崔榮宰、Minnie、韓炫旻
導演:：權益俊
呢套劇嘅設定係喺首爾一間大學嘅國際宿舍，講述呢間宿舍入面發生嘅友情同愛情故事。導演權益俊嘅代表作包括經典情境劇《三男三女》同《Nonstop》系列劇集。
3. 李壽根的眼色教練
Netflix 原創喜劇
主演：李壽根
呢個節目特別請嚟搞笑藝人李壽根，記錄佢同已經厭倦生活嘅聽眾，進行諮詢嘅過程。李壽根出道25年，至今出演咗多個綜藝節目，包括《認識的哥哥》、《你儘管問》、《新西遊記》同《都市漁夫》等等。
4. Paik's Spirit
Netflix 原創綜藝
主演：白種元
韓國明星廚師兼企業家白種元將會同唔同嘅韓國名人食飯，並分享佢哋生命中嘅趣事。同時呢個節目亦會介紹韓國傳統美食同酒類，以加深觀眾對呢種文化嘅了解。
5. 寂靜的大海
Netflix 原創劇集
主演：裴斗娜、孔劉、李準
類型：劇情、科幻
導演：崔恆勇
集數：8
《寂靜的大海》係Netflix原創劇集，講述未來嘅地球因為沙漠化而將會面臨食糧同水資源短缺嘅問題，繼而訓練出一群精英去解決呢個問題嘅故事。呢部劇集改編於崔恆勇嘅同名短篇電影，當時呢部短篇電影喺2014年第13屆Mise-en-scene短篇電影節受到好多嘅關注。演員鄭雨盛亦都會擔任呢套戲嘅製作人，而其他同樣出名嘅演員裴斗娜，孔劉同李準則會扮演喺月球冒住生命危險執行任務嘅太空員角色。
6. D.P
Netflix 原創電影
主演：丁海寅、金成鈞、具教煥
導演：韓俊熙
類型：動作、劇情
呢套劇集嘅原著係Lezhin Comics上面嘅一篇網絡漫畫「D.P. 狗之日」，劇集講述一位叫「俊昊」嘅二等兵，喺同其他韓國青年一樣服兵役途中，突然被調派去D.P （Deserter Pursuit）捉逃兵嘅故事，真實咁刻劃而家韓國軍隊入面嘅人權同暴力問題。「D.P.」喺2020年9月至2021年2月拍攝，目前處於製作嘅後半部分。
7. My Name
Netflix 原創劇集
主演：韓韶禧、朴喜洵、安普賢
導演：金鎮敏
類型：動作、警匪、劇情
呢套係關於「智友」（韓韶禧飾演）為咗查清自己阿爸死亡嘅真相，而加入一個組織做卧底嘅故事。舊年因為《夫婦的世界》而得到好多關注嘅韓韶禧擔正做女主角，加上拍檔演員朴喜洵同安普賢，而且導演金鎮敏更加執導過上年紅劇之一嘅《人文教育101》，令好多人都好期待「My Name」呢部作品。
8. Move To Heaven: 我是遺物整理師
Netflix 原創劇集
主演：李帝勳、湯峻相
導演：金成浩
類型：劇情
《Move to Heaven》講述監護人相久（Sang-gu） 同一個患有亞氏保加症嘅青年嘅故事，佢哋兩個一齊經營一間專門整理遺物嘅公司，並喺過程中發現一個又一個死者留低嘅故事。
9. 魷魚遊戲
Netflix原創劇集
主演：李政宰、朴海秀
導演：黃東赫
類型：動作、劇情
劇情講述主角兩人，為咗得到高達465億won嘅獎金而參加生存遊戲嘅故事。參加者冒住生命危險參加遊戲，作出選擇時候嘅掙扎將會係好多觀眾期待嘅情節。
李政宰將會飾演失去工作之後跌入人生低谷嘅「基勳」，朴海秀則飾演「基勳」嘅兒時玩伴，因為盜用公款而需要還債嘅「相宇」一角。
10. 喜歡的話請響鈴
Netflix 原創劇集
主演：金所泫、宋江、鄭家藍、高旻示
導演：金振宇
類型：愛情、劇情
播出日期、2021年3月12號
集數：8 （第一季）， 6 （第二季）
呢個故事翻拍Daum上面同名嘅網絡漫畫，講述一位女高中生，佢生活嘅世界裡面有一個app，只要鐘意嘅人出現喺自己身邊，就會通知你嘅故事。
雖然已經結束咗，但大家睇完又覺得點呢？
11. 地獄
Netflix原創劇集
主演：劉亞仁、朴正民、金賢珠
導演：延尚旻
類型：奇幻、超自然
《地獄》係一個奇幻嘅故事，故事入面人會冇預警咁遇到地獄使者，然後會被判落地獄，而且更出現咗一個新嘅宗教，令呢個本身就已經夠複雜嘅世界變得更加混亂。
呢逝劇集嘅原著係Naver上連載嘅一篇網絡漫畫，因為係由網絡漫畫家崔圭錫同導演延尚旻共同創作嘅漫畫，所以一開始就得到唔少嘅關注。延尚旻曾經執導多套同喪屍有關嘅電影，色括「屍殺列車」，「屍殺半島」同「屍殺前傳:首爾站」，令佢嘅影迷更加期待呢套劇集嘅播出。
12. 現在我們學校
Netflix原創劇集
主演：朴智厚、尹燦榮
導演：李在奎
類型：恐怖、喪屍、動作
呢套劇講述一間高中爆發咗喪屍病毒，一班高中生被困喺學校而要同喪屍戰鬥嘅故事。原著嚟自一部同名嘅網絡漫畫，係一部2009年發布當時就喺Naver網絡漫畫排行第一嘅作品，所以有好多粉絲都好期待可以睇到呢部漫畫嘅劇集版。
13. 屍戰朝鮮: 雅信傅
Netflix 原創劇集/番外
主演：全智賢、朴秉恩
導演：金成勳
呢套係好高人氣嘅《屍戰朝鮮》嘅番外篇，講述北方部落繼承人雅信（全智賢飾演）嘅身份同背景故事。就算只係番外，好多苦等第三季嘅觀眾都好開心，因為佢哋可以更加認識全智賢劇中嘅角色。
Netflix喺製造韓劇方面真係好大手筆，只係睇簡介就已經覺得好多套都會好精彩！大家又最期待邊一套呢？歡迎留言話我哋知啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
