釜山西面「33gate」
釜山西面大熱cafe，以機場做主題，令人好似短暫出咗一次國咁？
황요산
4 years ago
Hello，大家好，我哋係由韓國人每日提供最新韓國旅行資訊嘅Creatrip。
喺疫情底下大家都冇得去旅行，大多數都只可以留喺屋企，點知釜山最近就有一間大熱cafe！佢以機場做主題，相當之特別，每一個角落都可以成為打卡位，有興趣嘅朋友就要繼續睇落去啦！
釜山西面 33gate
- 地址：부산진구 서전로37번길 20, A 마동 201호
- 營業時間：星期二至日12:00-21:00、逢星期一休息
- 小Tips：西面站12號出口行大約4分鐘就會到
雖然只睇外觀可能都覺得有啲簡陋，不過上到去大家就會覺得好有驚喜！
等於好耐冇出過國嘅小編嚟講，只係望到呢個牌已經好心動，連落單嘅位都好似做到機場一模一樣咁。呢度Menu唔多，雖然全部都只係得韓文，不過大家只要用iPad向左或右拉，就可以見到晒所有食物同埋飲品嘅相。
因為而家係疫情期間，所以去到嘅時候都要量體溫，左上角綠色係消毒噴霧。
落完單之後，老闆就會畀兩張機票（一杯一張）大家，名嗰格係空白，大家可以用打印機去印自己個名，用法一啲都唔難，只要打完自己個名，撳左上角嘅인쇄制就可以。
呢度嘅位唔算多，大概只係得七張枱左右，所以一開始小編都等咗一陣先入到去。
拎住張機票喺前面呢度打卡，係咪即刻覺得好似去咗旅行咁呢。
飲品方面小編叫咗士多啤梨奶同咖啡鮮奶，特別想同大家推薦佢哋嘅士多啤梨奶，有淡淡果肉，而且好濃郁唔會太甜，好好飲！
而最吸引人嚟嘅仲有呢個打卡位！拖住行李企喺前面影，真係令人覺得好似要飛一轉咁。
雖然只係一個短暫嘅旅程，不過長期冇得飛，可以去啲咁有特色嘅cafe打卡都好唔錯！ 希望疫情早日好轉，各國早日可以開關，大家就可以去個真真正正嘅旅行啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk