電影《勝利號》介紹
宋仲基×金泰梨新作《勝利號》喺Netflix全球上映！係韓國史上第一部宇宙科幻片？
Hello，大家好，我哋係由韓國人話你知每日最新韓國資訊嘅Creatrip。
＃勝利號＃Netflix
＃宋仲基＃金泰梨
＃韓國電影＃劇情
集合咗宋仲基、金泰梨等超強演員，喺2019年進行拍攝，原訂喺20年上映，但因為疫情只可以一直延期嘅電影《勝利號》。最終跳過咗戲院上映，直接透過Netflix向全世界公開。
韓國第一部宇宙科幻大作，為咗營造前所未有嘅韓國宇宙世界觀，斥資超過240億韓元拍攝，要有600萬名以上嘅觀眾先可以達成損益平衡嘅《勝利號》，到底係部咩電影呢？我哋一齊睇落去啦！
✨馬上Follow我哋IG
instagram.com/creatrip.hk
《勝利號》宣傳方式
首爾江南站前面有UFO墜毀？《勝利號》為咗達到宣傳效果，喺江南站前面設置咗墜毀飛船區域，仲拉起咗封鎖線，令人忍唔住讚嘆《勝利號》嘅宣傳技巧。
《勝利號》劇情大綱
21世紀末期2092年，冇被選取成為UTS新移民計畫嘅三個人加一個機器人，駕駛宇宙飛船「勝利號」穿梭喺宇宙。試圖喺巳經荒廢咗嘅地球同太空之間搵可以變賣嘅太空垃圾嘅時候，就發現咗可以造成大規模殺傷性武器嘅人形機器人「Dorothy」。
睇落天真無邪嘅細路女，竟然係被宇宙警察通緝嘅殺人武器？「勝利號」嘅成員就試圖以Dorothy做籌碼進行危險交易，但喺過程入面竟然歷經咗多次生死……
《勝利號》角色介紹
宋仲基（飾演 泰浩/태호）
原本係人類移民計畫之一嘅成員，但就陰錯陽差咁淪落做咗貧民，只可以生活喺荒蕪嘅地球。
之後泰浩就加入咗「勝利號」嘅團隊做飛行員，為咗錢同目標而不擇手段，穿梭喺宇宙搵可以變賣嘅垃圾。
金泰梨（飾演 張船長/장선장）
勝利號嘅核心，同時亦都係是宇宙海盜，被稱為「魔女」嘅張船長。身手敏捷同個性外冷內熱，係韓國第一個女船長。
柳海真（飾演 업동이）
「勝利號」嘅追捕用機器人，雖然唔係人類，但就有同其他成員深厚嘅默契同情感。
陳善奎（飾演 泰格·帕克/타이거 박）
「勝利號」機師泰格·帕克，雷鬼頭係佢嘅招牌標誌。
《勝利號》必睇亮點
《勝利號》嘅必睇亮點之一，莫過於男神宋仲基回歸。自從2019年傳出婚變消息之後就積極拍攝工作，今年終於都帶住電影《勝利號》回歸。
除此之外，宋仲基同玉澤演、全汝彬共同出演嘅tvN韓劇《Vincenzo》都將會喺2月20號首播，對粉絲嚟講係個好消息！
不過《勝利號》嘅必睇亮點除咗金泰梨、陳善奎等超強班底出演之外，柳海真更加係以幕後形式（配音、動態捕捉）出演《勝利號》入面嘅機器人角色，預料會幫故事增加唔少輕鬆元素。
喺韓國電影歷史上，從未有一部以「韓國人」做背景嘅太空科幻片，《勝利號》可以話係歷史以來第一部。
而飾演張艦長嘅金泰梨亦都係韓國電影歷史上第一個女船長，被稱為太空魔女嘅她將會同為咗錢而不擇手段嘅泰浩（宋仲基 飾演），擦出點樣嘅火花呢？
另外，根據媒體報導，《勝利號》斥資咗240億韓幣拍攝，根據估算，需要至少600萬名以上觀眾先可以達成損益平衡，但因為疫情而遲遲唔敢上映，最終係Netflix以310億韓幣天價買咗版權，向全世界公開。
導演趙成熙同演員，都對《勝利號》嘅公開有極大嘅信心，而呢個都係宋仲基喺《狼少年》同趙成熙合作之後再次同台。
而《勝利號》展現出嘅宇宙，將會以「韓國人」嘅角度同性格為主體出發。呢個都係導演極力推行《勝利號》嘅重點。
《勝利號》漫畫
除咗電影之外，2020年五月，《勝利號》嘅漫畫版都喺KakaoPage同Daum Webtoon連載，被視為電影嘅漫畫前傳，講述泰浩加入UTS嘅故事。
劇情有4成左右同電影版唔同，係基於原有世界觀衍生嘅全新故事。
以上就係Netflix電影《勝利號》介紹，最近因為疫情成日留喺屋企，不妨都同小編一齊睇《勝利號》啦！