韓國樓價有幾貴？
首爾樓價平均成交價突破600萬港幣！比起香港算平？韓國打擊樓價失敗，樓價突破新高
Hello，大家好，我哋係由韓國人每日提供最新韓國旅行資訊嘅Creatrip。
「住屋」一直都係好多人關心嘅議題，尤其係出咗名樓價高嘅香港，好多人都係一路質疑「到底呢一世有冇機會買到樓？」，一路努力返工、儲錢。好多人都話韓國物價高、人工高，咁樓價同香港比又爭得遠唔遠？
不過小編已經可以直接同大家講結論，韓國嘅樓價雖然貴，但絕對冇香港咁貴，大約同台灣差唔多。韓國嘅薪酬同物價水平都同香港差唔多，平衡各方面因素絕對係香港嘅樓價更加難以負擔......
韓國各地樓價差異
韓國根據地區唔同，樓價都有唔同嘅差異，根據韓國不動產app「直房（직방）」對2020年全韓國80萬5,183宗樓宇成交價嘅分析結果顯示，首爾江南區狎鷗亭洞嘅平均成交價最高，係29億9,259萬韓元（約港幣2200萬）。
而喺首爾地區，平均成交價格超過20億韓元（約港幣1400萬）嘅地方，仲有瑞草區盤浦洞26億2,670萬韓元、龍山區龍山洞5街22億3,982萬韓元、江南區大峙洞嘅22億632萬韓元、龍山區西冰庫洞嘅21億8,761萬韓元、江南區道谷洞嘅21億1,059萬韓元、瑞草區嘅20億2,613萬韓元等7個地方。
至於全韓國平均成交價超過10億韓元（約港幣700萬）有113個洞，其中首爾就佔咗97個，京畿、仁川一共佔咗15個，剩低嘅最後一個洞係位於非首都圈嘅地區——大邱壽城區壽城洞3街，平均成交價都有11億6,960萬韓元（約港幣830萬）。
韓國嘅樓價飛漲，首爾城東區、廣津區、麻浦區嘅單位平均成交價格，喺2020年首次突破咗10億韓元嘅大關；喺首爾地區當中，樓價最低嘅已經係道峰區嘅4億5,579萬韓元（約港幣320萬）。
不過就算首爾樓價偏貴，但京畿道果川、京畿道城南盆堂區、京畿道城南壽井區、京畿道河南、京畿龍仁水枝區、京畿光明、京畿城南中院區、京畿安養東安區、京畿九里、京畿水原靈通區、義王市、大邱壽城區、大邱中區、釜山水營區、釜山海雲台區等15個地方嘅平均成交價，都比起首爾最平嘅道峰區仲貴。
韓國其他地區樓價？
除咗首爾嘅平均樓價最高之外，之後係世宗市嘅4億3,470萬韓元（約港幣307萬）、京畿道嘅3億8,959萬韓元（約港幣275萬）、釜山嘅3億4,605萬韓元（約港幣244萬）、大邱3億2,658萬韓元（約港幣230萬）、仁川3億628萬韓元（約港幣216萬）。
而值得留意嘅係，南部嘅釜山同大邱平均樓價第一次超越喺首都圈嘅仁川，至於世宗都因為房地產相關限制，排名亦排喺非常前面。
韓國嘅樓市政策？
韓國由2010年代中開始樓價飛漲，而家已經好難抑制，雖然政府一直口口聲聲話想抑制樓價，推出咗二十幾條新嘅樓市辣招，但都擊唔中要害，反而令韓國嘅房源同出租價格開始出現變動，令無殼嘅蝸牛更加買唔起樓，甚至連租屋都漸漸出現越來越多嘅困難。
其中一個最難解決嘅問題，就係喺特定嘅區域推出辣招嘅時候，好多人都會改為喺周遭城市同埋其他城市買樓，造成除咗首爾嘅樓價大漲之外，其他城市嘅樓價都逐漸攀升嘅現象。
連文在寅總統多次喺媒體面前公開發言，承認房地產政策嘅失敗。佢甚至喺上年1月18號嘅青瓦台記者會上面針對打擊樓價，表示「原本以為只要重點打擊炒樓嘅人就可以達成充足嘅供應，結果冇辦法實現房地產穩定化」。而喺一系列嘅樓市辣招下，韓國嘅單位成交量更加連續三個月增加，首爾地區 單單喺2020年12月份已經有超過6千次嘅成交數量。
雖然法例限制的確令到炒樓嘅人減少，但增加嘅成本，就轉移去到原本進行健康交易嘅樓價同全稅租屋之上，成為文政府政策入面最為人詬病嘅一點。受到7月31號起實施嘅《租賃保護法》影響，屋主將成本轉移到樓宇嘅全稅上面，導致保證金嘅價格越來越高，好多冇住宅嘅人因為要交嘅全稅越嚟越貴而不安，產生一種「而家唔買，之後就更加買唔起」嘅諗法，變成直接買樓，導致樓價上升。
韓國全稅係咩嚟？
全稅呢個概念對香港人來講好新穎，簡單嚟講就係喺入住嘅時候繳交一筆高昂嘅保證金，喺租約期間唔需要每個月交租，淨係要交管理費同水電費，喺租約結束之後如果檢查完冇問題，就會全數退返俾你，所以全稅租屋係好多韓國人租屋嘅時候嘅首選。
全稅嘅金額大約係樓價嘅30%至90%不等，由屋主決定。
呢種制度係源於過去韓國政府為咗促進經濟資本，銀行提供優厚嘅高利息，所以屋主會將收到嘅巨額保證金攞去做定存，從而獲得豐厚嘅利息。
不過隨住高利息時代嘅結束，同埋一系列樓市辣招嘅推出，有樓嘅人要俾多啲稅，導致成本轉移去到租客嘅身上，要繳交嘅保證金亦都越來越高，或者會變翻做交好貴嘅租金嘅模式。
如果有更多想知嘅內容，都可以隨時留言或者dm話俾我哋知：）
Instagram：creatrip.hk