Hello，大家好，我哋係由韓國人每日提供最新韓國旅行資訊嘅Creatrip。
韓國藝人唔單止擅長唱歌跳舞，有時候仲會接觸戲劇嘅領域，其實除咗演藝方面，唔少韓國藝人運動都好叻，甚至係運動選手出身。
今日就想同大家介紹吓曾經係運動員嘅韓國藝人，好多真係估佢唔到！
選手出身嘅韓國藝人
1. 宋仲基
宋仲基喺初中嘅時候曾經係短道速滑運動員，喺10年嘅運動員生涯入面仲有6年擔任大田市嘅代表選手，曾經目標係參加奧運。
喺佢中二嘅時候，好不幸地因為膝頭受傷而要放棄職業生涯，如果宋仲基無受傷，可能大家就要以運動員嘅身分認識佢！
2. 宋慧喬
宋慧喬喺初中之前都擔任過花式溜冰選手，佢當時嘅教練仲話，如果宋慧喬有繼續練落去，可能可以達到韓國最出名嘅花樣溜冰選手金妍兒嘅成績，果然係美貌同才華都受到認證嘅演員。
3. 蘇志燮
蘇志燮喺高中嘅時候曾經係一個游泳運動員，喺全國性嘅比賽入面，仲拎過三次團體金牌同個人銅牌。
喺蛙泳嘅賽事當中佢仲奪得全國排名第三，喺一次嘅訪問入面佢講過，如果有繼續游水，佢就會成為一個國家級嘅選手。
4. 成勛
演員成勛喺進入娛樂圈之前都係一位游泳選手，當時喺全國蝶泳比賽創造咗50米25秒嘅新紀錄。
原本成勛係因為佢嘅完美身材而受到關注，後尾大家先知道佢曾經係游泳選手，仲參加過唔少全國性比賽。
成勛出演綜藝《我獨自生活》嘅時候就因為佢獨特嘅魅力而受到關注，小編都非常期待佢未來嘅作品！
5. 朴寶劍
朴寶劍直到中二之前都係一位游泳選手，所以佢嘅身型先會咁fit！後嚟朴寶劍因為無辦法克服低潮期，而且佢希望成為一個歌手，所以去咗做練習生，佢嘅公司當時問佢會唔會想演戲，最後佢就以演員身份出咗道。
而家朴寶劍已經係韓國年輕演員入面其中一個最有代表性嘅男演員，令人非常期待佢將來嘅發展。
6. 申成祿
身高187cm嘅申成祿喺小學開始已經有打籃球，一直到中五佢都仲係職業球手，後嚟佢因為受傷所以退出咗籃球界，活躍喺戲劇同電影活動當中，仲出演過《來自星星的你》！
佢都有參加過藝人之間嘅籃球比賽證明佢嘅實力，而佢嘅細佬都係一個職業籃球選手，喺受傷之後退役成為廚師。
唔知大家知唔知，申成祿仲因為同Kakao Friend入面隻Frodo狗好似樣而聞名，有「Katalk狗（카톡개）」嘅稱號！
7. 徐章勳
作為韓國國寶級嘅籃球選手，同時係國家嘅代表運動員，徐章勳身高205.3cm，曾經喺同外國球隊比賽嘅時候贏過3次MVP。
睇上面張相已經可以知道佢有幾高～佢結束咗球員生涯之後，佢出演咗韓國綜藝《無限挑戰》，而家仲係《認識的哥哥》主持之一，開始作為藝人活動。
8. 姜虎東
而家係韓國嘅代表性喜劇演員同MC嘅姜虎東，以前曾經係韓式摔角選手，呢隻韓式摔角叫Ssireum（씨름），類似於日本嘅相撲。
喺初中之前，姜虎東已經係Ssireum界嘅名人，初中嗰陣仲贏過高中嘅選手，喺佢大學嘅時候，獲得咗「Ssireum天才」嘅稱號，成為咗一位職業Ssireum選手。
喺佢嘅職業生涯入面，佢喺140kg以下級別贏得咗7個冠軍，而喺Ssireum嘅「天下壯士」比賽入面就贏得過5次冠軍，成為最年輕嘅「天下壯士」，喺佢退休之後，受到喜劇演員李敬揆嘅引薦成為喜劇演員，而家姜虎東已經成為韓國嘅國民MC之一！
9. SHINee - Key
SHINee成員Key喺初中嘅時候曾經係滑水運動員，更加係大邱市嘅代表選手，喺全國比賽上獲得過唔少獎項。
大家睇完上面咁多位運動員出身嘅韓國藝人，有無覺得好意外？大家仲知唔知其他運動員出身嘅韓星？歡迎同小編分享～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
