被認證人品好嘅韓國藝人
由劉在石到BTS，玄彬？ 演藝界入面人品最好嘅明星會係邊個呢？
Hello，大家好，我哋係由韓國人每日提供最新韓國旅行資訊嘅Creatrip。
通過節目睇到藝人形象同實際形象可能會好唔同。有傳聞話原本睇落好善良嘅藝人實際性格真係唔係好得，亦都有傳聞話喺節目度睇落好挑剔嘅藝人實際上做過好多好事，而且經常因為人品好而出名。
今日想介紹其中以人品好而被認證嘅韓國藝人，之會話佢哋好係因為有工作人員、經紀人、普通人等喺社區、SNS公開嘅讚佢哋嘅內容。大家又會最期待一下會邊個藝人，當中又有冇你鐘意個呢？
被認證人品好嘅韓國藝人
1. 劉在錫
韓國代表MC兼廣播人劉在鍚係以人性出名嘅藝人，好多人對佢都只有讚冇彈。劉在錫眾多美談之一就係對後輩嘅喜愛，MAMAMOO頌樂有提過出道冇幾耐同劉在錫一齊做首播嘅幕後故事，仲有講關於劉在石嘅美談。
嗰時係MAMAMOO出道大概1年左右，MAMAMOO認知度唔似而家咁高。當時嘅劉在錫首先去到拍攝現場，好親切咁問候新人女子組合MAMAMOO，當時仲問頌樂：「玟星嚟咗未啊？」頌樂話劉在錫前輩知道曬佢哋個名，真係覺得好感動。
唔單止MAMAMOO，而家喺綜藝節目《Running Man》入面一齊合作嘅李光洙同HAHA都有類似嘅經歷！新人演員時期嘅李光洙偶然遇到劉在錫， 佢主動親近光洙同佢講聲「光洙你好？我有好好睇你嘅作品㗎。」
由嗰個時期開始李光洙就諗住一定要成功，之後同劉在錫一齊合作，最後都俾佢成功，仲一齊拍《Running Man》都有11年啦！
HAHA喺情景喜劇入面客串演出嘅時候，劉在錫就同佢講：「最近我有好好睇你嘅作品㗎，我哋之後喺節目度見啦！」HAHA都係由嗰個時候開始，就帶住對劉在錫嘅感謝同尊敬走到而家呢個位置。
劉在錫對後輩嘅細心、關心同愛，唔單止好多藝人都感受到，其實我哋身為觀眾都睇得出佢好有愛。
2. BTS
BTS對一齊拍攝嘅工作人員態度亦都係出名超好，所以一直都有好多美談。曾經有一位攝影師MJ KIM，仍同過唔少明星合作過，但係佢就話BTS嘅個性同態度，真係令佢印象深刻。
當日BTS同MJ KIM一齊拍攝平面廣告，一日18小時嘅拍攝加上BTS啱啱做完海外巡回演唱智返到嚟韓國，正常應該會好攰，但係佢哋一直都好開朗，好努力咁進行拍攝。雖然BTS好敬業，但令MJ KIM最感動嘅係拍攝完之後發生嘅事。
拍攝完之後，MJ KIM嘅工作部份雖然係完成咗，但BTS要繼續拍攝淨底嘅影像廣告，所以先同MJ KIM互相問候。BTS成員行到MJ KIM面前話：「多謝你由凌晨到夜晚都一直keep住笑，令到我哋好有活力咁完成整個拍攝，真係好多謝你。」
好多明星可能只係會好簡單咁打個招呼就急住走，但係BTS就好貼心咁行去MJ KIM面前講多謝，令到佢好感動。
MJ KIM仲話佢係第一次聽到呢種問候，真係覺得好窩心。雖然而家BTS成為「世界彈」，但佢哋冇因為咁而驕傲，反而會一直咁謙虛同努力。
3. 玄彬
玄彬一直吸引唔少少女同媽媽鍾意，佢喺上年拍完嘅《愛的迫降》更加令到眾人矚目。最近佢嘅至親好友李施彥就話：「玄彬唔單止生得好睇，而且爲人好正直。」
當年佢同玄彬一齊拍電影《朋友，我們的傅說》出道，因爲係第一部作品所以只係演做配角，對於當時嘅佢嚟講生活費真係好唔夠，喺拍攝過程中佢仲要去同事嘅媽媽葬禮。
當時李施彥就話連俾帛金嘅錢都冇，所以佢企喺殯儀館入口度苦惱緊入唔入去好。當時玄彬就行去佢身邊俾咗個信封佢，講咗一句：「用呢個嚟俾帛金啦」，雖然只係簡單一句但就令到佢好感動。
唔單止係咁，佢仲話喺拍攝嘅過程，玄彬就好似係自己嘅翻譯機咁。因爲係第一次拍電影，所以唔太理解導演所講嘅說話，玄彬爲咗幫佢一邊睇劇本一邊練習練到凌晨，有時仲會幫導演解析指導等。
玄彬因為同孫藝珍拍《愛的迫降》而擦出火花，喺年頭認愛，真係令唔少人羨慕啊！好男人又少一個啦~~
4. 姜河那
演員姜河那以善良正直嘅性格以出名，甚至有美談製造機嘅外號，唔少同佢一齊合作過嘅工作人員都一直讚佢係一個超優秀嘅藝人。
姜河那之前同朴敘俊一齊出演嘅電影《青年警察》入面，啲人對佢嘅美談更加成爲咗話題。聽講佢背得曬60幾個攝影工作人員嘅名，仲喺拍攝現場好親切咁對待佢哋，可以睇得出佢好尊重同感謝每一位工作人員。
同佢一齊拍電影嘅朴敘俊都講笑咁話：「佢除咗冬天飲冰美式咖啡之外，就冇其他缺點。」（冬天飲美式咖啡點解會係缺點哈哈哈）
唔單止係咁，佢喺爸爸開嘅刀削麵鋪頭會成日去幫手，佢仲會同每一位粉絲、顧客一齊影相，簽名等。知道工作人員嘅珍貴，唔單止謙虛，仲係孝子嘅美談製造機演員，姜河那嘅好真係多到數都數唔曬。
5. 少女時代 - 太妍
2007年以少女時代出道，而家已經成爲韓國頂級solo歌手嘅太妍！偶像出身嘅佢喺頒獎典禮上，好親切咁照顧後輩令到粉絲之間成爲咗話題。2020年首爾歌謠大賞，太妍喺歌手席度發現自己一個坐喺附近嘅成雲。
睇到成雲自己一個，太妍就問身邊嘅銀赫：「要唔要叫佢過嚟一齊坐」，然後就好親切咁揮住手同成雲講「過嚟啦~」。雖然只係一個好簡單嘅舉動，但就令人好窩心，當日成雲仲獲得舞蹈表演獎嘅時候，唔單止太妍，坐喺隔離嘅Super Junior成員都好開心咁祝賀佢。
Super Junior、少女時代同成雲出道時間相差7~9年。多得太妍嘅親切對待，成雲都全日都可以好舒適同愉快咁享受頒獎典禮。呢個場面雖然冇俾攝像機影到，而係粉絲直拍度先見到，更加展現咗太妍善良嘅一面。
6. VIXX - RAVI
某社區最近上傳咗題目爲「揭露Ravi人性」嘅文章，呢篇文章係一個造成Ravi車輛事故嘅大學生A某上傳。根據文章內容，一對大學生喺玩緊電動滑板車嘅時候，同停泊喺街上面嘅保時捷發生咗事故。想要處理呢件事嘅A某得到咗車主嘅聯繫方式之後，小心翼翼咁向對方聯絡，講訹返成件事。
「你好，請問係唔係保時捷車主？」A某嘅短信開頭好小心翼翼咁詢問大概報銷嘅費用。車主嘅回覆反而令到人大吃一驚，因為佢覆嘅唔係要幾多錢，而係「你好，唔知你有冇受傷呢？ 」RAVI唔單止冇叫學生賠，反而係第一時間關心A某，同時仲話費用自己個搞掂。
最後仲提學生話：「電香滑板好危險要小心啲，以後請多多支持GRUbLIN同RAVI嘅音樂。 」聽講RAVI嘅保時捷車喺韓國大概賣1億到2億韓幣左右，一筆昂貴嘅修理費用，佢仲唔需要學生俾，反而仲關心咗人先，呢個行為真係好貼心。
7. 金素妍
憑住電視劇《Penthouse》入面做反派角色「千瑞珍」而受觀衆喜愛嘅金素妍！雖然出道已經20幾年，佢係以善良嘅性格而不斷獲得美談嘅演員之一。今年佢仲出演綜藝節目《蒙面歌王》，因為素顏被公開，成爲咗話題。
金素妍出演《蒙面歌王》嗰一日，有一位記者聯絡咗佢話：「而家你同李尚禹嘅緋聞報道會出新聞。」
爲咗長時間嘅練習同準備舞台，金素妍請求將報道推遲一日，記者都表示會咁樣做，但係喺錄製30分鐘前，另一位記者先上傳咗呢個新聞。金素妍話：「當時比起緋聞被傳開嘅事實，對推遲報道嘅記者感到好對唔住。」
所以金素妍喺錄製前10分鐘就主動同記者聯絡，話咁我講啲拍拖故事俾你知啦。拍拖冇幾耐，雖然冇咩特別事情發生過，但爲咗記者，直到上台前爲止，佢都不斷想搵啲拍拖故事俾記者，所以連化妝嘅時間都冇就上咗舞台。金素妍唔單止人靚，心亦都好甜，真係一個人品滿分嘅好演員。
8. 朴寶劍
如果之前介紹嘅姜河那係「美談製造機」，咁朴寶劍就係有「美談自動販賣機」嘅稱號，因為佢亦都係爲人正直而出名！
喺拍緊《雲畫的月光》嘅時候，朴哲民就對朴寶劍講：「你唔係扮善良，而係身體入面有善良嘅遺傳基因。」唔單止係咁，爲咗前輩可以先食飯，佢仲會獨自留低拍攝，向前輩展現咗有禮貌同尊敬嘅行爲。
實際上朴寶劍對於佢嘅美談，一直以嚟都係覺得係做緊自己，呢一種態度更加令人欣賞。
9. EXID - HANI
EXID成員Hani一直都以好照顧後輩，以及充滿熱情嘅性格成爲話題。Hani因為睇落好豪爽，所以唔少人都會叫佢做「Hani哥哥」。喺綜藝節目《一週的偶像》入面，GFRIEND成員銀河跌親嘅時候，展現咗Hani嘅人品。
因為銀河下身衫比較短，而且亦有男藝員喺現場，所以Hani好快就企喺銀河前面想幫佢擋住。
除此之外，Hani都出曬名係對粉絲好嘅偶像之一，收到粉絲禮物之後，通過機場安檢嘅時候，聽講唔可以帶禮物上機。其實當時Hani可以就咁交俾公司嘅工作人員，但佢就用口型同粉絲講：「禮物唔可以帶走啊！我會放喺公司，遲啲一定會返去攞！」展現咗佢多情嘅一面。
最後因為帶唔到禮物，但佢都拎咗封信一齊上機，唔單止平時對粉絲好好，仲可以睇到Hani溫柔體貼嘅性格。
以上就係咁多位出名人品好嘅藝人，大家仲想唔想知仲有邊啲藝人都係出名人品好呢？可以留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk