韓國奇特口味炸雞
韓國竟然有呢九款奇特口味炸雞？水果味炸雞、糖果味炸雞你又聽過未？
Hello，大家好，我哋係由韓國人話你知每日最新韓國旅行資訊嘅Creatrip。
炸雞係韓國人最鍾意食嘅美食之一，所以韓國都有好多唔同口味嘅炸雞。當中原味同埋甜辣炸雞就最受韓國人歡迎，但大家知唔知道原來韓國都有好多奇怪味道嘅炸雞呢？今日小編就同大家介紹一下韓國究竟有啲乜嘢古靈精怪嘅味啦！
味道古靈精怪嘅炸雞
1. 水果味炸雞
小編聽到有水果味嘅炸雞都真係嚇一跳！原來韓國係有士多啤梨味、香蕉味、同埋密瓜味等等。
好似呢一款柚子檸檬味嘅炸雞都幾受歡迎，唔知大家有冇興趣試呢？
2. 糖果味炸雞
你冇睇錯，佢就係糖味炸雞，炸雞上面會有糖果碎、忌廉、同埋花生醬，所以食起上嚟非常之有咬口仲好甜添！大家見到咁色彩繽紛嘅炸雞有冇興趣試呢？
呢份炸雞上面全部都係糖霜同埋忌廉，唔知味道係點嘅呢？
3. Cheetos芝士味炸雞
大家應該對呢一款cheetos零食唔陌生，小編就覺得呢一款炸雞係咁多款裏面最正常嘅一種，如果鍾意芝士或者車打芝士嘅大家都一定會覺得佢幾好食！
除咗炸雞之外，仲有配送埋粟米湯添，大家又會想唔想試呢？
4. 朱古力味炸雞
呢款炸雞絕對適合鍾意朱古力嘅朋友，佢哋嘅菜單靈感來源동네아저씨치킨" (Tongna Akshi Chicken)。呢間舖頭最出名就係賣朱古力嘅嘢食，唔知炸雞同埋朱古力嘅結合又會係點樣嘅呢？小編就覺得可能會太甜啦！
5. 泡菜味炸雞
韓國被稱為泡菜國，又點可以冇泡菜味嘅炸雞呢？韓國呢款泡菜味炸雞原來係由Mexicana Chicken研發出嚟嘅，鍾意食泡菜嘅大家又覺得泡菜同埋炸雞呢個組合夾唔夾呢？
6. 辣火雞味炸雞
火雞麵係韓國最出名嘅辣麵，唔少人都覺得佢哋嘅辣度真係辣得好犀利！好多韓國人都覺得呢一款火雞麵嘅醬料係非常之有挑戰性，所以就要將佢製成火雞麵辣雞，等大家挑戰一下自己嘅味蕾可唔可以頂得順！
7. 青提子味炸雞
大家有冇食過青提子味嘅炸雞呢？小編個人覺得呢一個味道真係非常之特別！試幻想一下青提子嘅味道係好甜，但炸雞嘅味道係鹹鹹地，出嚟嘅感覺又會係點樣嘅呢？雖然網上個樣應該唔係伏，但感覺都係怪怪地，大家又敢唔敢試呢？
8. 芥末味炸雞
望落去仲以為係一啲芝士粉又或者蒜粉，但原來佢係芥末粉嚟，望到都覺得好有刺激性！如果配埋呢支啤酒飲應該都會非常之夾，仲可以幫你解辣添！呢一個韓式同埋日式嘅結合真係好特別啊！
9. 鮮奶咖啡味炸雞
喺今年3月Mexicanan又再推出咗炸雞新口味，今次嘅鮮奶咖啡味一出，就已經引嚟好大迴響。
唔少網民試完都話覺得「咖啡味唔會話好濃，甜甜地又鹹鹹地好特別。」、「味道幾特別，值得一試。」等反應。
同時除咗推出炸雞之外，今次仲會有咖啡弄外型麵包side menu，相當得意又盞鬼，唔知大家之後嚟又會唔會想試吓呢？
以上呢九款就係韓國比較特別嘅炸雞口味，唔知大家有冇食過呢？
小編個人就覺得都係會揀返特別之中嘅正常Cheesto芝士味，唔知大家又會最鍾意邊款呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk