韓國嘅泡菜係點嚟？
原來韓國最早期嘅泡菜唔係用白菜嚟整？泡菜嘅原名竟然唔係叫泡菜？
Hello，大家好，我哋係由韓國人話你知每日最新韓國資訊嘅Creatrip。
一講到最具代表性嘅韓國食物，相信大家都一定會諗起泡菜！韓國人每一餐飯都一定要有泡菜，甚至連去旅行都要自己帶埋泡菜放喺行李。點解韓國人會咁鍾意食泡菜？大家又知唔知其實泡菜係點樣嚟嘅呢？今日就等小編話畀大家知泡菜嘅歷史啦！
泡菜嘅起源![韓國泡菜]()
相信就算小編唔講，大家都會知道泡菜嘅起源地喺韓國。喺地理位置上面，位於中高緯嘅朝鮮半島因為冬天太凍，種唔到蔬菜，所以當時嘅人就會將收成好嘅蔬菜醃起佢，再收喺地底或者甕入面，等到冬天嘅時候都可以有蔬菜食。就係咁樣形成咗呢一個獨特嘅醃製文化，同時呢一個都係泡菜嘅起源。
當時一開始係用蘿蔔、青瓜呢啲根莖類嘅蔬菜嚟醃製成做泡菜。不過隨着時間嘅轉變，今時今日韓式泡菜嘅代表就係白菜泡菜啦！泡菜喺最早期其實係叫做沉菜(침채)，因為最初嘅時候係用蘿蔔同埋青瓜為主，所以喺醃製嘅時候蔬菜都會沉喺水入面。喺壬辰倭亂之後，辣椒開始引入韓國，所以喺高麗時期開始流行嘅醃製、水泡菜等都開始進行改良，減少咗泡菜嘅鹽份。辣椒嘅香氣令到泡菜變得更加好食，亦都減少咗因為長時間發酵而造成嘅臭味，而韓國嘅泡菜都係喺呢個時期開始正式興起。
而依家用原個白菜去醃泡菜嘅方法，估計係喺19世紀嘅朝鮮後期出現。根據憲宗15年(1849年)，洪錫謨撰寫嘅《東國歲時記》10月、11月調記入面寫：喺首爾嘅習俗入面，用蘿蔔、白菜、大蒜、辣椒等醃製泡菜，夏天嘅醃蘿蔔同冬天嘅醃泡菜係每家人一年入面最重要嘅計劃。
呢個係歷史記載入面，白菜第一次出現喺醃製嘅歷史入面。用比較細嘅蘿蔔去醃嘅就係水泡菜(동치미)。辣椒、白菜呢啲去醃製嘅就叫做「醬葅」(장김치)，即係我哋叫嘅泡菜(김치)。
不過，而家泡菜已經成為咗韓國人生活唔可以缺少嘅一部份，好多家庭都會聚埋一齊整泡菜，一次過就整足成年嘅份量。
泡菜嘅種類
除咗最常見嘅白菜泡菜之外，韓國嘅泡菜仲有醃蘿蔔、白泡菜(冇加到辣椒)、水泡菜、青瓜泡菜、蘿蔔葉泡菜等等。呢一類嘅醃製食品全部都可以叫做泡菜。不過對韓國人嚟講，泡菜就係呢一個帶有紅色嘅辣椒、用白菜醃製而成嘅泡菜。因為咁樣韓國曾經堅持呢一類嘅泡菜需要正名叫做「辛奇」，但係因為賣嘅時候，大部份人都唔係太接受呢一個名，所以而家韓國都唔再堅持要正名啦！
喺整泡菜嘅時候，其實需要至少15種材料一齊去醃㗎！雖然佢哋味道嘅差異都幾大，但係將呢啲食材混合埋一齊，通過發酵之後就可以發揮到更加大嘅營養價值！
不過泡菜本身都有經過科學證實，真係有好大嘅營養價值！一直以嚟，韓國人都認為泡菜可以幫助消化、開胃，甚至有更加多嘅功效，所以佢哋每一餐都會食泡菜。
泡菜料理
泡菜除咗就咁食，都仲可以整成好多樣唔同嘅料理㗎。而呢啲料理全部都同泡菜一樣紅噹噹嘅，就好似泡菜鍋、部隊鍋、泡菜煎餅等等。喺好多韓國傳統嘅餐廳入面，都會有透明而且凍嘅水泡菜湯，總會有一浸強烈嘅酸味。呢種水泡菜對外國人嚟講可能會食唔慣，但係喺韓國，水泡菜係非常之消暑同埋解膩嘅小菜。
大家可能唔知，泡菜其實因應唔同嘅地區而有唔同嘅味道。就好似首爾同京畿道咁，呢度由古代開始都係都城，宮廷入面嘅泡菜文化非常之發達，而係京畿道嘅地區都會用比較清淡嘅蝦醬同魚醬進行海鮮嘅醃製。
一講到泡菜，相信大家都一定會第一時間諗起平時見到嗰啲紅白色嘅白菜泡菜。但其實泡菜只係一個中文名，韓國嘅醃製文化真係有好多唔同嘅歷史。唔知大家之前嚟韓國旅行嘅時候又有食過或者見過幾多種唔同嘅泡菜呢？如果未食過嘅話，下次嚟韓國旅行嘅時候都可以試下！
如果有更多想知嘅內容，都可以隨時留言或者dm話俾我哋知：）
Instagram：creatrip.hk