「紫色之島(紫島)」介紹
韓國打卡新熱點「紫島(퍼플섬)」！夢幻跨島紫色大橋，唯美仙境超好影！
Hello，大家好，我哋係由韓國人每日提供最新韓國旅行資訊嘅Creatrip。
2020年韓國新景點，又點可以唔提早前勁hit嘅「紫色之島（紫島）」呢？早排無論係IG、Facebook，大家都一定有睇過！小編亦都去現場為大家實拍，之後疫情好轉嘅時候，大家千祈唔好錯過啊！
紫島（퍼플섬）
- 地址：전라남도 신안군 안좌면 소곡리
近期喺各大SNS都見到佢嘅蹤影，紫島位於全羅南道新安郡（신안균）。
顧名思義呢度係以紫色建築、紫色風景聞名，係好多韓國人近期嘅打卡熱點，到底要點去？大家一齊跟住小編睇下啦！
紫島位於韓國西南方，距離首爾有啲遠，所以建議要去紫島嘅朋友，先搭KTX去木浦，然後再轉巴士去紫島（位於新安）。
喺木浦巴士轉運站（목포버스터미널）搭2004號巴士，下面係巴士開車是時間表（更新時間：2020.08）。
要提提大家，2004號巴士係當地巴士，唔可以用T-money。
所以大家要事前準備好₩3,000車費，如果唔係就上唔到車，要再等下一架。
大家記住要喺邑洞十字路口（읍동사거리 / Eub-Dong-Sa-Geo-Ri）落車！
千祈唔好坐過站，如果唔識韓文嘅朋友，可以上車前畀一畀司機睇呢幅圖。
落咗車之後，要繼續等另一班「安佐鄉村巴士（안좌마을버스）」之後喺紫色橋站（퍼플교 / Peo-Peul-Gyo）落車。
因為巴士班次唔多，建議大家可以搭的士過去，同司機講Purple Island或Purple Bridge應該都會知道。
的士搭到紫色橋價錢大約係₩9,000，落車之後就會見到所有嘢都係紫色。
另外，呢度雖然話要買咗飛先入得，但小編去嘅時候就冇話要收錢（？）
不過都要提提大家，成人係₩3,000、青少年₩2,000、小朋友係₩1,000。
現場仲有紫色背心、紫色遮畀大家借嚟影相。（要畀錢）
紫色橋（퍼플교）係唔係好靚呢？大家之後一定要嚟呢到打卡影相！
成條紫色橋長度大約8分鐘左右就可以行完，不過如果女士們要影相，又點止8分鐘呢？哈哈哈哈
一邊吹住海風，一邊影相打卡，時間會不知不覺咁過，而且真係好舒服。
小編去嘅時候係平日，不過都有唔少韓國人嚟呢度打卡。
基本上，紫島係由幾個小島組成，之間都有連接嘅路，大家可以揀行路或搭車。
不過呢度真係同名一樣，所有嘢都係紫色，小編依家回想去都覺得好神奇。
小編推薦大家可以沿住海邊行，唔一定要行山路（會有啲辛苦）。
大家只要跟住紫色擺設同道路標示行就可以。
原本喺取材過程中係諗住行山路，但行行下就發現咗一條超大嘅蛇……真係嚇親！
所以最後都係行返海邊會感覺安全啲。
行到紫色村莊，就會見到呢到聚集咗一啲小店同餐廳，難得嚟到又點可以錯過呢？
以上為一人份，價錢只需₩10,000，大家都會到會有好多小食同主食，而且碗碟都係紫色，真係好特別。
食飽之後繼續沿住紫色橋去其他島，沿路會發現唔少驚喜，令人會有一種去咗童話故事嘅感覺。
只要去其他小島橋，人都會比較少啲，影相自然都靚啲！
行到攰，大家亦都可以去紫島特有Cafe，小編覺得最神奇嘅係，甚至連汗蒸幕都有，大家不妨都可以去鬆一鬆。
回程嘅時候，大家可以記住上圖巴士站到等車，但小編真心要提提大家.....巴士要等好耐。
所以如果大家係搭的士去，可以先同的士司機交換聯絡方式，或者約定幾點喺巴士站等，咁就可以慳咗好多時間。
疫情過後如果之後有計劃要去紫島，希望呢篇Blog可以幫到大家啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk