韓國新奇有趣嘅13樣嘢
原來韓國有呢13樣新奇有趣嘅嘢？大家知唔知道佢哋嘅存在呢？
Hello，大家好，我哋係由韓國人話你知每日最新韓國資訊嘅Creatrip。
大家嚟韓國旅行嘅時候，有冇見過一啲令你覺得新奇有趣嘅嘢呢？其實韓國有好多香港冇嘅得意嘢唔單止新奇，仲可以令我哋嘅日常生活方便啲㗎！等小編話比大家聽韓國有咩新奇有趣得嚟又實用嘅嘢啦！
1. 餐廳有鐘仔
如果你去咗一間好多人嘅餐廳，其實真係叫啲staff叫幾次都未必聽得到㗎！不過喺韓國就完全唔需要擔心呢個問題，因為每張檯都會有一個鐘仔喺檯面，只要你撳一撳佢就會有waiter過嚟幫你㗎啦！
2. 餐具喺曬櫃桶
大家嚟到韓國旅行嘅時候，你係咪好多時都搵唔到啲餐具呢？
其實佢哋只不過唔係放喺檯面，而係放喺檯下面嘅櫃桶，因為韓國人覺得咁樣唔洗用咁多位。
3. 地鐵有小朋友嘅出口
喺韓國啲大站，你經常會見到好似以上呢個大閘咁。呢個出入口其實係畀六歲以下，身高唔高過120cm嘅小朋友過嘅！真係好得意啊！
4.馬路側邊有把遮
喺夏天嘅時候，韓國嘅街頭都會放咗一啲遮喺馬路邊，其實係畀大家遮太陽嘅！因為韓國嘅夏天實在太曬嘅關係，所以韓國政府就決定要設立呢樣設施，唔只係夏天可以遮太陽，落雨嘅時候擋雨都係一個好選擇！
5.巴士站放冰磚
正如上面提到，韓國嘅夏天好熱，所以韓國政府都好貼心咁安排好多可以比大家避暑嘅設備。
另外一個貼心嘅就係放哋冰磚係巴士站，等大家如果等巴士等到好熱嘅時候可以掂下佢降溫。
6.手指套
大家食炸雞嘅時候餐廳都會畀手套大家，不過其實我哋有時唔需要咁大隻手套。如果大家只係想食啲薯條，或者麥樂雞嘅時候，其實只要用手指去攞就可以，所以某啲餐廳都推出咗手指套等大家食嘢嘅時候可以方便啲但又環保啲！
7.車上面有藍色海綿
如果你有留意過韓國啲車，你都會發現啲私家車上面會有啲藍色嘅海綿。
唔好睇佢哋細細粒啊，其實係有防撞放刮嘅功用，咁㗎車就唔會咁容易刮花！
8. 賣花嘅自動販賣機
大家喺韓國鍾唔鍾意用自動販賣機買嘢飲嘢食呢？其實喺韓國唔單止飲品同食物㗎，就連襪、雪糕同埋花都會賣，真係好特別！
9.地鐵站有locker
韓國地鐵最好嘅地方就係每個站都有可以比你放嘢或者行李嘅Locker，如果你買咗好多嘢都可以第一時間即刻放去地鐵嘅Locker先，唔洗攞住咁重！小編覺得呢樣嘢就係好貼心！
10. 廁所會有番梘
香港嘅洗手間大多數都係會有洗手液，但韓國係會提供藍色嘅番梘。而呢個番梘係固定咗喺度，所以用起上嚟好方便！
11. 樹都有Fashion可言！
因為韓國嘅冬天實在太凍，所以喺韓國嘅樹一到冬天就會「著外套」保暖啊！
12. 巴士帳幕
喺冬天，韓國嘅巴士站都會有巴士帳幕，而裡面都會開咗暖氣，可以比乘客避寒。
13. 狗車
好多時我哋都會見到主人帶狗狗去公園散步，但喺韓國你會見到啲主人會用BB車載住狗仔出街㗎！
以上呢十三樣就係韓國新奇有趣嘅趣聞，唔知大家有冇聽過呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk