韓國人特徵
除咗靠樣同語言可以知佢係韓國人之外,仲可以靠咩?8種特徵樣樣都好中!
Hello,大家好,我哋係由韓國人每日提供最新韓國旅行資訊嘅Creatrip。
如果講到韓國人大家會諗到佢哋有啲咩特徵呢?我哋為大家整理咗,就連韓國人睇完都反駁唔到嘅特徵。大家睇完又有冇同感呢?
韓國人特徵
1. 笑嘅時候會拍手
小編嚟咗韓國5年,真係發覺韓國人好鍾意邊笑邊拍手。好記得之前Seventeen拍《GOING SEVENTEEN》嘅時候,DK俾人整蠱,其他韓國成員笑嘅時候個個都會拍手,只有外國成員冇拍。
2. 笑嘅時候好鍾意打對方
인그티즈
除咗鍾意笑嘅時候拍手之外,韓國人仲好鍾意笑住打對方。
3. 拎紙巾絕對唔會只拎一張
唔知係唔係因為韓國紙巾偏薄⋯⋯如果叫韓國人俾紙巾,佢哋一俾一定係俾兩張,絕對唔會只俾一張。相反香港一張紙巾好多時仲會同friend share一半。
4. 倒數1-10唔係10秒,而係12秒?
正常好多時倒數會由10數到1,但韓國人仲會數埋0同叮,所以佢哋嘅倒數10秒,其實正式嚟講係倒數12秒。
5. 問而家幾點嘅時候會扮聽唔到再答
朋友A:「而家幾點啊?」
朋友B:「咩話?(明明係聽到)」
朋友A:「冇嘢啦!」
朋友B:「而家2點。」
呢個情況唔單止韓國人有同感,身為香港人嘅小編,成日都會遇到咁嘅情況,大家又同唔同意呢?
6. 好鍾意將「唔知」呢個字掛係嘴邊,但其實明明係知
인스티즈
朋友A:「你知唔知小明去咗邊啊?」
朋友B:「唔知啊,去咗圖書館。」
呢個10個有9個韓國朋友都認同,好多時明明係知,但就會習慣性加個「唔知」再答對方。
7. 好鍾意將「唔係(아니)」擺係前面
더쿠
好多人可能以為韓國人最鍾意講「네」 (係),但現實生活中其實佢哋鍾意講「아니」(唔係)多,好多時「아니.. 그게 아니라」(唔係...唔係咁嘅呢)。以上「唔知」同「唔係」,可以睇得出韓國人鍾意將所有事否定,再講下一句。
8. 比起鍾意坐梳化,更鍾意挨住梳化坐。
네이트판
有一次小編去咗韓國朋友屋企,當時朋友叫小編隨便坐,小編好自然咁去坐梳化,點知坐底個一刻,朋友就坐地下。小編即刻問朋友,點解唔坐梳化,朋友話因為好多韓國人屋企嘅梳化都係用嚟裝飾。 比起坐梳化,更加鍾意挨住梳化坐地下。
除咗可以靠樣同語言去估係唔係韓國人之外,以上8個都係韓國人成日會做嘅行為,大家亦都可以問下韓國朋友,問佢哋覺得準唔準。
如果有更多想知嘅內容,都可以隨時留言或者dm話俾我哋知:)
Instagram:creatrip.hk