Hello，大家好，我哋係由韓國人話你知每日最新資訊嘅Creatrip。
當大家去到一個新嘅地方生活，好多時都要重新適應當地嘅生活習慣。小編自從喺韓國生活都不知不覺都養成咗一啲新嘅生活習慣，今日就等小編同大家分享下啦！
喺韓國養成嘅十個習慣
1. 自動自覺打招呼
無論大家喺邊個國家都要打招呼，咁先係個有禮貌嘅乖寶寶。不過喺韓國打招呼嗰陣，好多時都要微微鞠躬，小編試過返到香港唔小心一邊bye-bye一邊鞠躬，俾朋友笑咗半年。
2. 行得越嚟越快
韓國人真係好心急，所以喺地鐵、街上，一啲人多嘅地方，不自覺就會跟上佢哋嘅步速。雖然香港人做嘢都好快手，但唔會有一種好急好急嘅感覺。例如過馬路個陣，好多韓國人都鍾意企正喺馬路邊，一轉燈就行出馬路，而唔會退後兩步等過馬路。有時小編企後少少等馬路，韓國人都會兜去小編前面企，務求一轉燈就衝出去！
3. 一日一杯美式咖啡
韓國人好鍾意飲咖啡，尤其係美式咖啡，小編一開始都唔慣飲美式咖啡，但生活耐咗識多咗韓國人朋友，出去Cafe都開始會飲冰美式，而且美式咖啡通常都係cafe入面最平。
4. 養成化妝習慣
韓國周圍都係化妝品店，價錢唔貴又好用，加上韓妹好多都會化妝出街，打扮得靚一靚，所以小編嚟到韓國都多咗化妝，睇落精神啲，心情又好啲。
5. 護膚
除咗化妝韓妹都好注重護膚，韓國天氣比香港乾燥，做好保濕相當重要，韓國護膚品好多時都會有sale，襯減價入定貨，就可以抵住又好皮膚啦！
6. 咩都上網買
韓國網購真係好方便，今日落單聽日就送到，網上仲成日有優惠，分分鍾平過出面買，所以小編都養成網上購物嘅習慣。
7. 想食炸雞
韓國炸雞好出名，又有好多口味，小編同朋友喺屋企開party，都會叫炸雞食，甚至有時候突然想食，都會叫一隻分幾餐食。
8. 飲返兩杯
小編喺香港好少會飲酒，因為身邊嘅朋友都冇呢個習慣，不過韓國人聚會嗰陣都一定會飲返兩杯，大家唔好以為飲酒就一定要飲好多，韓國有好多酒館都好有特色，主要都係去同朋友傾吓偈，都幾開心㗎！
9. 垃圾分類
香港仲未實施垃圾徵費，所以小編喺香港雖然都會回收，但就冇做得咁足。不過喺韓國垃圾袋係要俾錢買，小編揼嘢之前都會仔細將垃圾分好，減少不必要嘅浪費。
10. 掛住香港
小編未嚟韓國之前，都唔知自己咁鍾意食香港嘢，點心、沙嗲牛公仔麵、凍檸茶，全部小編都好掛住⋯⋯幾時先可以返香港食到啊？ㅠㅠ 除咗嘢食，仲有喺香港嘅屋企人、朋友，全部都好掛住。
以上就係小編喺韓國生活養成嘅生活習慣，唔知有冇喺韓國生活嘅朋友有同感呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
