韓國人對香港嘅誤解

同一張銀紙唔同設計，以為係假鈔？香港人好有錢？韓國人對香港嘅誤解有啲咩？

황요산

a year ago

Hello，大家好，我哋係由韓國人每日提供最新韓國旅行資訊嘅Creatrip。

韓國人成日會覺得所有香港人英文好叻，但事實又係唔係真係咁？香港同澳門唔係同一個地方嚟？香港人講緊嘅係普通話，而唔係廣東話？好多時韓國人會對香港有好多誤解！大家睇完又會覺得點呢？

1. 所有香港人英文都好叻

如果大家有韓國朋友，應該都會聽佢哋講過，香港人英文真係好勁，發音又標準，但事實又係唔係真係咁？

根據EF EPI （EF English Proficiency Index）2021年排名顯示，香港排32，韓國排37，其實以排名嚟睇，香港的確唔係比韓國好好多。

韓國同事更表示：「曾經去香港嗰陣，以為所有人英文都好叻，點知搭的士嘅時候，要一直用Papago去溝通。」

2. 香港人都好有錢

홍콩경제무역대표부

韓國人之所以會覺得香港人有錢，係因為佢哋都知，香港樓價貴，但香港人都竟然可以買得起，事實佢哋未必會知，香港人要上車同要一直供樓有幾辛苦: (

위키트리

同時佢哋唔敢相信，香港竟然有劏房嘅存在。

고시락

如果講到香港嘅劏房，其實同韓國嘅考試院差唔多，不過韓國好多考試院，好多時都會免費提供白飯、拉麵、麵包等，相比香港...可以話係天堂。

3. 以為香港只得高樓大廈

뉴데일리

韓國同事表示，一開始去香港旅行，真係好似香港電影咁，去度邊都只見到高樓大廈，自然環境唔太多。點知有一次嘅偶然，去咗昂坪360，先知原來香港有咁靚嘅風景。

4. 以為香港人都鍾意用卡俾錢

올바른 진짜 정보

大家嚟過韓國應該都見過，韓國人俾錢嘅時候，都鍾意用卡多過現金，事實佢哋的確覺得帶現金好唔方便，而且一卡通行，甚至而家好多時韓國唔少app都可以直接俾錢，就算唔帶卡出街都冇問題。

5. 唔明銀紙點解要分咁多種銀行

每日頭條

可能對香港人嚟講會覺得好平常，甚至唔會覺得係一件特別嘅事，韓國人會覺得明明係同一個面額，但點解會有唔同design？有時仲會諗，會唔會係假嘅呢？

IBK 기업은행

相反，韓國每一張銀紙都係同一款，無論係顏色定人物都冇變。

唔知00後，又有冇用過或見過青蟹呢？

6. 唔明點解香港要用抽濕機

MSN

呢個問題對韓國人嚟講的確又真係好難講，因為韓國天氣乾，佢哋都只需要加濕氣。（香港冬天時可能都會用），所以嚟到香港，佢哋見到牆有滲水會覺得好神奇。

7. 唔知香港人係講廣東話

喺韓國人眼中，佢哋唔會識分普通話同廣東話，甚至以為發音都係一模一樣。不過小編一直都會向韓國朋友解釋，希望佢哋都可以同身邊朋友講，廣東話係有另一種魅力。

有一次韓國朋友好開心咁同小編講，佢話開始識分廣東話同普通話嘅差異。小編就問佢點分，佢話香港人好鍾意講嘢嘅時候，會加插好多英文，只要加英文99%都係香港人。聽完之後，小編又真係諗咗陣，又好似真係....哈哈哈

8. 以為香港同澳門係同一個地方

喺好耐之前，小編曾經搭飛機返香港嗰陣，有韓國人坐隔離，佢哋問小編澳門喺香港邊區？小編當時就同佢哋講，如果要去澳門，需要搭船先去到（當時未有巴士）。佢哋即刻話：「吓？香港唔係澳門，澳門唔係香港咩？」。

以上8個誤解，唔知大家又會點睇呢？歡迎留言話俾小編聽！

如果有更多想知嘅內容，都可以隨時留言或者dm話俾我哋知：）

Instagram：creatrip.hk