嚟到韓國覺得神奇嘅點
韓國人唔拍拖唔得？香港人覺得好神奇嘅韓國文化，唔知大家又有冇遇到過呢？
Hello，大家好，我哋係由韓國人話你知每日最新資訊嘅Creatrip。
韓國人到底有幾鍾意放閃？唔拍拖係咪唔得？到底有咩韓國文化會令香港人覺得好神奇，以下8個點大家又有冇遇到過呢？
韓國神奇文化
1. 韓國唔多垃圾桶，但都算乾淨？
唔知大家會唔會同小編一樣，一開始嚟韓國都會有個煩惱，就係點解咁少垃圾桶？喺香港行唔使幾步，已經可以見到有好幾個垃圾桶，但喺韓國要唔知行幾多個圈先可能會見到一個。
但如果問到韓國點解咁少垃圾桶，原因係因為由1995年起，韓國實施「垃圾從量製」。
簡單嚟講，即係要俾錢去分類，喺韓國會分好唔同區，市民要喺超市或便利店買屬於自己區嘅垃圾袋去掉。一般垃圾、廚餘垃圾都要用固定垃圾袋去裝，如果亂揼俾人捉到就會罰錢。另外如果買越大嘅垃圾袋，價格就會越嚟越貴。
2. 好多Cafe，行唔洗十步就會有一間？
大家可能會覺得，韓國一杯咖啡其實唔算平，但韓國人都會買嘅原因係因為，只要買一杯咖啡就可以坐全日。韓國人好鍾意坐喺Cafe溫書，所以對佢哋嚟講，買咖啡 = 買位。
3. 韓國人唔會邊行邊食（咖啡除外）
香港人買街邊小食，好多時都會鍾意邊行邊食，但喺韓國就會好少見到呢個情況，小編問韓國同事點解，原來係因為細個開始父母就係咁教自己，如果邊行邊食就會好冇禮貌，所以就算係食魚糕，佢哋都只會企喺度食，而唔會邊行邊食。
4. 唔係個個OPPA都咁高
唔知大家睇韓劇嘅時候，會唔會想像自己係劇中嘅女主角呢？面對住又靚仔又高嘅OPPA，有時又真係好難唔心動，但實際係唔係真係所以韓國人都咁高呢？當然唔係啦！2017年全韓國男性平均身高紀錄係174cm（20-30代）左右，其實同香港差唔多。
5. 韓國人講嘢其實都幾大聲
6. 韓國人好鍾意傳教？
相信大家嚟過韓國，應該唔少人都試過，俾韓國人扮問路，然後再向大家傅教。當然大家遇到呢個情況，真係要小心，因為好多時都係邪教嚟。
7. 韓國人唔拍拖唔得？
好多時睇韓劇，都會覺得好浪漫，應該唔少人都會幻想過同Oppa拍拖，但事實上，韓國人性格的確好多都係愛得快，恨得快。今個禮拜可能同緊A一齊，點知唔使幾耐好快又會同咗B一齊，對佢哋嚟講，愛你嘅時候可能真係會好愛，但只要分咗手，好多時唔開心一段時間，好快就會同咗另一個一齊。
8. 韓國人好鍾意放閃？
唔少韓國人拍拖方式，好似一拍拖，就要話俾全部人知，你就係我另一半。衣著、手機殼、戒指等好多時都要襯哂一套，就連影相都要不斷放閃。
以上8點，大家又會認同幾多點呢？歡迎大家留言俾小編聽。
如果有更多想知嘅內容，都可以隨時留言或者dm話俾我哋知：）
Instagram：creatrip.hk