韓國料理辣度排名

Hello，大家好，我哋係由韓國人每日提供最新韓國旅行資訊嘅Creatrip。

相信大家一諗起韓國美食，都一定會諗起辣嘢。雖然唔係每一樣料理都會辣，但一部分韓國美食都係紅色、以辣為主。今日小編就要同大家盤點韓國辣味料理，一齊睇下你可以挑戰到邊一個level啦！

韓國辣味料理排名

1. 辛拉麵

• ★☆☆☆☆

好多人諗起韓國嘅辣料理，第一個就會諗到辛辣麵，呢樣可以話係韓國辣味料理嘅代表，因為大家好易就可以喺屋企都食到，不過呢個辣度已經唔係人人都接受到。

不過對小編嚟講，辛辣麵嘅辣度係第一次食會嚇親（冇心理準備），但之後再食幾次，習慣咗就無事，大家覺得辛拉麵有幾辣呢？

2. 海鮮麵

• ★★☆☆☆

海鮮麵喺韓國中華料理餐廳一定可以見到，不過淨係見到湯頭上面飄浮嘅辣油，大家應該就會覺得「哇，應該好辣」。事實上佢都真係幾辣，飲到最後成個嘴都會紅咗，碗底仲會見到未完全溶解嘅辣椒粉。

講到韓國人公認嘅辣味食物，海鮮麵排行前五，通常韓國人都會同糖醋肉一齊吃，中和辣度。食過嘅朋友係咪都好有同感呢？

3. 辣炒年糕

• ★★★☆☆

辣炒年糕好多人都可能覺得係微辣、偏甜嘅小食，其實正宗嘅辣炒年糕，真係會好辣（高速巴士地下街嘅辣炒年糕真係超辣）！用辣椒粉熬成嘅鮮紅色湯頭，配煙煙韌韌嘅年糕，一食就會噴火。

可能有朋友會話，點解平時食嘅辣炒年糕唔會好辣嘅？咁係因為大部分觀光客會去食嘅辣炒年糕攤檔，已經將味道調得好淡。如果係地道啲嘅餐廳食，個辣度真係唔係人人頂得順。

4. 火雞辣麵系列

• ★★★★☆

三養品牌入面，最出名嘅莫過於火雞辣炒麵，各種口味、各種包裝都有唔同辣度，唔知大家最鍾意邊種呢？整體嚟講，小編真心覺得佢辣過辛辣麵好多。

比起辛辣麵越出越淡，火雞辣炒麵就越出越辣！小編每次食都會流晒汗，但又辣得好過癮。

5. 辣燉雞腳

• ★★★★★

大家有冇食過呢類辣燉雞腳嗎？大部分都係乾燒，有啲餐廳會整成辣燉雞腳湯，唯一嘅共通點就係非常辣。小編真係冇食過唔辣嘅辣燉雞腳。

喺韓國，大家通常都會當做下酒菜食，真係唔係普通嘅辣，食完會噴火！建議大家食嘅時候，叫多一份蒸雞蛋或者飯團，中和一下辣度。

以上係韓國人公認嘅辣味食物。除咗呢啲之外，仲有冇邊啲係外國人食咗都覺得好辣嘅料理呢？

青陽辣椒

小編之前聽韓國人講，呢類做成小菜嘅青陽辣椒基本上唔會辣。不過，有時都有可能會食到辣嘅，真係連韓國人都頂唔順。

嫩豆腐鍋/泡菜鍋/部隊鍋

呢類鍋物料理可以話係韓國辣味料理嘅BB班。雖然睇落好紅，但唔算好辣。

泡菜

好多人都鍾意食韓國泡菜，但其實每間餐廳嘅泡菜味道都唔同，會有好辣同完全唔辣嘅泡菜。

以上係韓國人公認最辣嘅韓國料理，仲有啲對外國人嚟講好辣，但喺韓國人睇中冇咩特別嘅食物。唔知大家又有冇邊款韓國食物係覺得辣到食唔到呢？

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購