Netflix《人文教育101》
南韓Netflix排第一！新劇《人文教育101》引熱議，新生代演員演技出色獲盛讚！
Hello，大家好，我哋係由韓國人每日提供最新韓國旅行資訊嘅Creatrip。
呢排好多韓劇都熱播緊，《夫妻的世界》、《The King：永遠的君主》等等，唔知大家又追緊邊套呢？如果對以上呢幾套嘅題材都冇興趣，咁就一定要睇下Netflix南韓排行榜一位、反映當代青少年成長期掙扎嘅《人文教育101》啦！
《人文教育101》
- 主演：金東希、 鄭多彬、朴珠賢、南允秀
《人文教育101》(台譯《人性課外課》）由4月29號開播至今，好評不斷，打敗《機智醫生生活》同《The King》，榮登南韓排行榜第一。
戲入面嘅演員都係韓國新生代演員，唔少都被喻為「怪物新人」，有一定實力保證。Netflix原創戲劇《人文教育101》講述一班為咗賺錢嘅高中生，毫無罪惡感咁犯罪嘅過程，4月29號首播後，就獲得媒體同觀眾嘅熱烈議論。
幕後陣容除咗有《她愛上了我的謊》導演嘅金鎮民，同新人編劇陳漢賽聯手製作；演員仲有大家熟知，出演咗《天空之城》、《梨泰院Class》嘅金東希，同埋演出過多部韓劇嘅鄭多彬，同新人演員朴珠賢、南允秀。
故事內容相當緊湊，《人文教育101》以多樣嘅人物形象增加戲劇深度，令人無法相信，呢套戲嘅劇本竟然係編劇陳漢賽嘅處女作。除此之外，演員嘅演技更獲得韓國國內外媒體嘅讚賞。
呢部戲嘅演員將成長過程嘅迷失表現出嚟，完全唔會覺得演技唔自然，令人投入劇情。
被逼到懸崖，毫無退路而爆發嘅金東希；
擺脫負擔、大膽演出嘅鄭多彬；
難以定義人物形象嘅朴珠賢；
飾演雙面人角色嘅南允秀；
四位主人公之間嘅戲劇張力，令《人文教育101》獲得空前成功。
製作組表示，《人文教育101》將呢一班10代青年嘅現實赤裸裸咁呈現出嚟。
導演更表示，呢啲新人擁有全新嘅演技，佢哋嘅表演方式會改變呢個時代，令人更加期待呢啲新生代演員，喺之後作品嘅表現。
隨住近期韓國N號房（相關報導請撳我）事件越演越激，《人文教育101》開播再度引起群眾對青少年犯罪嘅討論，令呢套劇喺眾多新劇入面脫穎而出。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
