韓國黑工救人佳話
南韓深夜大火，黑工奮不顧身救人燒傷！4萬人倡議賦予永住權
Hello，大家好，我哋係由韓國人話你知每日最新韓國資訊嘅Creatrip。
＃韓國新聞＃非法拘留者
＃見義勇為＃獲得居留權？
三月底個陣，江原道襄陽郡發生一單火警，令一名居民不幸喪生。
呢件事入面一個勇敢嘅外國人救番十幾人嘅性命，從而亦引起韓國對非法勞工嘅討論。
✨馬上Follow我哋IG
instagram.com/creatrip.hk
非法勞工義勇救人
資料照片
03月23日夜晚11點幾，襄陽一個公寓發生火警。一個男人即訂跑入建築入面，大叫「火燭」，疏散建築物入面10幾個人。
佢又喺二樓發現有個女人未能逃生，就由頂樓沿住煤氣管同電纜線，向下爬落二樓，救出嗰個女人。
佢嘅背脊、頸、耳仔、手都有二至三度不等嘅燒傷。
不過，喺警察同消防隊員趕到現場之後，佢就匿埋，唔敢接受治療。
佢係2017年12月用旅遊簽證入境，非法滯留工作到而家嘅哈薩克人——尤爾達舍夫‧阿里‧阿巴勒。
阿巴勒（來源：경향신문）
雖然呢單火警令一人不幸罹難，但因為阿巴勒嘅見義勇為，有十幾人成功逃生。
阿巴勒後嚟接受治療，並主動申報非法滯留一事。
原訂佢要喺05月01日遣返去哈薩克，但周邊鄰居、襄陽某小學嘅教導主任為佢募款，成功籌得700萬韓元（約港幣4萬9千），令阿巴勒安心接受治療。
佢哋更向地方媒體投稿，懇請政府「表揚阿巴勒」。
來源：NEWS1
據了解，阿巴勒雖原訂五月要遣返回國，但法務部為咁令佢可以喺韓國接受完善治療，延長佢嘅滯留期限，並發放咗其他簽證畀佢。
青瓦台亦有請願，要求向阿巴勒發放永住權。
呢項請願至今約有2.6萬名人聯署，其他類似請願亦累積到1.6萬人。
韓國多數媒體、社會輿論都傾向畀呢名非法移工長期簽證，表揚佢喺火災入而奮不顧身救人。
韓國社會開始討論係咪可以用「義傷者（為幫其他人受傷）」為由，畀呢啲非法勞工可以合法喺韓國工作，甚至提供永住權畀佢哋呢？
韓國社會都有過先例，2017年2月，慶北嘅一個非法勞工知道附近住宅火燭，就趕去現場睇。
現場仲有一個老婦受困，但因為火勢猛烈，邊個都唔敢接近，呢名勞工便奮不顧身，衝入火場將老婦救出。
2017年拯救老婦人的義傷者
佢嘅面部嚴重燒傷，肺部亦受損，住院三個禮拜。
當時保健福利部表揚佢係「義傷者」，並且延長咗佢嘅簽證，畀佢喺韓國安心養病。
2018年12月，韓國法務部最終賦予佢永久居住權。
不過，有啲人認為，以「義傷者、義人」嘅理由畀永住權非法勞工，並唔係最好嘅辦法。
韓國外勞工會副委員長亦表示，呢幾單案例嘅善舉係值得表揚，亦唔反對畀永住權佢哋，但佢懷疑，喺非法勞工嘅待遇未改善嘅情況下，畀永住權佢哋係咪最好嘅辦法呢？
佢表示：韓國政府明知呢啲人存在，但仍接收佢哋入境。
如果韓國冇呢類非法勞工，人力不足嘅問題無法解決。
雖然係非法，但同時默認佢哋存在，因為韓國都認為呢啲非法勞工對韓國經濟有幫助。
解決非法勞工嘅問題仍然有好長嘅路要行。
✨馬上Follow我哋IG
instagram.com/creatrip.hk
| 其他延伸閱讀 | |
 母乳醫武漢肺炎 |  釜山市長請辭 |