弘大 3間文創精品小店
弘大3間韓國人至愛文創精品小店！如果係文具控更加唔可以錯過！
Hello，大家好，我哋係由韓國人話你知每日最新韓國資訊嘅Creatrip。
相信大家嚟到韓國，弘大絕對係必到踩點之一。弘大唔單止多美食店，仲有好多服飾店等大家去行同買，但唔知大家又鍾唔鍾意去行文創精品小店呢？如果同小編一樣都係文具控，咁就一定要SAVE底呢篇文章，等之後嚟到就可以買啦！
1. 未知的世界 (미지의세계)
地址： 서울 마포구 연희로 35 1층
小Tips：弘大站3號出口行大約6分鐘
營業時間：每日14:00 - 20:00 (每月有唔同日子休息)
唔知大家有冇寫開手帳嘅習慣呢？小編寫手帳嘅時候，有個習慣就係好鍾意貼貼紙。呢度每一款都正中小編嘅心，全部貼紙都好可愛，就連memo紙都有特色。
除咗文具之外，小編發現呢度仲會有一啲公仔或迪士尼產品賣㗎！
2. 那日，春天 (그날, 봄)
地址： 서울 마포구 동교로46길 33
小Tips：弘大站3號出口行大約8分鐘
營業時間：每日13:00 - 21:00
第二間要為大家介紹嘅就係「那日，春天 」啦。呢間係小編無意中行弘大嘅時候發現嘅，相比第一間，呢到嘅貼紙比起走可愛風，更走生活化啲。好多貼紙如果用喺手帳到，可能會更加貼切。
呢度仲有一啲飾物、同杯具買，每個杯都有質感。朝早起身如果用佢哋飲杯牛奶，心情都會好啲：）
走之前，小編仲發現到呢到有得買香港明信片。唔知大家會唔會想買張寄返香港呢？
3. MU:U MU:U (무유무유)
地址： 서울 마포구 성미산로 190-4 102호
小Tips：弘大站3號出口行大約9分鐘
營業時間：星期二至四及星期日 12:00 - 20:00， 星期五及六 12:00 - 21:00 (逢星期一休息)
20200327更新
因武漢疫情關係，暫停營業時間為星期一至四及日 13:00 - 19:00， 星期五及六 13:00 - 20:00
而最後要介紹嘅呢間，可以話係店面最大一間，有啲似係Object嘅感覺。文具方面更走卡通化，小編最後都忍唔住喺度買咗幾樣返屋企。
唔單止文具類，呢到Tote bag、手機殼、蠟燭都有。令到小編最神奇嘅就係連狗狗用品都有得買，感覺好多元化。
如果大家行到攰，想飲杯咖啡提下神，呢度都可以買返杯即買即沖咖啡。但有一個可惜就係佢冇提供座位，大家只可以邊行邊飲。
今日小編介紹嘅呢3間弘大文創精品小店，唔知大家又鍾唔鍾意呢？
走文青風，或者係文具控嘅大家，之後嚟韓國更加唔可以錯過呢度啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com