確診母親嘅一封信
最真實嘅吶喊：夫妻獨留幼子雙雙確診…？韓國新冠肺炎確診母親嘅一封信，感動無數網友
＃武漢肺炎＃新冠肺炎
＃感染者嘅一封信
本文為brunch授權提供，請勿隨意轉載。原文出處請點我。
本文稿費按原作者意願，全數捐贈新冠肺炎患者。
✨馬上Follow我哋IG
instagram.com/creatrip.hk
作者：시나브로
我係新冠肺炎嘅確診者。
目前喺京畿道醫療院嘅負壓病房隔離緊。同時，我亦係兩個小朋友嘅媽媽，一個6歲，另一個小朋友出世到今日，仲未超過100日。
我之前喺新聞，只係見到不停上升嘅確診者數字。點知，我都成為咗呢幾千人入面嘅其中一個。
離開屋企人後，開始咗隔離生活。因為唔知道感染者確診後會點，喺呢種不安同恐怖嘅氣氛入面變成確診者，令我更加驚。
當然，我唔希望各位會成為確診者，但喺我、你、每個人都可能突然成為確診者嘅環境，我想先寫一啲關於確診後嘅資訊，話畀大家知。
我係被丈夫感染嘅。丈夫冇任何發燒症狀，持續兩天都有劇烈嘅肌肉酸痛同感冒症狀，先發現係新冠病毒引起。丈夫係被公司同事感染嘅。
朝早，聽到丈夫接獲確診新型冠狀病毒嘅消息個陣，我即刻驚醒。
同我想像中，一堆身穿隔離衣嘅人闖入屋企嘅混亂情況唔同，丈夫接到保健所嘅電話後，安靜咁離開，搭咗喺家門前等緊嘅救護車，被送去隔離病房。
丈夫被送走後，我哋小區嘅防疫工作就開始。屋企嚟咗一啲著住防護衣嘅保健所負責人，因為我哋都曾經接觸過確診者，所以要採樣、檢驗。
六歲嘅小朋友喺屋企第一見到著住奇怪嘅衫、帶著眼罩嘅人，幫佢採檢，喺鼻、喉嚨挖分泌物。
小朋友因為唔舒服而乾嘔，眼淚、鼻涕都流晒出嚟。當佢哋捉住我另一個小朋友，進行強制採檢個陣，我個心好唔舒服。
之後，屋企要進行消毒。因為消毒劑嘅關係，塊面相當刺痛，我哋打開窗換氣，足足開咗6個鐘啲味先散去。
屋企被搞到一塌糊塗，而我同小朋友只可以繼續留喺度。
住嘅大廈裡出現感染者，令大家都變得相當敏感。
喺咁混亂嘅情況下，我匿喺房入面，望住兩個小朋友，內心堅定咁諗，喺丈夫離開嘅呢段時間，我同兩個小朋友無論如何都一定要好好過⋯⋯諗諗下就不知不覺訓著咗。
訓咗唔夠一個鐘，凌晨1點半，保健所打電話畀我。
電話入面嘅人用好趕急嘅語氣，尤如晴天霹靂，同我講：我嘅檢查結果係陽性。
除咗我之外，兩個小朋友都係陰性。所以第一樣要做嘅，就係將小朋友帶離我身邊。
我嘅腦袋瞬間空白，即刻遠離小朋友，手都開始發抖。我冇發燒，冇呼吸道症狀，任何唔舒服嘅地方都冇。
再諗到要同一個需要哺乳，出生唔夠100日嘅小朋友同6歲嘅女兒分開⋯⋯佢哋要點生活呢？
我覺得好無助。
我先通知娘家將小朋友接走，之後叫醒熟睡嘅小朋友，同佢哋解釋：媽媽被病毒感染。我再將需要用嘅奶粉、尿片、衫等等準備好。
凌晨三點，我坐上救護車，被送去京畿道嘅醫院。成個屋企同小區都要再消毒。
一直以來，我嘅身體都好健康，除咗生小朋友，我冇搭過救護車。
從未住院過嘅我竟然感染病毒，被隔離喺負壓病房，實在好難相信。
我先換咗患者衫，凌晨四點，喺電話詳細對流行病學調查官講解移動路徑。因為有小朋友，基本上都喺屋企生活，所以要說明最近嘅移動路徑並唔困難。
另外，我同新天地冇任何關係。幾乎大部分嘅時間我都留喺屋企，出街都戴咗口罩，接觸者除咗屋企人之外，冇其他人，算係不幸中嘅大幸。
訓唔著，眼光光咁周圍看，又因為擔心小朋友，忍唔住開始減。
我諗起仍然依賴母乳餵養嘅第二個小朋友，同睡前一定要搵媽媽嘅大女，無法入睡。
我開始怨恨呢一切。
無法想像我成為咗感染者，同小朋友度過嘅時光，喺我腦海入面好似走馬燈閃過：餵奶；為咗哄孩子訓覺，面對面訓嘅時候；親吻嘅瞬間；煮飯畀小朋友個陣；互相對視嘅時間……
對小朋友達愛意嘅時間，竟然都有可能會傳染病毒畀佢哋，我覺得好厭惡。
呢一日就好似噩夢，呢一日亦相當長。比起病毒本身帶嚟嘅恐懼，我覺得同屋企人嘅隔離生活，仲有其他人可能被我感染嘅不安，更難以忍受。
隨住時間慢慢過，我嘅心情逐漸平靜落嚟。好彩小朋友都確認冇受感染，聽到呢個消息，我嗰心都定啲。
- 雖然感染病毒，但感謝冇一啲難以忍受嘅症狀；雖然我同丈夫都係陽性感染者，但最親近嘅兩個小朋友都係陰性，真係非常感謝。
- 感謝娘家嘅母親喺突發狀況下，可以幫手照顧小朋友。
- 感謝仲有病房，可以畀我喺隔離狀態入住。
- 感謝保健所嘅職員，喺凌晨時間，為咗預防更大規模嘅感染，辛苦工作，快速確認感染者。
- 感謝每次總係問我有冇邊度唔舒服，邊度唔方便嘅醫療人員、醫生、護士、醫院設施組、營養室嘅人。
- 感謝朋友們想要將營養劑、書，送入病房畀我嘅心意（但隔離病房唔可以收包裹）。
- 雖然仲放緊假，但我抱著試下嘅心態，聯絡咗小朋友讀嘅幼稚園，同佢哋講我成為咗感染者嘅事，亦感謝所有鼓勵支持我嘅其他媽媽們。
- 感謝所有陌生人，透過網路，撫慰我同小朋友分開、因疾病而不安嘅心。
- 感謝你（病毒）令我明白家庭同平凡生活嘅珍貴。
確診者每日大約增加一百幾個。
感染病毒後，我先知道其實呢一個病同一般嘅重感冒冇太大區別。
除咗高齡患者，同原本有舊疾嘅人，基本上都可以好似一般感冒咁撐過去，或者好似我咁冇任何症狀，可能會自己痊癒。
如果我冇接受檢驗，會唔會連我自己感染咗病毒都唔知，就咁好番呢？
因為而家仲未有新冠肺炎嘅藥，其實根本冇得治療，時間一長，自身嘅免疫力就會克服。呢個就係新冠肺炎。
因為傳染力強，先將我哋隔離喺醫院入面，隨住時間推移，最終病毒會喺我哋體內、喺我哋社會消失。
疫情好快就會過去，大家一齊為身邊嘅人應援，佢哋會一世記住。
諗起嗰啲比我年紀大嘅父母，或者有慢性疾病嘅鄰居，佢哋內心會有嘅不安；仲有去大邱，為咗救治確診病患，冇覺好訓、持續奮鬥嘅醫療人員、救護隊員，仲有佢哋屋企人嘅心情⋯⋯
我哋一定要振作。我想用溫暖嘅愛戰勝病毒，儘快回到日常生活，並分享我所得到嘅愛。
我迫切咁希望唔好再有更多感染者。所有人都可以回到日常軌道，醫護人員唔再疲憊；小商店可以鬆一口氣。
查爾斯·達爾文講過：「唔係強者生存，而係存活落喺嘅人堅強。」
我哋會喺疫情下存活落嚟。七千幾個確診者、因為延期開學，成日同小朋友一齊嘅母親們、因為經濟唔景氣，仍硬著頭皮堅持嘅小商店，同我自己，我哋會一同生存落嚟，向病毒展示我哋有幾強大。
相信我哋用愛帶出嘅力量，冷靜、堅持嘅潛力。加油！大邱慶北；加油！大韓民國。
本文為brunch授權提供，請勿隨意轉載。原文出處請點我。
本文稿費按原作者意願，全數捐贈新冠肺炎患者。
港韓隔離比較
大邱感人父女