千元的幸福
1,000韓元(HKD7)喺韓國可以做啲咩？吃喝玩樂、購物都可以滿足到嘅12項「千元幸福」攻略
Hello，大家好 ，我哋係由韓國人每日提供最新韓國旅行資訊嘅Creatrip。
雖然話韓國物價都偏高，但如果真正嚟韓國玩過幾次嘅朋友，應該都有發現韓國唔少嘢其實都幾平。今日要同大家推薦，嚟韓國點食先抵，同埋只用₩1,000（HKD7）可以買到嘅嘢都唔少㗎 ，快啲跟小編一齊睇下有啲咩啦。
韓國千元幸福
1. 花生餅（땅콩빵）
其實呢個同香港嘅雞蛋仔有啲似，但就做成花生形狀，所以被稱為花生麵包（餅乾）。唔同Size同數量，價格都會有所不同，但好多地方都可以搵到₩1,000就可以買到好幾個。
2. 鯉魚餅（델리만쥬）
大家應該都對呢個有印象，尤其喺地鐵站會有好多賣鯉魚餅嘅店，同雞蛋糕一樣，唔同數量，價錢都會唔同。如果搭地鐵嘅時候突然肚餓，呢個真係一個又平又快嘅小食幫你充飢。
3. 杯裝辣炒年糕（컵떡볶이）
FACEBOOK：오늘 뭐 먹지?
一份辣炒年糕已經夠平，杯裝辣炒年糕可以話係份量啱啱好，價錢亦都係超抵。遠離觀光地區，去大學附近商圈行吓嘅話，就可以發現好多賣得超平嘅杯裝辣炒年糕（可想而知觀光區都好呃錢XD）。
4. 鯽魚餅（붕어빵）
同啱啱地鐵賣的嘅鯉魚餅唔太一樣，呢個係有內餡，多數係有紅豆/Cream可以揀。通常₩1,000就有3-4個（每間鋪頭都唔一樣），同樣係秋冬嚟韓國一定要食嘅小食之一。
5. 糖餅（호떡）
糖餅價格亦都係超平，小編公司附近最平一個只需₩1,000。同樣勸告大家遠離觀光地區買，同一樣嘢都可以差價好大。
6. 魚糕（어묵）
寒冷天氣最好就係食魚糕啦！一串魚糕只要1,000韓幣，而且魚糕湯可以無限飲到飽，可以話係呢一系列美食當中，最正嘅₩1,000幸福。
7. Homeplus（홈플러스）
大家又知唔知Home plus 係以「千元幸福」聞名呢？幾乎每間分店都會有個位置，擺滿即將到期嘅商品或者促銷品，好多都係只係用₩1,000就可以入手嘅超市食物，嚟到真係推薦大家去尋寶！
8. 大型超市
同啱啱介紹嘅 Home plus 千元幸福專區有點啲似，好多大賣場都唔少商品，可能喺一般零售店、便利店賣，就要好幾千，但去大型賣場揀，價格就會壓到好低。
薯片、微波飯，甚至係一啲飲品、拉麵，對住喺超市附近嘅人嚟講，呢啲商品真係令人超幸福。
9. Daiso（다이소）
相信小編唔使多講，大家都知道韓國Daiso就係以不斷推出新系列，加上商品物美價廉而聞名。但重點係！如果有鍾意嘅角色同韓國大創聯名，好多正版商品真係需要超平價格就可以入手。
例如之前迪士尼聯名、復仇者聯盟聯名，呢啲正版聯名商品、文具，喺大創都變得超平，一定要買XD。
10. 匯率
韓國匯率瞬息萬變，要點先可以多賺錢呢？答案就係搵會率比較好嘅找換店。有時換錢要搭車，來回車程加上時間，何嘗唔係成本呢？如果酒店附近有自動換錢機，匯率又唔錯，係唔係會更加方便同正呢～隨時可以慳番幾好一千！
11. 零售商店
好多呢種零售商店，都會販售就快到期嘅零食、餅乾等等。如果咁啱經過，就大膽入去行吓啦！
12. 唱歌房/卡拉ok（노래방）
如果肚唔太餓，想搵地方Hea吓嘅話……₩1,000通常喺韓國硬幣K房，就可以唱到3到4首歌，小編屋企附近嗰間更加可以唱到5首！某種程度上唔單止係幸福同時亦可以話係可以解下壓。
以上係小編整理出，嚟韓國嘅「千元幸福」，雖然唔係話買到好多嘢，但都令人感覺溫暖同幸福，希望大家會鍾意呢篇文章嘅介紹啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk