弘大Cafe｜哈利波特(943 King's Cross)咖啡廳
想做巫師話咁易！弘大哈利波特Cafe「943 King's Cross」！超多打卡位等你嚟影！
Hello，大家好，我哋係由韓國人每日提供最新韓國旅行資訊嘅Creatrip。
弘大真係有好多咖啡廳，而呢間哈利波特咖啡廳「943 King's Cross」非常引人注目！想知道呢間Cafe有咩咁特別？咁就要繼續睇落去啦！下次嚟韓國都要去打卡！
弘大哈利波特Cafe「943 King's Cross」資訊
- 地址：서울 마포구 양화로16길 24
- 營業時間：星期一至四 11:30 - 21:30、星期五至日 10:00 - 21:30（Last order 21:00）
- 可預約時間：星期一至四 11:30 - 20:30 、星期五至日 10:00 - 20:30
弘大哈利波特Cafe「943 King's Cross」推薦理由
- 由地下1樓到4樓都有唔同主題，每個角落都超啱影相！
- 上4樓仲可以免費借哈利波特嘅服裝影相！
- 呢度有提供各種哈利波特主題嘅特別Menu，令你好似行咗入電影咁！
- 透過Creatrip預約仲可以用優惠價享用餐點！
弘大哈利波特Cafe「943 King's Cross」價錢
| 套餐 | 價錢 | 包括項目 |
| BEST SET | ₩57,000 | Dragon Leg Plate + 飲品2杯 |
| 2人 FOOD SET | ₩40,000 | 歐式香腸 OR 水果芝士拼盤 + 飲品2杯 |
| 1人 FOOD SET | ₩22,000 | Dragon Leg OR 薯條 OR Nacho&Coleslaw沙律 + 飲品1杯 |
※其他餐飲請參考詳細介紹。
弘大哈利波特Cafe「943 King's Cross」退款政策
| 預約後至到訪2日前取消 | 全額退款 |
| 到訪1日前或其後取消 | 不設退款 |
弘大哈利波特Cafe「943 King's Cross」注意事項
- 請最少喺2日前完成預約。
- 因為飲品價錢包括入場費，所以就算叫Set都需要按人頭數叫飲品。
- 為他人著想，4樓可以借到嘅衫每人限時著5分鐘。
- 如希望加購餐品，請喺現場支付所需金額。
- 預約時請確保已選擇正確日期及時間。
- 由於星期六、日及公眾假期人流眾多，即使已進行預約亦有可能需要稍作等候。
- 如果想更改預約或有任何疑問，請send email到help@creatrip.com查詢。
弘大哈利波特Cafe「943 King's Cross」預約流程
| STEP 1. | 撳我預約 |
| STEP 2. | 請輸入所有相關資訊。 |
| STEP 3. | 付款後預約即時成立。 你只可以喺體驗2日前更改或取消預約。 |
| STEP 4. | 請務必準時到達， 到達之後向職員出示預約資訊。 |
| STEP 5. | Enjoy！ |
弘大哈利波特Cafe「943 King's Cross」介紹
今日小編嚟到超高人氣嘅「943 King's Cross」！淨係睇出面都勁似電影拍攝場地~ 相信入到去更加會令你嚇一跳！
平時有好多外國人會排隊同呢支飛天掃把影相！小編當日比較早去到，所以唔洗排隊就可以影到~
弘大「943 King's Cross」總共有8層（B1/F~7/F），而我哋可以入嘅地方係B1/F至4/F，呢5層嘅concept分別係魔術師小木屋、Counter、魔法師Cafe、宴會廳同宿舍！
1樓 ‘魔法藥水/甜品&飲品製造區’
一入到去會見到有條令人聯想起哈利波特間房嘅樓梯，右邊嘅書櫃更加放滿曬魔法棒！
Counter左邊係賣哈利波特週邊商品嘅Area，大家可以大買特買！
而Counter右邊就有放滿蛋糕同飲品嘅雪櫃，大家可以見到有好多超特別嘅蛋糕，款款都好吸引！
呢度嘅Menu有韓英對照，大家可以參考上面兩張圖！另外呢度嘅店員全部都識講英文，所以就算唔識講韓文都唔需要擔心。小編今次就叫咗Dragon Leg、Wizard Chocolat同Wizard Green tea，真係好令人期待啊！
而家大家就跟住小編落B1參觀魔術師小木屋啦！順帶一提，落樓梯之前都有好多好啱打卡嘅位，大家可以慢慢影~
B1: 魔術師小木屋
由落B1條樓梯開始就已經有好多藤蔓，裝飾到好似森林咁，入海格間小木屋之前應該都會係咁~？
一落到去見到嘅呢個空間，令人不禁聯想到哈利波特同朋友一齊飲奶油啤酒嘅酒吧！
入口附近有幾支蠟燭，帶嚟一種神秘嘅感覺。
而入面就裝飾到好似Cocktail Bar咁，仲有好似有幽靈飄嚟飄去咁，真係好似電影入面會出現嘅場面！
弘大「943 King's Cross」Cafe內部有一部𨋢，上上落落非常方便！而家就跟小編一齊去2樓睇吓啦~
2F: 魔法師Cafe
2樓嘅concept係魔法師Cafe，入口同最入面都有打卡位，大家坐低嘆咖啡之前可以去影返幾張相留念先~
3F: 宴會廳
終於嚟到期待已久嘅宴會廳~ 小編個人認為呢度最似哈利波特電影入面嘅場景！
3樓其中一邊裝飾到好似葛來分多宿舍咁，而且書架上面嘅書全部都係真㗎！推薦大家可以坐喺搖搖櫈上面影相~
見到呢度，小編即刻諗起電影入面學生一齊食飯嘅地方！逼真度超高，令小編呢個哈利波特迷勁興奮~
而後面呢張枱就好似教授用嘅枱咁，完美還原電影場景。
4F: 宿舍
最後4樓嘅concept係宿舍，大家可以喺呢度著住哈利波特斗篷影相打卡！
呢度仲有搞貼紙相活動，有興趣嘅朋友們可以參考！
唔知講起哈利波特大家會諗起啲咩呢？小編就會聯想到聖誕節啦！大家可以著住斗篷，坐喺Photo Zone影相~
不過大家要注意，為咗其他客人著想，呢度嘅衫每人只可以著3分鐘！
大家不妨好似上面呢張相咁著住哈利波特衫，再戴埋頸巾，做返一日魔法學校學生啦！
FOOD: Best Set
而食物方面，小編叫咗個Best Set，嘢飲揀咗呢度嘅招牌飲品Wizard Chocolat同Wizard Green tea，上面頂魔法帽真係勁趣緻！
Dragon Leg原來係炸火雞脾，鹹鹹地好香口！小編個人覺得飲住啤酒食應該會更加正~
醬汁方面有芥末醬同牛扒醬，同火雞肉都幾夾！
仲可以配埋法包同酸青瓜食，咁就唔會咁漏（膩）啦！
Wizard Chocolat同Wizard Green tea味道同Starbucks冰沙差唔多味，上面頂魔法帽係朱古力，好啱用嚟呃like XD
無論係哈利波特迷，定係想搵特色Cafe，大家一定嚟到都一定會超滿意！
弘大哈利波特Cafe「943 King's Cross」前往方法
喺弘大入口站9號出口行出嚟。
出到嚟之後一直直行。
喺第一條斑馬線過馬路，然後向左邊行。
直行。
第一個路口轉右。
直行。
行到十字路口轉左。
直行。
咁就行到「943 King's Cross」 啦！
以上係弘大哈利波特Cafe「943 King's Cross」 嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com