韓國人生活習慣
韓國人11個匪夷所思嘅生活習慣！拖鞋配長襪、男仔著膝上短褲？
Hello，大家好，我哋係由韓國人每日提供最新韓國旅行資訊嘅Creatrip。
今天要嚟同大家講下，關於韓國人嘅生活習慣。有啲習慣其實都唔算習慣，只係自然而然，有一日大家都會咁樣做XD 究竟韓國人有啲咩生活習慣？而家就嚟介紹呢啲令外國人覺得神奇嘅韓國人生活習慣啦！
韓國人生活習慣
1. 男生都著超短褲
唔知大家有冇發現，韓國男仔喺夏天著嘅短褲，真係一個比一個短。而且韓國男生普遍都有運動習慣，雙腳線條修長，著咗膝頭以上嘅短褲，令成個比例睇落更加好！
小編嘅香港朋友，都話香港男仔平時好少著呢種褲，唔知算唔算係文化差異呢？
2. 食完午餐一定會刷牙
第一個最多人知嘅韓國人生活習慣，就係食完飯之後一定要刷牙。不論係返學定返工，幾乎95%以上嘅韓國人都會帶牙膏、牙刷喺身。
韓國人由細就喺學校學刷牙（333：一日刷牙三次、食完飯後嘅三分鐘內要刷三分鐘），亦因為咁樣，食完飯刷牙已經成為韓國人日常嘅生活習慣。呢個習慣可能係因為韓國食物味道重，唔刷牙嘅話，容易喺下就同人講嘢個陣會有異味，唔太禮貌。
3. 食完飯一定要轉場再食過
TVN《青春時代2》
韓國人只要約食飯，通常都會食第二輪、第三輪。第一輪如果係大家一齊食飯嘅話，第二輪通常都係Cafe或者小酒館，第三輪就會去唱K。
TVN《獨酒男女》
有一位外國朋友問小編「韓國人去第二輪係咪一種生活習慣？」小編聽到呢個問題都呆咗呆，因為對韓國人嚟講，聚餐個陣去第二輪係好正常嘅事XD
4. 韓國人好識做分類回收
對韓國人嚟講，垃圾分類回收係生活習慣嘅一部分，普遍所有嘅韓國人都有呢個概念，而韓國實際上都係OECD國家入面資源回收做得最好嘅國家之一。
韓國周圍都設置咗資源回收嘅垃圾桶，而小編目前住嘅地方，每天可以揼嘅垃圾都唔一樣：星期一廚餘、星期三紙類、星期四係一般垃圾，而星期五就係膠樽。附近居民會將要揼嘅垃圾整理好、拎出外面放，之後會有小區嘅清潔員或者垃圾車嚟收。
5. 著拖鞋嘅時候一定要著襪
好多韓國人著拖鞋個陣，都一定會著襪，對外國朋友嚟講，係咪好難理解呢？其實係因為韓國人普遍著嘅三線拖，唔著襪就著嘅話隻腳會好痛，好容易刮到，所以小編自己都會著襪再著三線拖。久而久之，不論係邊種拖鞋，大家都會加襪。
另一種講法係因為喺Office或者學校個陣，為咗避免一整日都將腳焗住，就會換室內拖鞋。如果連襪都除埋，好似有啲冇禮貌，所以著拖鞋、涼鞋著襪，就成為咗生活習慣。
6. 韓國人好鍾意自言自語
自言自語都是韓國人嘅生活習慣之一，相信大家睇韓劇個陣，成日見到韓劇主角自言自語。煲劇嗰陣、做嘢嗰陣、煩惱嗰陣都一定會自言自語，韓國人對呢樣嘢真係見怪不怪。
7. 就算係冬天都要飲凍飲
喺冬天飲凍飲係韓國人一種生活習慣，就連小編喺冬天個陣，都慣咗買凍美式咖啡，所以就出現咗「얼죽아（就算凍死都要飲凍飲）」呢個講法XD
TVN
點解韓國人喺冬天都會飲冰美式呢？有一部份人話通常飲咖啡都係當飯後甜品，叫凍嘅可以好快飲完，唔洗花太多時間，又唔洗慢慢攤凍。又有一部份人話係為咗紓解壓力等等，總之飲凍嘢已經成為韓國人嘅生活習慣。
8. 出門唔帶現金
韓國電子支付、碌卡非常普遍，基本上韓國人出門都唔洗點帶現金，都是用卡或者手機俾錢。
有啲人會問，如果係地下街或者小食檔要畀現金咁點？其實呢一點對韓國人嚟講根本唔成問題，因為檔主會提供銀行帳戶，只要郁一郁手指，就可以直接轉帳。
9. 返工用一個鐘都算少
相信對好多人嚟講，返工要用成個鐘非常難捱，甚至會寧願搬屋。不過對韓國人嚟講，無論係返學定返工，只要喺一個鐘內都算OK。
原因係因為韓國搬屋好麻煩（房租、保證金貴），加上地鐵同巴士非常發達，通勤對韓國人嚟講似乎都成為咗生活習慣，唔會覺得特別困擾。
10. SNS社群力量
除了常見嘅Instagram、Facebook等等，韓國人都幾常會用韓國嘅論壇，發表個人意見，或者跟風。對於習慣群居嘅韓國人嚟講，社交平台嘅影響力非常大。
最出名嘅就係青瓦台請願系統，只要韓國發生咩大事，都可以喺社交平台見到有人喺度發起請願。呢一種公民嘅力量，促使好多人正視韓國社會嘅現實。
11. 食飯一定要有小菜
呢一點係100%每個韓國人都會有嘅生活習慣！韓國人食飯一定要配小菜，無論係去邊間餐廳，只要係賣基本嘅韓食料理，都一定會有飯前小菜。
呢一點都係小編好喜歡韓國嘅其中一個原因。無論喺邊個地方，都可以食到好食嘅小菜，而且仲可以無限續加，係咪好正呢？
今日介紹咗韓國人嘅11個生活習慣俾大家，大家有冇覺得邊樣好有趣呢？又或者大家有冇發現到其他習慣？留言同我哋分享啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk